นิคมนกถา

เอตฺตาวตา คตา สิทฺธิํ, พุทฺธวํสสฺส วณฺณนา;

สุวณฺณปทวิญฺญาตวิจิตฺตนยโสภิตาฯ

โปราณฏฺฐกถามคฺคํ, ปาฬิอตฺถปฺปกาสกํ;

อาทาเยว กตา พุทฺธ-วํสสฺสฏฺฐกถา มยาฯ

ปปญฺจตฺถํ วิวชฺเชตฺวา, มธุรตฺถสฺส สพฺพโส;

สมฺปกาสนโต ตสฺมา, มธุรตฺถปฺปกาสินีฯ

กาวีรชลสมฺปาต-ปริปูตมหีตเล;

กาวีรปฏฺฏเน รมฺเม, นานานารินรากุเลฯ

การิเต กณฺหทาเสน, สณฺหวาเจน สาธุนา;

วิหาเร วิวิธาการ-จารุปาการโคปุเรฯ

ฉายาสลิลสมฺปนฺเน, ทสฺสนีเย มโนรเม;

หตทุชฺชนสมฺพาเธ, ปวิเวกสุเข สิเวฯ

ตตฺถ ปาจีนปาสาท-ตเล ปรมสีตเล;

วสตา พุทฺธวํสสฺส, มยา สํวณฺณนา กตาฯ

ยถา พุทฺธวํสสฺส สํวณฺณนายํ, คตา สาธุ สิทฺธิํ วินา อนฺตรายํ;

ตถา ธมฺมยุตฺตา ชนานํ วิตกฺกา, วินาวนฺตราเยน สิทฺธิํ วชนฺตุฯ

อิมํ พุทฺธวํสสฺส สํวณฺณนํ เม, กโรนฺเตน ยํ ปตฺถิตํ ปุญฺญชาตํ;

สทา ตสฺส เทวานุภาเวน โลโก, ธุวํ สนฺตมจฺจนฺตมตฺถํ ปยาตํฯ