นิคมนกถา
เอตฺตาวตา คตา สิทฺธิํ, พุทฺธวํสสฺส วณฺณนา;
สุวณฺณปทวิญฺญาตวิจิตฺตนยโสภิตาฯ
โปราณฏฺฐกถามคฺคํ, ปาฬิอตฺถปฺปกาสกํ;
อาทาเยว กตา พุทฺธ-วํสสฺสฏฺฐกถา มยาฯ
ปปญฺจตฺถํ วิวชฺเชตฺวา, มธุรตฺถสฺส สพฺพโส;
สมฺปกาสนโต ตสฺมา, มธุรตฺถปฺปกาสินีฯ
กาวีรชลสมฺปาต-ปริปูตมหีตเล;
กาวีรปฏฺฏเน รมฺเม, นานานารินรากุเลฯ
การิเต กณฺหทาเสน, สณฺหวาเจน สาธุนา;
วิหาเร วิวิธาการ-จารุปาการโคปุเรฯ
ฉายาสลิลสมฺปนฺเน, ทสฺสนีเย มโนรเม;
หตทุชฺชนสมฺพาเธ, ปวิเวกสุเข สิเวฯ
ตตฺถ ปาจีนปาสาท-ตเล ปรมสีตเล;
วสตา พุทฺธวํสสฺส, มยา สํวณฺณนา กตาฯ
ยถา พุทฺธวํสสฺส สํวณฺณนายํ, คตา สาธุ สิทฺธิํ วินา อนฺตรายํ;
ตถา ธมฺมยุตฺตา ชนานํ วิตกฺกา, วินาวนฺตราเยน สิทฺธิํ วชนฺตุฯ
อิมํ พุทฺธวํสสฺส สํวณฺณนํ เม, กโรนฺเตน ยํ ปตฺถิตํ ปุญฺญชาตํ;
สทา ตสฺส เทวานุภาเวน โลโก, ธุวํ สนฺตมจฺจนฺตมตฺถํ ปยาตํฯ
วินสฺสนฺตุ โรคา มนุสฺเสสุ สพฺเพ, ปวสฺสนฺตุ เทวาปิ วสฺสนฺตกาเล;
สุขํ โหตุ นิจฺจํ วรํ นารกาปิ, ปิสาจาปยาตา ปิปาสา ภวนฺตุฯ
สุรา อจฺฉรานํ คณาทีหิ สทฺธิํ, จิรํ เทวโลเก สุขํ จานุโภนฺตุ;
จิรํ ฐาตุ ธมฺโม มุนินฺทสฺส โลเก, สุขํ โลกปาลา มหิํ ปาลยนฺตุฯ
ครูหิ คีตนาเมน, พุทฺธทตฺโตติ วิสฺสุโต;
เถโร กตฺวา อฏฺฐกถํ, มธุรตฺถวิลาสินิํฯ
โปตฺถกํ ฐปยิตฺเวมํ, ปรมฺปเร หิตาวหํ;
อจิรฏฺฐิตภาเวน, อโห มจฺจุวสํ คโตฯ
อิติ ภาณวารวเสน ฉพฺพีสติภาณวารา, คนฺถวเสน ปญฺจสตาธิกฉสหสฺสคนฺถา, อกฺขรวเสน ติสหสฺสาธิกานิ ทฺเวสตสหสฺสกฺขรานิฯ
อนฺตรายํ วินา เอสา, ยถา นิฏฺฐํ อุปาคตา;
ตถา สิชฺฌนฺตุ สงฺกปฺปา, สตฺตานํ ธมฺมนิสฺสิตาติฯ
อิติ มธุรตฺถวิลาสินี นาม
พุทฺธวํส-อฏฺฐกถา นิฏฺฐิตาฯ