โส พุทฺโธ สฏฺฐิรตนํ, อโหสิ นภมุคฺคโต;
กญฺจนคฺฆิยสงฺกาโส, ทสสหสฺสี วิโรจติฯ
[22]
โสปิ พุทฺโธ อสมสโม, อตุโล อปฺปฏิปุคฺคโล;
วสฺสสตสหสฺสานิ, โลเก อฏฺฐาสิ จกฺขุมาฯ
[23]
วิปุลํ ปภํ ทสฺสยิตฺวา, ปุปฺผาเปตฺวาน สาวเก;
วิลาเสตฺวา สมาปตฺยา, นิพฺพุโต โส สสาวโกฯ
[24]
สิทฺธตฺโถ มุนิวโร พุทฺโธ, อโนมารามมฺหิ นิพฺพุโต;
ตตฺเถวสฺส ถูปวโร, จตุโยชนมุคฺคโตติฯ
สิทฺธตฺถสฺส ภควโต วํโส โสฬสโมฯ
19. ติสฺสพุทฺธวํโส
[1]
สิทฺธตฺถสฺส อปเรน, อสโม อปฺปฏิปุคฺคโล;
อนนฺตเตโช อมิตยโส, ติสฺโส โลกคฺคนายโกฯ
[2]
ตมนฺธการํ วิธมิตฺวา, โอภาเสตฺวา สเทวกํ;
อนุกมฺปโก มหาวีโร, โลเก อุปฺปชฺชิ จกฺขุมาฯ
[3]
ตสฺสาปิ อตุลา อิทฺธิ, อตุลํ สีลํ สมาธิ จ;
สพฺพตฺถ ปารมิํ คนฺตฺวา, ธมฺมจกฺกํ ปวตฺตยิฯ
[4]
โส พุทฺโธ ทสสหสฺสิมฺหิ, วิญฺญาเปสิ คิรํ สุจิํ;
โกฏิสตานิ อภิสมิํสุ, ปฐเม ธมฺมเทสเนฯ
[5]
ทุติโย นวุติโกฏีนํ, ตติโย สฏฺฐิโกฏิโย;
พนฺธนาโต ปโมเจสิ, สตฺเต [สมฺปตฺเต (ก.)] นรมรู ตทาฯ
[6]
สนฺนิปาตา ตโย อาสุํ, ติสฺเส โลกคฺคนายเก;
ขีณาสวานํ วิมลานํ, สนฺตจิตฺตาน ตาทินํฯ
[7]
ขีณาสวสตสหสฺสานํ, ปฐโม อาสิ สมาคโม;
นวุติสตสหสฺสานํ, ทุติโย อาสิ สมาคโมฯ
[8]