4. เอกาสนิยตฺเถรอปทานวณฺณนา
วรุโณ นาม นาเมนาติอาทิกํ อายสฺมโต เอกาสนิยตฺเถรสฺส อปทานํฯ อยมฺปิ ปุริมพุทฺเธสุ กตาธิกาโร ตตฺถ ตตฺถ ภเว วิวฏฺฏูปนิสฺสยานิ ปุญฺญานิ อุปจินนฺโต อตฺถทสฺสิสฺส ภควโต กาเล วรุโณ นาม เทวราชา หุตฺวา นิพฺพตฺติฯ โส ภควนฺตํ ทิสฺวา ปสนฺนมานโส คนฺธมาลาทีหิ คีตวาทิเตหิ จ อุปฏฺฐยมาโน สปริวาโร ปูเชสิฯ ตโต อปรภาเค ภควติ ปรินิพฺพุเต ตสฺส มหาโพธิรุกฺขํ พุทฺธทสฺสนํ วิย สพฺพตูริยตาฬาวจเรหิ สปริวาโร อุปหารมกาสิฯ โส เตน ปุญฺเญน ตโต กาลงฺกตฺวา นิมฺมานรติเทวโลเก อุปฺปชฺชิฯ เอวํ เทวสมฺปตฺติมนุภวิตฺวา มนุสฺเสสุ จ มนุสฺสภูโต จกฺกวตฺติสมฺปตฺติํ อนุภวิตฺวา อิมสฺมิํ พุทฺธุปฺปาเท กุลเคเห นิพฺพตฺโต วิญฺญุตํ ปตฺวา สตฺถุ สาสเน ปพฺพชิตฺวา นจิรสฺเสว อรหา อโหสิฯ
[31] โส ปจฺฉา สกกมฺมํ สริตฺวา ตํ ตถโต ญตฺวา โสมนสฺสชาโต ปุพฺพจริตาปทานํ ปกาเสนฺโต วรุโณ นาม นาเมนาติอาทิมาหฯ ตตฺถ ยทา อหํ สมฺโพธนตฺถาย พุทฺธํ โพธิญฺจ ปูเชสิํ, ตทา วรุโณ นาม เทวราชา อโหสินฺติ สมฺพนฺโธฯ
[34] ธรณีรุหปาทปนฺติ เอตฺถ รุกฺขลตาปพฺพตสตฺถรตนาทโย ธาเรตีติ ธรณี, ตสฺมิํ รุหติ ปติฏฺฐหตีติ ธรณีรุโหฯ ปาเทน ปิวตีติ ปาทโป, สิญฺจิตสิญฺจิโตทกํ ปาเทน มูเลน ปิวติ รุกฺขกฺขนฺธสาขาวิฏเปหิ อาโปรสํ ปตฺถริยตีติ อตฺโถ, ตํ ธรณีรุหปาทปํ โพธิรุกฺขนฺติ สมฺพนฺโธฯ
[35] สกกมฺมาภิรทฺโธติ อตฺตโน กุสลกมฺเมน อภิรทฺโธ ปสนฺโน อุตฺตเม โพธิมฺหิ ปสนฺโนติ สมฺพนฺโธฯ เสสํ สพฺพตฺถ อุตฺตานเมวาติฯ
เอกาสนิยตฺเถรอปทานวณฺณนา สมตฺตาฯ