สุมงฺคโล จ ติสฺโส จ, อเหสุํ อคฺคสาวกา;
สาคโต [โสภิโต (ก.)] นามุปฏฺฐาโก, ทีปงฺกรสฺส สตฺถุโนฯ
[25]
นนฺทา เจว สุนนฺทา จ, อเหสุํ อคฺคสาวิกา;
โพธิ ตสฺส ภควโต, ปิปฺผลีติ ปวุจฺจติฯ
[26]
ตปุสฺสภลฺลิกา [ตปสฺสุภลฺลิกา (สี.)] นาม, อเหสุํ อคฺคุปฏฺฐกา;
สิริมา โกณา อุปฏฺฐิกา, ทีปงฺกรสฺส สตฺถุโนฯ
[27]
อสีติหตฺถมุพฺเพโธ, ทีปงฺกโร มหามุนิ;
โสภติ ทีปรุกฺโขว, สาลราชาว ผุลฺลิโตฯ
[28]
สตสหสฺสวสฺสานิ, อายุ ตสฺส มเหสิโน;
ตาวตา ติฏฺฐมาโน โส, ตาเรสิ ชนตํ พหุํฯ
[29]
โชตยิตฺวาน สทฺธมฺมํ, สนฺตาเรตฺวา มหาชนํ;
ชลิตฺวา อคฺคิกฺขนฺโธว, นิพฺพุโต โส สสาวโกฯ
[30]
สา จ อิทฺธิ โส จ ยโส, ตานิ จ ปาเทสุ จกฺกรตนานิ;
สพฺพํ ตมนฺตรหิตํ [สมนฺตรหิตํ (สี. สฺยา. ก.)], นนุ ริตฺตา สพฺพสงฺขารา [สพฺพสงฺขาราติ (สพฺพตฺถ)]ฯ
[31]
ทีปงฺกโร ชิโน สตฺถา, นนฺทารามมฺหิ นิพฺพุโต;
ตตฺเถวสฺส ชินถูโป, ฉตฺติํสุพฺเพธโยชโนติฯ
ทีปงฺกรสฺส ภควโต วํโส ปฐโมฯ
4. โกณฺฑญฺญพุทฺธวํโส
[1]
ทีปงฺกรสฺส อปเรน, โกณฺฑญฺโญ นาม นายโก;
อนนฺตเตโช อมิตยโส, อปฺปเมยฺโย ทุราสโทฯ
[2]
ธรณูปโม ขมเนน, สีเลน สาครูปโม;
สมาธินา เมรูปโม, ญาเณน คคนูปโมฯ
[3]
อินฺทฺริยพลโพชฺฌงฺค-มคฺคสจฺจปฺปกาสนํ;
ปกาเสสิ สทา พุทฺโธ, หิตาย สพฺพปาณินํฯ
[4]
ธมฺมจกฺกํ ปวตฺเตนฺเต, โกณฺฑญฺเญ โลกนายเก;
โกฏิสตสหสฺสานํ, ปฐมาภิสมโย อหุฯ
[5]
ตโต ปรมฺปิ เทเสนฺเต, นรมรูนํ สมาคเม;
นวุติโกฏิสหสฺสานํ, ทุติยาภิสมโย อหุฯ
[6]
ติตฺถิเย อภิมทฺทนฺโต, ยทา ธมฺมมเทสยิ;
อสีติโกฏิสหสฺสานํ, ตติยาภิสมโย อหุฯ
[7]
สนฺนิปาตา ตโย อาสุํ, โกณฺฑญฺญสฺส มเหสิโน;
ขีณาสวานํ วิมลานํ, สนฺตจิตฺตาน ตาทินํฯ
[8]
โกฏิสตสหสฺสานํ, ปฐโม อาสิ สมาคโม;
ทุติโย โกฏิสหสฺสานํ, ตติโย นวุติโกฏินํฯ
[9]
อหํ เตน สมเยน, วิชิตาวี นาม ขตฺติโย;
สมุทฺทํ อนฺตมนฺเตน, อิสฺสริยํ วตฺตยามหํฯ
[10]
โกฏิสตสหสฺสานํ , วิมลานํ มเหสินํ;
สห โลกคฺคนาเถน, ปรมนฺเนน ตปฺปยิํฯ
[11]
โสปิ มํ พุทฺโธ พฺยากาสิ, โกณฺฑญฺโญ โลกนายโก;
‘‘อปริเมยฺยิโต กปฺเป, พุทฺโธ โลเก ภวิสฺสติฯ
[12]
‘‘ปธานํ ปทหิตฺวาน, กตฺวา ทุกฺกรการิกํ;
อสฺสตฺถมูเล สมฺพุทฺโธ, พุชฺฌิสฺสติ มหายโสฯ
[13]
‘‘อิมสฺส ชนิกา มาตา, มายา นาม ภวิสฺสติ;
ปิตา สุทฺโธทโน นาม, อยํ เหสฺสติ โคตโมฯ
[14]
‘‘โกลิโต อุปติสฺโส จ, อคฺคา เหสฺสนฺติ สาวกา;
อานนฺโท นามุปฏฺฐาโก, อุปฏฺฐิสฺสติมํ ชินํฯ
[15]
‘‘เขมา อุปฺปลวณฺณา จ, อคฺคา เหสฺสนฺติ สาวิกา;
โพธิ ตสฺส ภควโต, อสฺสตฺโถติ ปวุจฺจติฯ
[16]
‘‘จิตฺโต จ หตฺถาฬวโก, อคฺคา เหสฺสนฺตุปฏฺฐกา;
นนฺทมาตา จ อุตฺตรา, อคฺคา เหสฺสนฺตุปฏฺฐิกา;
อายุ วสฺสสตํ ตสฺส, โคตมสฺส ยสสฺสิโน’’ฯ
[17]
อิทํ สุตฺวาน วจนํ, อสมสฺส มเหสิโน;
อาโมทิตา นรมรู, พุทฺธพีชํ กิร อยํฯ
[18]
อุกฺกุฏฺฐิสทฺทา วตฺตนฺติ, อปฺโผเฏนฺติ หสนฺติ จ;
กตญฺชลี นมสฺสนฺติ, ทสสหสฺสิเทวตาฯ
[19]
‘‘ยทิมสฺส โลกนาถสฺส, วิรชฺฌิสฺสาม สาสนํ;
อนาคตมฺหิ อทฺธาเน, เหสฺสาม สมฺมุขา อิมํฯ
[20]
‘‘ยถา มนุสฺสา นทิํ ตรนฺตา, ปฏิติตฺถํ วิรชฺฌิย;
เหฏฺฐาติตฺเถ คเหตฺวาน, อุตฺตรนฺติ มหานทิํฯ
[21]
‘‘เอวเมว มยํ สพฺเพ, ยทิ มุญฺจามิมํ ชินํ;
อนาคตมฺหิ อทฺธาเน, เหสฺสาม สมฺมุขา อิมํ’’ฯ
[22]
ตสฺสาหํ วจนํ สุตฺวา, ภิยฺโย จิตฺตํ ปสาทยิํ;
ตเมว อตฺถํ สาเธนฺโต, มหารชฺชํ ชิเน อทํ;
มหารชฺชํ ททิตฺวาน [จชิตฺวา (สี.)], ปพฺพชิํ ตสฺส สนฺติเกฯ
[23]
สุตฺตนฺตํ วินยญฺจาปิ, นวงฺคํ สตฺถุสาสนํ;
สพฺพํ ปริยาปุณิตฺวาน, โสภยิํ ชินสาสนํฯ
[24]
ตตฺถปฺปมตฺโต วิหรนฺโต, นิสชฺชฏฺฐานจงฺกเม;
อภิญฺญาปารมิํ คนฺตฺวา, พฺรหฺมโลกมคญฺฉหํฯ
[25]
นครํ รมฺมวตี นาม, สุนนฺโท นาม ขตฺติโย;
สุชาตา นาม ชนิกา, โกณฺฑญฺญสฺส มเหสิโนฯ
[26]
ทสวสฺสสหสฺสานิ, อคารํ อชฺฌ โส วสิ [อคารมชฺเฌ จ โส วสิ (สฺยา.)];
สุจิ สุรุจิ สุโภ จ, ตโย ปาสาทมุตฺตมาฯ
[27]
ตีณิสตสหสฺสานิ, นาริโย สมลงฺกตา;
รุจิเทวี นาม นารี, วิชิตเสโน อตฺรโชฯ
[28]
นิมิตฺเต จตุโร ทิสฺวา, รถยาเนน นิกฺขมิ;
อนูนทสมาสานิ, ปธานํ ปทหี ชิโนฯ
[29]
พฺรหฺมุนา ยาจิโต สนฺโต, โกณฺฑญฺโญ ทฺวิปทุตฺตโม;
วตฺติ จกฺกํ มหาวีโร, เทวานํ นครุตฺตเมฯ
[30]
ภทฺโท เจว สุภทฺโท จ, อเหสุํ อคฺคสาวกา;
อนุรุทฺโธ นามุปฏฺฐาโก, โกณฺฑญฺญสฺส มเหสิโนฯ
[31]
ติสฺสา จ อุปติสฺสา จ, อเหสุํ อคฺคสาวิกา;
สาลกลฺยาณิโก โพธิ, โกณฺฑญฺญสฺส มเหสิโนฯ
[32]
โสโณ จ อุปโสโณ จ, อเหสุํ อคฺคุปฏฺฐกา;
นนฺทา เจว สิรีมา จ, อเหสุํ อคฺคุปฏฺฐิกาฯ
[33]
โส อฏฺฐาสีติ หตฺถานิ, อจฺจุคฺคโต มหามุนิ;
โสภเต อุฬุราชาว สูริโย มชฺฌนฺหิเก ยถาฯ
[34]
วสฺสสตสหสฺสานิ , อายุ วิชฺชติ ตาวเท;
ตาวตา ติฏฺฐมาโน โส, ตาเรสิ ชนตํ พหุํฯ
[35]
ขีณาสเวหิ วิมเลหิ, วิจิตฺตา อาสิ เมทนี;
ยถา คคนมุฬูหิ, เอวํ โส อุปโสภถฯ
[36]
เตปิ นาคา อปฺปเมยฺยา, อสงฺโขภา ทุราสทา;
วิชฺชุปาตํว ทสฺเสตฺวา, นิพฺพุตา เต มหายสาฯ
[37]
สา จ อตุลิยา ชินสฺส อิทฺธิ, ญาณปริภาวิโต จ สมาธิ;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
[38]
โกณฺฑญฺโญ ปวโร พุทฺโธ, จนฺทารามมฺหิ นิพฺพุโต;
ตตฺเถว เจติโย จิตฺโต, สตฺต โยชนมุสฺสิโตติฯ
โกณฺฑญฺญสฺส ภควโต วํโส ทุติโยฯ
5. มงฺคลพุทฺธวํโส
[1]
โกณฺฑญฺญสฺส อปเรน, มงฺคโล นาม นายโก;
ตมํ โลเก นิหนฺตฺวาน, ธมฺโมกฺกมภิธารยิฯ
[2]
อตุลาสิ ปภา ตสฺส, ชิเนหญฺเญหิ อุตฺตริํ;
จนฺทสูริยปภํ หนฺตฺวา, ทสสหสฺสี วิโรจติฯ
[3]
โสปิ พุทฺโธ ปกาเสสิ, จตุโร สจฺจวรุตฺตเม;
เต เต สจฺจรสํ ปีตฺวา, วิโนเทนฺติ มหาตมํฯ
[4]
ปตฺวาน โพธิมตุลํ, ปฐเม ธมฺมเทสเน;
โกฏิสตสหสฺสานํ, ธมฺมาภิสมโย อหุฯ
[5]