2. ทุติยวินยธรสุตฺตวณฺณนา

[76] ทุติเย สฺวาคตานีติ สุอาคตานิ สุปฺปคุณานิฯ สุวิภตฺตานีติ โกฏฺฐาสโต สุฏฺฐุ วิภตฺตานิ ฯ สุปฺปวตฺตีนีติ อาวชฺชิตาวชฺชิตฏฺฐาเน สุฏฺฐุ ปวตฺตานิ ทฬฺหปฺปคุณานิฯ สุวินิจฺฉิตานีติ สุฏฺฐุ วินิจฺฉิตานิฯ สุตฺตโสติ วิภงฺคโตฯ อนุพฺยญฺชนโสติ ขนฺธกปริวารโตฯ

3. ตติยวินยธรสุตฺตวณฺณนา

[77] ตติเย วินเย โข ปน ฐิโต โหตีติ วินยลกฺขเณ ปติฏฺฐิโต โหติฯ อสํหีโรติ น สกฺกา โหติ คหิตคฺคหณํ วิสฺสชฺชาเปตุํฯ

9. สตฺถุสาสนสุตฺตวณฺณนา

[83] นวเม เอโกติ อทุติโยฯ วูปกฏฺโฐติ กาเยน คณโต, จิตฺเตน กิเลเสหิ วูปกฏฺโฐ วิเวกฏฺโฐ ทูรีภูโตฯ อปฺปมตฺโตติ สติอวิปฺปวาเส ฐิโตฯ ปหิตตฺโตติ เปสิตตฺโตฯ นิพฺพิทายาติ วฏฺเฏ อุกฺกณฺฐนตฺถายฯ วิราคายาติ ราคาทีนํ วิรชฺชนตฺถายฯ นิโรธายาติ อปฺปวตฺติกรณตฺถายฯ วูปสมายาติ กิเลสวูปสมาย อปฺปวตฺติยาฯ อภิญฺญายาติ ติลกฺขณํ อาโรเปตฺวา อภิชานนตฺถายฯ สมฺโพธายาติ มคฺคสงฺขาตสฺส สมฺโพธสฺส อตฺถายฯ นิพฺพานายาติ นิพฺพานสฺส สจฺฉิกรณตฺถายฯ

10. อธิกรณสมถสุตฺตวณฺณนา

[84] ทสเม อธิกรณานิ สเมนฺติ วูปสเมนฺตีติ อธิกรณสมถาฯ อุปฺปนฺนุปฺปนฺนานนฺติ อุปฺปนฺนานํ อุปฺปนฺนานํฯ อธิกรณานนฺติ วิวาทาธิกรณํ อนุวาทาธิกรณํ อาปตฺตาธิกรณํ กิจฺจาธิกรณนฺติ อิเมสํ จตุนฺนํฯ สมถาย วูปสมายาติ สมถตฺถญฺเจว วูปสมนตฺถญฺจฯ สมฺมุขาวินโย ทาตพฺโพ…เป.… ติณวตฺถารโกติ อิเม สตฺต สมถา ทาตพฺพาฯ เตสํ วินิจฺฉโย วินยสํวณฺณนโต (จูฬว. อฏฺฐ. 186-187 อาทโย) คเหตพฺโพฯ อปิจ ทีฆนิกาเย สงฺคีติสุตฺตวณฺณนายมฺปิ (ที. นิ. อฏฺฐ. 3.331 อธิกรณสมถสตฺตกวณฺณนา) วิตฺถาริโตเยว, ตถา มชฺฌิมนิกาเย สามคามสุตฺตวณฺณนายาติ (ม. นิ. อฏฺฐ. 3.46)ฯ

วินยวคฺโค อฏฺฐโมฯ

อิโต ปรานิ สตฺต สุตฺตานิ อุตฺตานตฺถาเนวฯ น เหตฺถ กิญฺจิ เหฏฺฐา อวุตฺตนยํ นาม อตฺถีติฯ

มโนรถปูรณิยา องฺคุตฺตรนิกาย-อฏฺฐกถาย

สตฺตกนิปาตสฺส สํวณฺณนา นิฏฺฐิตาฯ