เมนู

8. อคฺคิกฺขนฺโธปมสุตฺตวณฺณนา

[72] อฏฺฐมํ อตฺถุปฺปตฺติยํ กถิตํฯ อตฺถุปฺปตฺติ ปนสฺส เหฏฺฐา จูฬจฺฉราสงฺฆาตสุตฺตวณฺณนาย (อ. นิ. อฏฺฐ. 1.1.51 อาทโย) วิตฺถาริตา เอวฯ ปสฺสถ โนติ ปสฺสถ นุฯ อาลิงฺคิตฺวาติ อุปคูหิตฺวาฯ อุปนิสีเทยฺยาติ สมีเป นิสฺสาย นิสีเทยฺยฯ อุปนิปชฺเชยฺยาติ อุปคนฺตฺวา นิปชฺเชยฺยฯ อาโรจยามีติ อาจิกฺขามิฯ ปฏิเวทยามีติ ปฏิเวเทตฺวา ชานาเปตฺวา กเถมิฯ วาลรชฺชุยาติ อสฺสวาลโควาเลหิ วฏฺฏิตรชฺชุยาฯ ปจฺโจรสฺมินฺติ อุรมชฺเฌฯ เผณุทฺเทหกนฺติ เผณํ อุทฺเทหิตฺวา, อุสฺสาเทตฺวาติ อตฺโถฯ อตฺตตฺถนฺติ อตฺตโน ทิฏฺฐธมฺมิกสมฺปรายิกโลกิยโลกุตฺตรํ อตฺถํฯ ปรตฺโถภยตฺเถสุปิ เอเสว นโยฯ เสสเมตฺถ ยํ วตฺตพฺพํ สิยา, ตํ สพฺพํ จูฬจฺฉราสงฺฆาตสุตฺตสฺส (อ. นิ. 1.51 อาทโย) อตฺถุปฺปตฺติยํ กถิตเมวฯ อิทญฺจ ปน สุตฺตํ กเถตฺวา สตฺถา จูฬจฺฉราสงฺฆาตสุตฺตํ กเถสิฯ นวมํ อุตฺตานตฺถเมวฯ

10. อรกสุตฺตวณฺณนา

[74] ทสเม ปริตฺตนฺติ อปฺปํ โถกํฯ ตญฺหิ สรสปริตฺตตายปิ ขณปริตฺตตายปิ ฐิติปริตฺตตายปิ ปริตฺตเมวฯ ลหุํ อุปฺปชฺชิตฺวา นิรุชฺฌนโต ลหุกํฯ มนฺตายํ โพทฺธพฺพนฺติ มนฺตาย โพทฺธพฺพํ, ปญฺญาย ชานิตพฺพนฺติ อตฺโถฯ ปพฺพเตยฺยาติ ปพฺพตสมฺภวาฯ หารหารินีติ รุกฺขนฬเวฬุอาทีนิ หริตพฺพานิ หริตุํ สมตฺถาฯ เสสํ สพฺพตฺถ อุตฺตานตฺถเมวาติฯ

มหาวคฺโค สตฺตโมฯ

8. วินยวคฺโค

1. ปฐมวินยธรสุตฺตวณฺณนา

[75] อฏฺฐมสฺส ปฐเม อาปตฺติํ ชานาตีติ อาปตฺติํเยว อาปตฺตีติ ชานาติฯ เสสปเทสุปิ เอเสว นโยฯ

2. ทุติยวินยธรสุตฺตวณฺณนา

[76] ทุติเย สฺวาคตานีติ สุอาคตานิ สุปฺปคุณานิฯ สุวิภตฺตานีติ โกฏฺฐาสโต สุฏฺฐุ วิภตฺตานิ สุปฺปวตฺตีนีติ อาวชฺชิตาวชฺชิตฏฺฐาเน สุฏฺฐุ ปวตฺตานิ ทฬฺหปฺปคุณานิฯ สุวินิจฺฉิตานีติ สุฏฺฐุ วินิจฺฉิตานิฯ สุตฺตโสติ วิภงฺคโตฯ อนุพฺยญฺชนโสติ ขนฺธกปริวารโตฯ

3. ตติยวินยธรสุตฺตวณฺณนา

[77] ตติเย วินเย โข ปน ฐิโต โหตีติ วินยลกฺขเณ ปติฏฺฐิโต โหติฯ อสํหีโรติ น สกฺกา โหติ คหิตคฺคหณํ วิสฺสชฺชาเปตุํฯ

9. สตฺถุสาสนสุตฺตวณฺณนา

[83] นวเม เอโกติ อทุติโยฯ วูปกฏฺโฐติ กาเยน คณโต, จิตฺเตน กิเลเสหิ วูปกฏฺโฐ วิเวกฏฺโฐ ทูรีภูโตฯ อปฺปมตฺโตติ สติอวิปฺปวาเส ฐิโตฯ ปหิตตฺโตติ เปสิตตฺโตฯ นิพฺพิทายาติ วฏฺเฏ อุกฺกณฺฐนตฺถายฯ วิราคายาติ ราคาทีนํ วิรชฺชนตฺถายฯ นิโรธายาติ อปฺปวตฺติกรณตฺถายฯ วูปสมายาติ กิเลสวูปสมาย อปฺปวตฺติยาฯ อภิญฺญายาติ ติลกฺขณํ อาโรเปตฺวา อภิชานนตฺถายฯ สมฺโพธายาติ มคฺคสงฺขาตสฺส สมฺโพธสฺส อตฺถายฯ นิพฺพานายาติ นิพฺพานสฺส สจฺฉิกรณตฺถายฯ