อธุตฺตีติ ปุริสธุตฺตสุราธุตฺตตาวเสน อธุตฺติโยฯ อเถนีติ อเถนิโย อโจริโยฯ อโสณฺฑีติ สุราโสณฺฑตาทิวเสน อโสณฺฑิโยฯ

เอวํ สุตฺตนฺตํ นิฏฺฐเปตฺวา อิทานิ คาถาหิ กูฏํ คณฺหนฺโต โย นํ ภรติ สพฺพทาติอาทิมาหฯ ตตฺถ ภรตีติ โปสติ ปฏิชคฺคติฯ สพฺพกามหรนฺติ สพฺพกามททํฯ โสตฺถีติ สุอิตฺถีฯ เอวํ วตฺตตีติ เอตฺตกํ วตฺตํ ปูเรตฺวา วตฺตติฯ มนาปา นาม เต เทวาติ นิมฺมานรตี เทวาฯ เต หิ อิจฺฉิติจฺฉิตํ รูปํ มาเปตฺวา อภิรมณโต นิมฺมานรตีติ จ มนาปาติ จ วุจฺจนฺตีติฯ

4. สีหเสนาปติสุตฺตวณฺณนา

[34] จตุตฺเถ สนฺทิฏฺฐิกนฺติ สามํ ปสฺสิตพฺพกํฯ ทายโกติ ทานสูโรฯ น โส สทฺธามตฺตเกเนว ติฏฺฐติ, ปริจฺจชิตุมฺปิ สกฺโกตีติ อตฺโถฯ ทานปตีติ ยํ ทานํ เทติ, ตสฺส ปติ หุตฺวา เทติ, น ทาโส, น สหาโยฯ โย หิ อตฺตนา มธุรํ ภุญฺชติ, ปเรสํ อมธุรํ เทติ, โส ทานสงฺขาตสฺส เทยฺยธมฺมสฺส ทาโส หุตฺวา เทติฯ โย ยํ อตฺตนา ภุญฺชติ, ตเทว เทติ, โส สหาโย หุตฺวา เทติฯ โย ปน อตฺตนา เยน เกนจิ ยาเปติ, ปเรสํ มธุรํ เทติ, โส ปติ เชฏฺฐโก สามี หุตฺวา เทติฯ ตาทิสํ สนฺธาย วุตฺตํ – ‘‘ทานปตี’’ติฯ

อมงฺกุภูโตติ น นิตฺเตชภูโตฯ วิสารโทติ ญาณโสมนสฺสปฺปตฺโตฯ สหพฺยตํ คตาติ สหภาวํ เอกีภาวํ คตาฯ กตาวกาสาติ เยน กมฺเมน ตตฺถ อวกาโส โหติ, ตสฺส กตตฺตา กตาวกาสาฯ ตํ ปน ยสฺมา กุสลเมว โหติ, ตสฺมา กตกุสลาติ วุตฺตํฯ โมทเรติ โมทนฺติ ปโมทนฺติฯ อสิตสฺสาติ อนิสฺสิตสฺส ตถาคตสฺสฯ ตาทิโนติ ตาทิลกฺขณํ ปตฺตสฺสฯ

5. ทานานิสํสสุตฺตวณฺณนา

[35] ปญฺจเม คิหิธมฺมา อนปคโต โหตีติ อขณฺฑปญฺจสีโล โหติฯ สตํ ธมฺมํ อนุกฺกมนฺติ สปฺปุริสานํ มหาปุริสานํ ธมฺมํ อนุกฺกมนฺโต ฯ สนฺโต นํ ภชนฺตีติ สปฺปุริสา พุทฺธปจฺเจกพุทฺธตถาคตสาวกา เอตํ ภชนฺติฯ

6. กาลทานสุตฺตวณฺณนา

[36] ฉฏฺเฐ กาลทานานีติ ยุตฺตทานานิ, ปตฺตทานานิ อนุจฺฉวิกทานานีติ อตฺโถฯ นวสสฺสานีติ อคฺคสสฺสานิฯ นวผลานีติ อารามโต ปฐมุปฺปนฺนานิ อคฺคผลานิฯ ปฐมํ สีลวนฺเตสุ ปติฏฺฐาเปตีติ ปฐมํ สีลวนฺตานํ ทตฺวา ปจฺฉา อตฺตนา ปริภุญฺชติฯ วทญฺญูติ ภาสิตญฺญูฯ กาเลน ทินฺนนฺติ ยุตฺตปฺปตฺตกาเลน ทินฺนํฯ อนุโมทนฺตีติ เอกมนฺเต ฐิตา อนุโมทนฺติฯ เวยฺยาวจฺจนฺติ กาเยน เวยฺยาวฏิกกมฺมํ กโรนฺติฯ อปฺปฏิวานจิตฺโตติ อนุกฺกณฺฐิตจิตฺโตฯ ยตฺถ ทินฺนํ มหปฺผลนฺติ ยสฺมิํ ฐาเน ทินฺนํ มหปฺผลํ โหติ, ตตฺถ ทเทยฺยฯ

7. โภชนสุตฺตวณฺณนา

[37] สตฺตเม อายุํ เทตีติ อายุทานํ เทติฯ วณฺณนฺติ สรีรวณฺณํฯ สุขนฺติ กายิกเจตสิกสุขํฯ พลนฺติ สรีรถามํฯ ปฏิภานนฺติ ยุตฺตมุตฺตปฺปฏิภานํฯ

8. สทฺธสุตฺตวณฺณนา

[38] อฏฺฐเม อนุกมฺปนฺตีติ อนุคฺคณฺหนฺติฯ ขนฺธิมาว มหาทุโมติ ขนฺธสมฺปนฺโน มหารุกฺโข วิยฯ มโนรเม อายตเนติ รมณีเย สโมสรณฏฺฐาเนฯ ฉายํ ฉายตฺถิกา ยนฺตีติ ฉายาย อตฺถิกาว ฉายํ อุปคจฺฉนฺติฯ นิวาตวุตฺตินฺติ นีจวุตฺติํฯ อตฺถทฺธนฺติ โกธมานถทฺธตาย รหิตํฯ โสรตนฺติ โสรจฺเจน สุจิสีเลน สมนฺนาคตํฯ สขิลนฺติ สมฺโมทกํฯ