เมนู

9. ตติยอนาคตภยสุตฺตวณฺณนา

[79] นวเม ธมฺมสนฺโทสา วินยสนฺโทโสติ ธมฺมสนฺโทเสน วินยสนฺโทโส โหติฯ กถํ ปน ธมฺมสฺมิํ ทุสฺสนฺเต วินโย ทุสฺสติ นาม? สมถวิปสฺสนาธมฺเมสุ คพฺภํ อคฺคณฺหนฺเตสุ ปญฺจวิโธ วินโย น โหติ , เอวํ ธมฺเม ทุสฺสนฺเต วินโย ทุสฺสติฯ ทุสฺสีลสฺส ปน สํวรวินโย นาม น โหติ, ตสฺมิํ อสติ สมถวิปสฺสนา คพฺภํ น คณฺหาติฯ เอวํ วินยสนฺโทเสนปิ ธมฺมสนฺโทโส เวทิตพฺโพฯ อภิธมฺมกถนฺติ สีลาทิอุตฺตมธมฺมกถํฯ เวทลฺลกถนฺติ เวทปฏิสํยุตฺตํ ญาณมิสฺสกกถํฯ กณฺหธมฺมํ โอกฺกมมานาติ รนฺธคเวสิตาย อุปารมฺภปริเยสนวเสน กาฬกธมฺมํ โอกฺกมมานาฯ อปิจ ทุฏฺฐจิตฺเตน ปุคฺคลํ ฆฏฺเฏนฺตาปิ ตํ กณฺหธมฺมํ อตฺตโน ทหนฺตาปิ ลาภสกฺการตฺถํ กเถนฺตาปิ กณฺหธมฺมํ โอกฺกมนฺติเยวฯ

คมฺภีราติ ปาฬิคมฺภีราฯ คมฺภีรตฺถาติ อตฺถคมฺภีราฯ โลกุตฺตราติ โลกุตฺตรธมฺมทีปกาฯ สุญฺญตาปฏิสํยุตฺตาติ ขนฺธธาตุอายตนปจฺจยาการปฏิสํยุตฺตาฯ น อญฺญา จิตฺตํ อุปฏฺฐเปสฺสนฺตีติ ชานนตฺถาย จิตฺตํ น ฐเปสฺสนฺติฯ อุคฺคเหตพฺพํ ปริยาปุณิตพฺพนฺติ อุคฺคเหตพฺเพ จ วฬญฺเชตพฺเพ จฯ กวิตาติ สิโลกาทิพนฺธนวเสน กวีหิ กตาฯ กาเวยฺยาติ ตสฺเสว เววจนํฯ พาหิรกาติ สาสนโต พหิทฺธา ฐิตาฯ สาวกภาสิตาติ พาหิรสาวเกหิ ภาสิตาฯ เสสเมตฺถ เหฏฺฐา วุตฺตนยตฺตา สุวิญฺเญยฺยตฺตา จ อุตฺตานตฺถเมวฯ

10. จตุตฺถอนาคตภยสุตฺตวณฺณนา

[80] ทสเม กลฺยาณกามาติ สุนฺทรกามาฯ รสคฺคานีติ อุตฺตมรสานิฯ สํสฏฺฐา วิหริสฺสนฺตีติ ปญฺจวิเธน สํสคฺเคน สํสฏฺฐา วิหริสฺสนฺติฯ สนฺนิธิการปริโภคนฺติ สนฺนิธิกตสฺส ปริโภคํฯ โอฬาริกมฺปิ นิมิตฺตนฺติ เอตฺถ ปถวิํ ขณนฺโตปิ ขณาหีติ อาณาเปนฺโตปิ ปถวิยํ โอฬาริกํ นิมิตฺตํ กโรติ นามฯ ติณกฏฺฐสาขาปลาสํ ฉินฺทนฺโตปิ ฉินฺทาติ อาณาเปนฺโตปิ หริตคฺเค โอฬาริกํ นิมิตฺตํ กโรติ นามฯ อาชีวตฺถาย ปณฺณนิวาปอาทีนิ คาหาเปนฺโต ผลานิ โอจินนฺเต วา โอจินาเปนฺเตน วตฺตพฺพเมว นตฺถิฯ อิเมสุ จตูสุ สุตฺเตสุ สตฺถารา สาสเน วุทฺธิปริหานิ กถิตาติฯ

โยธาชีววคฺโค ตติโยฯ

(9) 4. เถรวคฺโค

1. รชนียสุตฺตวณฺณนา

[81] จตุตฺถสฺส ปฐเม รชนีเยสูติ ราคสฺส ปจฺจเยสุ อารมฺมเณสุฯ เสเสสุปิ เอเสว นโยฯ

2. วีตราคสุตฺตวณฺณนา

[82] ทุติเย มกฺขีติ คุณมกฺขโกฯ ปฬาสีติ ยุคคฺคาหลกฺขเณน ปฬาเสน สมนฺนาคโตฯ

3. กุหกสุตฺตวณฺณนา

[83] ตติเย กุหโกติ ตีหิ กุหนวตฺถูหิ สมนฺนาคโตฯ ลปโกติ ลาภสนฺนิสฺสิตาย ลปนาย สมนฺนาคโตฯ เนมิตฺติโกติ นิมิตฺตกิริยการโกฯ นิปฺเปสิโกติ นิปฺเปสนกตาย สมนฺนาคโตฯ ลาเภน จ ลาภํ นิชิคีสิตาติ ลาเภน ลาภคเวสโกฯ สุกฺกปกฺโข วุตฺตวิปลฺลาสวเสน เวทิตพฺโพฯ จตุตฺถํ อุตฺตานเมวฯ

5. อกฺขมสุตฺตวณฺณนา

[85] ปญฺจเม อกฺขโม โหติ รูปานนฺติ รูปารมฺมณานํ อนธิวาสโก โหติ, ตทารมฺมเณหิ ราคาทีหิ อภิภุยฺยติฯ เอเสว นโย สพฺพตฺถฯ

6. ปฏิสมฺภิทาปฺปตฺตสุตฺตวณฺณนา

[86] ฉฏฺเฐ อตฺถปฏิสมฺภิทาปฺปตฺโตติ ปญฺจสุ อตฺเถสุ ปเภทคตํ ญาณํ ปตฺโตฯ ธมฺมปฏิสมฺภิทาปฺปตฺโตติ จตุพฺพิเธ ธมฺเม ปเภทคตํ ญาณํ ปตฺโตฯ นิรุตฺติปฏิสมฺภิทาปฺปตฺโตติ ธมฺมนิรุตฺตีสุ ปเภทคตํ ญาณํ ปตฺโตฯ ปฏิภานปฏิสมฺภิทาปฺปตฺโตติ เตสุ ตีสุ ญาเณสุ ปเภทคตํ ญาณํ ปตฺโตฯ โส ปน ตานิ ตีณิ ญาณาเนว ชานาติ, น เตสํ กิจฺจํ กโรติฯ อุจฺจาวจานีติ มหนฺตขุทฺทกานิฯ กิํกรณียานีติ อิติ กตฺตพฺพานิฯ