เมนู

9. ปฐมมรณสฺสติสุตฺตวณฺณนา

[19] นวเม นาติเกติ เอวํนามเก คาเมฯ คิญฺชกาวสเถติ อิฏฺฐกามเย ปาสาเทฯ อมโตคธาติ นิพฺพาโนคธา, นิพฺพานปติฏฺฐาติ อตฺโถฯ ภาเวถ โนติ ภาเวถ นุฯ มรณสฺสตินฺติ มรณสฺสติกมฺมฏฺฐานํฯ อโห วตาติ ปตฺถนตฺเถ นิปาโตฯ พหุํ วต เม กตํ อสฺสาติ ตุมฺหากํ สาสเน มม กิจฺจํ พหุ กตํ อสฺสฯ ตทนฺตรนฺติ ตํ อนฺตรํ ขณํ โอกาสํฯ อสฺสสิตฺวา วา ปสฺสสามีติ เอตฺถ อสฺสาโส วุจฺจติ อนฺโต ปวิสนวาโต, ปสฺสาโส พหิ นิกฺขมนวาโตฯ อิติ อยํ ภิกฺขุ ยาว อนฺโต ปวิฏฺฐวาโต พหิ นิกฺขมติ, พหิ นิกฺขนฺโต วาโต อนฺโต ปวิสติ, ตาว ชีวิตํ ปตฺเถนฺโต เอวมาหฯ ทนฺธนฺติ มนฺทํ ครุกํ อสีฆปฺปวตฺตํฯ อาสวานํ ขยายาติ อรหตฺตผลตฺถายฯ อิมสฺมิํ สุตฺเต มรณสฺสติ อรหตฺตํ ปาเปตฺวา กถิตาติฯ

10. ทุติยมรณสฺสติสุตฺตวณฺณนา

[20] ทสเม ปติคตายาติ ปฏิปนฺนายฯ อิติ ปฏิสญฺจิกฺขตีติ เอวํ ปจฺจเวกฺขติฯ โส มมสฺส อนฺตราโยติ เอตฺถ ติวิโธ อนฺตราโย ชีวิตนฺตราโย, สมณธมฺมนฺตราโย, ปุถุชฺชนกาลกิริยํ กโรนฺตสฺส สคฺคนฺตราโย เจว มคฺคนฺตราโย จาติฯ ตํ สพฺพมฺปิ สนฺธาเยวมาหฯ พฺยาปชฺเชยฺยาติ อชิณฺณกาทิวเสน วิปชฺเชยฺยฯ อธิมตฺโตติ พลวาฯ ฉนฺโทติ กตฺตุกมฺยตาฉนฺโทฯ วายาโมติ ปโยควีริยํฯ อุสฺสาโหติ อุสฺสาปนวีริยํฯ อุสฺโสฬฺหีติ สมฺปาทนวีริยํฯ อปฺปฏิวานีติ อนุกฺกณฺฐนา อปฺปฏิสงฺฆรณาฯ เสสํ สพฺพตฺถ อุตฺตานตฺถเมวาติฯ

สารณียวคฺโค ทุติโยฯ

3. อนุตฺตริยวคฺโค

1-2. สามกสุตฺตาทิวณฺณนา

[21-22] ตติยสฺส ปฐเม สามคามเกติ สามกานํ อุสฺสนฺนตฺตา เอวํลทฺธนาเม คามเกฯ โปกฺขรณิยายนฺติ โปกฺขรณิยานามเก วิหาเรฯ อภิกฺกนฺตาย รตฺติยาติ รตฺติยา ปฐมยามํ อติกฺกมฺม มชฺฌิมยาเม สมฺปตฺเตฯ อภิกฺกนฺตวณฺณาติ อภิกฺกนฺตอติมนาปวณฺณาฯ เกวลกปฺปนฺติ สกลกปฺปํฯ โปกฺขรณิยํ โอภาเสตฺวาติ โปกฺขรณิยานามกํ มหาวิหารํ อตฺตโน โอภาเสน ผริตฺวาฯ สมนุญฺโญติ สมานอนุญฺโญ สมานจิตฺโตฯ โทวจสฺสตาติ ทุพฺพจภาโวฯ ปาปมิตฺตตาติ ลามกมิตฺตตา ฯ อิมสฺมิํ สุตฺเต ปริหานิยธมฺมาว กถิตาฯ ทุติเย อปริหานิยธมฺมา โลกุตฺตรมิสฺสกา กถิตาฯ

3. ภยสุตฺตวณฺณนา

[23] ตติเย กามราครตฺตายนฺติ กามราครตฺโต อยํฯ ฉนฺทราควินิพทฺโธติ ฉนฺทราเคน วินิพทฺโธฯ ภยาติ จิตฺตุตฺราสภยาฯ ปงฺกาติ กิเลสปงฺกโตฯ สงฺโค ปงฺโก จ อุภยนฺติ สงฺโค จ ปงฺโก จ อิทมฺปิ อุภยํฯ เอเต กามา ปวุจฺจนฺติ, ยตฺถ สตฺโต ปุถุชฺชโนติ ยสฺมิํ สงฺเค จ ปงฺเก จ ปุถุชฺชโน สตฺโต ลคฺโค ลคฺคิโต ปลิพุทฺโธฯ อุปาทาเนติ จตุพฺพิเธ อุปาทาเนฯ ชาติมรณสมฺภเวติ ชาติยา จ มรณสฺส จ สมฺภเว ปจฺจยภูเตฯ อนุปาทา วิมุจฺจนฺตีติ อนุปาทิยิตฺวา วิมุจฺจนฺติฯ ชาติมรณสงฺขเยติ ชาติมรณานํ สงฺขยสงฺขาเต นิพฺพาเน, นิพฺพานารมฺมณาย วิมุตฺติยา วิมุจฺจนฺตีติ อตฺโถฯ อิมสฺมิํ ฐาเน วิวฏฺเฏตฺวา อรหตฺตเมว ปตฺโต เอส ภิกฺขุฯ อิทานิ ตํ ขีณาสวํ โถเมนฺโต เต เขมปฺปตฺตาติอาทิมาหฯ ตตฺถ เขมปฺปตฺตาติ เขมภาวํ ปตฺตาฯ สุขิโนติ โลกุตฺตรสุเขน สุขิตาฯ ทิฏฺฐธมฺมาภินิพฺพุตาติ อพฺภนฺตเร กิเลสาภาเวน ทิฏฺฐธมฺเมเยว อภินิพฺพุตาฯ อิมสฺมิํ สุตฺเต วฏฺฏเมว กเถตฺวา คาถาสุ วฏฺฏวิวฏํ กถิตํฯ