จาลา จ อุปจาลา จ, อเหสุํ อคฺคสาวิกา;
โพธิ ตสฺส ภควโต, อามณฺโฑติ ปวุจฺจติฯ
[21]
ธนญฺจโย วิสาโข จ, อเหสุํ อคฺคุปฏฺฐกา;
ปทุมา เจว นาคา จ, อเหสุํ อคฺคุปฏฺฐิกาฯ
[22]
อฏฺฐปณฺณาสรตนํ , โสปิ อจฺจุคฺคโต มุนิ;
โสภเต สตรํสีว, อุฬุราชาว ปูริโตฯ
[23]
นวุติวสฺสสหสฺสานิ, อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[24]
โอวทิตฺวา พหู สตฺเต, สนฺตาเรตฺวา พหู ชเน;
โสปิ สตฺถา อตุลยโส, นิพฺพุโต โส สสาวโกฯ
[25]
ผุสฺโส ชินวโร สตฺถา, เสนารามมฺหิ นิพฺพุโต;
ธาตุวิตฺถาริกํ อาสิ, เตสุ เตสุ ปเทสโตติฯ
ผุสฺสสฺส ภควโต วํโส อฏฺฐารสโมฯ
21. วิปสฺสีพุทฺธวํโส
[1]
ผุสฺสสฺส จ อปเรน, สมฺพุทฺโธ ทฺวิปทุตฺตโม;
วิปสฺสี นาม นาเมน, โลเก อุปฺปชฺชิ จกฺขุมาฯ
[2]
อวิชฺชํ สพฺพํ ปทาเลตฺวา, ปตฺโต สมฺโพธิมุตฺตมํ;
ธมฺมจกฺกํ ปวตฺเตตุํ, ปกฺกามิ พนฺธุมตีปุรํฯ
[3]
ธมฺมจกฺกํ ปวตฺเตตฺวา, อุโภ โพเธสิ นายโก;
คณนาย น วตฺตพฺโพ, ปฐมาภิสมโย อหุฯ
[4]
ปุนาปรํ อมิตยโส, ตตฺถ สจฺจํ ปกาสยิ;
จตุราสีติสหสฺสานํ, ทุติยาภิสมโย อหุฯ
[5]
จตุราสีติสหสฺสานิ , สมฺพุทฺธํ อนุปพฺพชุํ;
เตสมารามปตฺตานํ, ธมฺมํ เทเสสิ จกฺขุมาฯ
[6]
สพฺพากาเรน ภาสโต, สุตฺวา อุปนิสาทิโน [อุปนิสฺสา ชิโน (สฺยา. กํ.)];
เตปิ ธมฺมวรํ คนฺตฺวา, ตติยาภิสมโย อหุฯ
[7]
สนฺนิปาตา ตโย อาสุํ, วิปสฺสิสฺส มเหสิโน;
ขีณาสวานํ วิมลานํ, สนฺตจิตฺตาน ตาทินํฯ
[8]
อฏฺฐสฏฺฐิสตสหสฺสานํ, ปฐโม อาสิ สมาคโม;
ภิกฺขุสตสหสฺสานํ, ทุติโย อาสิ สมาคโมฯ
[9]
อสีติภิกฺขุสหสฺสานํ, ตติโย อาสิ สมาคโม;
ตตฺถ ภิกฺขุคณมชฺเฌ, สมฺพุทฺโธ อติโรจติฯ
[10]
อหํ เตน สมเยน, นาคราชา มหิทฺธิโก;
อตุโล นาม นาเมน, ปุญฺญวนฺโต ชุตินฺธโรฯ
[11]
เนกานํ นาคโกฏีนํ, ปริวาเรตฺวานหํ ตทา;
วชฺชนฺโต ทิพฺพตุริเยหิ, โลกเชฏฺฐํ อุปาคมิํฯ
[12]
อุปสงฺกมิตฺวา สมฺพุทฺธํ, วิปสฺสิํ โลกนายกํ;
มณิมุตฺตรตนขจิตํ, สพฺพาภรณวิภูสิตํ;
นิมนฺเตตฺวา ธมฺมราชสฺส, สุวณฺณปีฐมทาสหํฯ
[13]
โสปิ มํ พุทฺโธ พฺยากาสิ, สงฺฆมชฺเฌ นิสีทิย;
‘‘เอกนวุติโต กปฺเป, อยํ พุทฺโธ ภวิสฺสติฯ
[14]
‘‘อหุ กปิลวฺหยา รมฺมา, นิกฺขมิตฺวา ตถาคโต;
ปธานํ ปทหิตฺวาน, กตฺวา ทุกฺกรการิกํฯ
[15]
‘‘อชปาลรุกฺขมูลสฺมิํ , นิสีทิตฺวา ตถาคโต;
ตตฺถ ปายาสํ ปคฺคยฺห, เนรญฺชรมุเปหิติฯ
[16]
‘‘เนรญฺชราย ตีรมฺหิ, ปายาสํ อท โส ชิโน;
ปฏิยตฺตวรมคฺเคน, โพธิมูลมุเปหิติฯ
[17]
‘‘ตโต ปทกฺขิณํ กตฺวา, โพธิมณฺฑํ อนุตฺตโร;
อสฺสตฺถมูเล สมฺโพธิํ, พุชฺฌิสฺสติ มหายโสฯ
[18]
‘‘อิมสฺส ชนิกา มาตา, มายา นาม ภวิสฺสติ;
ปิตา สุทฺโธทโน นาม, อยํ เหสฺสติ โคตโมฯ
[19]
‘‘อนาสวา วีตราคา, สนฺตจิตฺตา สมาหิตา;
โกลิโต อุปติสฺโส จ, อคฺคา เหสฺสนฺติ สาวกา;
อานนฺโท นามุปฏฺฐาโก, อุปฏฺฐิสฺสติมํ ชินํฯ
[20]
‘‘เขมา อุปฺปลวณฺณา จ, อคฺคา เหสฺสนฺติ สาวิกา;
อนาสวา วีตราคา, สนฺตจิตฺตา สมาหิตา;
โพธิ ตสฺส ภควโต, อสฺสตฺโถติ ปวุจฺจติฯ
[21]
‘‘จิตฺโต จ หตฺถาฬวโก, อคฺคา เหสฺสนฺตุปฏฺฐกา;
นนฺทมาตา จ อุตฺตรา, อคฺคา เหสฺสนฺตุปฏฺฐิกา;
อายุ วสฺสสตํ ตสฺส, โคตมสฺส ยสสฺสิโนฯ
[22]
‘‘อิทํ สุตฺวาน วจนํ…เป.… เหสฺสาม สมฺมุขา อิมํ’’ฯ
[23]
ตสฺสาหํ วจนํ สุตฺวา, ภิยฺโย จิตฺตํ ปสาทยิํ;
อุตฺตริํ วตมธิฏฺฐาสิํ, ทสปารมิปูริยาฯ
[24]
นครํ พนฺธุมตี นาม, พนฺธุมา นาม ขตฺติโย;
มาตา พนฺธุมตี นาม, วิปสฺสิสฺส มเหสิโนฯ
[25]
อฏฺฐวสฺสสหสฺสานิ, อคารํ อชฺฌ โส วสิ;
นนฺโท สุนนฺโท สิริมา, ตโย ปาสาทมุตฺตมาฯ
[26]
ติจตฺตารีสสหสฺสานิ, นาริโย สมลงฺกตา;
สุทสฺสนา นาม สา นารี, สมวตฺตกฺขนฺโธ นาม อตฺรโชฯ
[27]
นิมิตฺเต จตุโร ทิสฺวา, รถยาเนน นิกฺขมิ;
อนูนอฏฺฐมาสานิ, ปธานํ ปทหี ชิโนฯ
[28]
พฺรหฺมุนา ยาจิโต สนฺโต, วิปสฺสี โลกนายโก;
วตฺติ จกฺกํ มหาวีโร, มิคทาเย นรุตฺตโมฯ
[29]
ขณฺโฑ จ ติสฺสนาโม จ, อเหสุํ อคฺคสาวกา;
อโสโก นามุปฏฺฐาโก, วิปสฺสิสฺส มเหสิโนฯ
[30]
จนฺทา จ จนฺทมิตฺตา จ, อเหสุํ อคฺคสาวิกา;
โพธิ ตสฺส ภควโต, ปาฏลีติ ปวุจฺจติฯ
[31]
ปุนพฺพสุมิตฺโต นาโค จ, อเหสุํ อคฺคุปฏฺฐกา;
สิริมา อุตฺตรา เจว, อเหสุํ อคฺคุปฏฺฐิกาฯ
[32]
อสีติหตฺถมุพฺเพโธ , วิปสฺสี โลกนายโก;
ปภา นิทฺธาวติ ตสฺส, สมนฺตา สตฺตโยชเนฯ
[33]
อสีติวสฺสสหสฺสานิ, อายุ พุทฺธสฺส ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[34]
พหุเทวมนุสฺสานํ, พนฺธนา ปริโมจยิ;
มคฺคามคฺคญฺจ อาจิกฺขิ, อวเสสปุถุชฺชเนฯ
[35]
อาโลกํ ทสฺสยิตฺวาน, เทเสตฺวา อมตํ ปทํ;
ชลิตฺวา อคฺคิกฺขนฺโธว, นิพฺพุโต โส สสาวโกฯ
[36]
อิทฺธิวรํ ปุญฺญวรํ, ลกฺขณญฺจ กุสุมิตํ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[37]
วิปสฺสี ชินวโร พุทฺโธ, สุมิตฺตารามมฺหิ นิพฺพุโต;
ตตฺเถวสฺส ถูปวโร, สตฺตโยชนมุสฺสิโตติฯ
วิปสฺสิสฺส ภควโต วํโส เอกูนวีสติโมฯ
22. สิขีพุทฺธวํโส
[1]
วิปสฺสิสฺส อปเรน, สมฺพุทฺโธ ทฺวิปทุตฺตโม;
สิขิวฺหโย อาสิ ชิโน, อสโม อปฺปฏิปุคฺคโลฯ
[2]
มารเสนํ ปมทฺทิตฺวา, ปตฺโต สมฺโพธิมุตฺตมํ;
ธมฺมจกฺกํ ปวตฺเตสิ, อนุกมฺปาย ปาณินํฯ
[3]
ธมฺมจกฺกํ ปวตฺเตนฺเต, สิขิมฺหิ ชินปุงฺคเว [มุนิปุงฺคเว (สี.)];
โกฏิสตสหสฺสานํ, ปฐมาภิสมโย อหุฯ
[4]
อปรมฺปิ ธมฺมํ เทเสนฺเต, คณเสฏฺเฐ นรุตฺตเม;
นวุติโกฏิสหสฺสานํ, ทุติยาภิสมโย อหุฯ
[5]
ยมกปาฏิหาริยญฺจ [ยมกํ ปาฏิหีรญฺจ (สี.)], ทสฺสยนฺเต สเทวเก;
อสีติโกฏิสหสฺสานํ, ตติยาภิสมโย อหุฯ
[6]