7. สีลวนฺตสุตฺตวณฺณนา

[87] สตฺตมํ อุตฺตานตฺถเมวฯ สีลํ ปเนตฺถ ขีณาสวสีลเมว, พาหุสจฺจมฺปิ ขีณาสวพาหุสจฺจเมว, วาจาปิ ขีณาสวสฺส กลฺยาณวาจาว, ฌานานิปิ กิริยชฺฌานาเนว กถิตานีติ เวทิตพฺพานิฯ

8. เถรสุตฺตวณฺณนา

[88] อฏฺฐเม เถโรติ ถิรภาวปฺปตฺโตฯ รตฺตญฺญูติ ปพฺพชิตทิวสโต ปฏฺฐาย อติกฺกนฺตานํ พหูนํ รตฺตีนํ ญาตาฯ ญาโตติ ปญฺญาโต ปากโฏฯ ยสสฺสีติ ยสนิสฺสิโตฯ มิจฺฉาทิฏฺฐิโกติ อยาถาวทิฏฺฐิโกฯ สทฺธมฺมา วุฏฺฐาเปตฺวาติ ทสกุสลกมฺมปถธมฺมโต วุฏฺฐาเปตฺวาฯ อสทฺธมฺเม ปติฏฺฐาเปตีติ อกุสลกมฺมปเถสุ ปติฏฺฐาเปติฯ

9. ปฐมเสขสุตฺตวณฺณนา

[89] นวเม เสขสฺสาติ สิกฺขกสฺส สกรณียสฺสฯ ปริหานายาติ อุปริคุเณหิ ปริหานตฺถายฯ กมฺมารามตาติ นวกมฺเม รมนกภาโวฯ ภสฺสารามตาติ อาลาปสลฺลาเป รมนกภาโวฯ นิทฺทารามตาติ นิทฺทายเน รมนกภาโวฯ สงฺคณิการามตาติ คณสงฺคณิกาย รมนกภาโวฯ ยถาวิมุตฺตํ จิตฺตํ น ปจฺจเวกฺขตีติ ยถา ยํ จิตฺตํ วิมุตฺตํ, เย จ โทสา ปหีนา, คุณา จ ปฏิลทฺธา, เต ปจฺจเวกฺขิตฺวา อุปริคุณปฏิลาภาย วายามํ น กโรตีติ อตฺโถฯ อิติ อิมสฺมิํ สุตฺเต สตฺตนฺนํ เสขานํ อุปริคุเณหิ ปริหานิการณญฺจ วุทฺธิการณญฺจ กถิตํฯ ยญฺจ นาม เสขสฺส ปริหานการณํ, ตํ ปุถุชฺชนสฺส ปฐมเมว โหตีติฯ

10. ทุติยเสขสุตฺตวณฺณนา

[90] ทสเม วิยตฺโตติ พฺยตฺโต เฉโกฯ กิํกรณีเยสูติ อิติ กตฺตพฺเพสุฯ เจโตสมถนฺติ สมาธิกมฺมฏฺฐานํฯ อนนุโลมิเกนาติ สาสนสฺส อนนุจฺฉวิเกนฯ อติกาเลนาติ อติปาโตวฯ อติทิวาติ ทิวา วุจฺจติ มชฺฌนฺหิโก, ตํ อติกฺกมิตฺวาฯ อาภิสลฺเลขิกาติ อติวิย กิเลสสลฺเลขิกาฯ เจโตวิวรณสปฺปายาติ จิตฺตวิวรณสงฺขาตานํ สมถวิปสฺสนานํ สปฺปายาฯ อปฺปิจฺฉกถาติ อปฺปิจฺฉา โหถาติ กถนกถาฯ สนฺตุฏฺฐิกถาติ จตูหิ ปจฺจเยหิ สนฺตุฏฺฐา โหถาติ กถนกถาฯ ปวิเวกกถาติ ตีหิ วิเวเกหิ วิวิตฺตา โหถาติ กถนกถาฯ อสํสคฺคกถาติ ปญฺจวิเธน สํสคฺเคน อสํสฏฺฐา โหถาติ กถนกถาฯ วีริยารมฺภกถาติ ทุวิธํ วีริยํ อารภถาติ กถนกถาฯ สีลกถาทีสุ สีลํ อารพฺภ กถา สีลกถาฯ สมาธิํ อารพฺภ, ปญฺญํ อารพฺภ, ปญฺจวิธํ วิมุตฺติํ อารพฺภ, เอกูนวีสติปจฺจเวกฺขณสงฺขาตํ วิมุตฺติญาณทสฺสนํ อารพฺภ กถา วิมุตฺติญาณทสฺสนกถาฯ น นิกามลาภีติอาทีสุ น อิจฺฉิติจฺฉิตลาภี, ทุกฺขลาภี น วิปุลลาภีติ อตฺโถฯ เสสํ อุตฺตานตฺถเมวาติฯ

เถรวคฺโค จตุตฺโถฯ

(10) 5. กกุธวคฺโค

1-2. สมฺปทาสุตฺตทฺวยวณฺณนา

[91-92] ปญฺจมสฺส ปฐเม ปญฺจ สมฺปทา มิสฺสิกา กถิตาฯ ทุติเย ปุริมา จตสฺโส มิสฺสิกา, ปญฺจมี โลกิกาวฯ

3. พฺยากรณสุตฺตวณฺณนา

[93] ตติเย อญฺญาพฺยากรณานีติ อรหตฺตพฺยากรณานิฯ มนฺทตฺตาติ มนฺทภาเวน อญฺญาเณนฯ โมมูหตฺตาติ อติมูฬฺหภาเวนฯ อญฺญํ พฺยากโรตีติ อรหตฺตํ ปตฺโตสฺมีติ กเถติฯ อิจฺฉาปกโตติ อิจฺฉาย อภิภูโตฯ อธิมาเนนาติ อธิคตมาเนนฯ สมฺมเทวาติ เหตุนา นเยน การเณเนวฯ

4-5. ผาสุวิหารสุตฺตาทิวณฺณนา

[94-95] จตุตฺเถ ผาสุวิหาราติ สุขวิหาราฯ ปญฺจเม อกุปฺปนฺติ อรหตฺตํฯ