เมนู

8-10. ทุติยนิรยสุตฺตาทิวณฺณนา

[82-84] อฏฺฐเม ปคพฺโภติ กายปาคพฺภิยาทีหิ สมนฺนาคโตฯ นวมํ อุตฺตานตฺถเมวฯ ทสเม วิฆาตวาติ มหิจฺฉตํ นิสฺสาย อุปฺปนฺเนน โลภทุกฺเขน ทุกฺขิโตฯ เสสํ สพฺพตฺถ อุตฺตานเมวาติฯ

อรหตฺตวคฺโค อฏฺฐโมฯ

9. สีติวคฺโค

1. สีติภาวสุตฺตวณฺณนา

[85] นวมสฺส ปฐเม สีติภาวนฺติ สีตลภาวํฯ ยสฺมิํ สมเย จิตฺตํ นิคฺคณฺหิตพฺพนฺติอาทีสุ อุทฺธจฺจสมเย จิตฺตํ สมาธินา นิคฺคเหตพฺพํ นาม, โกสชฺชานุปติตกาเล วีริเยน ปคฺคเหตพฺพํ นาม, นิรสฺสาทคตกาเล สมาธินา สมฺปหํสิตพฺพํ นาม, สมปฺปวตฺตกาเล โพชฺฌงฺคุเปกฺขาย อชฺฌุเปกฺขิตพฺพํ นามฯ

2. อาวรณสุตฺตวณฺณนา

[86] ทุติเย กมฺมาวรณตายาติ ปญฺจานนฺตริยกมฺเมหิฯ กิเลสาวรณตายาติ นิยตมิจฺฉาทิฏฺฐิยาฯ วิปากาวรณตายาติ อกุสลวิปากปฏิสนฺธิยา วา กุสลวิปาเกหิ อเหตุกปฏิสนฺธิยา วาติฯ

4-5. สุสฺสูสติสุตฺตาทิวณฺณนา

[88-89] จตุตฺเถ อนตฺถนฺติ อวฑฺฒิํฯ อตฺถํ ริญฺจตีติ วฑฺฒิอตฺถํ ฉฑฺเฑติฯ อนนุโลมิกายาติ สาสนสฺส อนนุโลมิกายฯ ปญฺจเม ทิฏฺฐิสมฺปทนฺติ โสตาปตฺติมคฺคํฯ

8-11. อภพฺพฏฺฐานสุตฺตจตุกฺกวณฺณนา

[92-95] อฏฺฐเม อนาคมนียํ วตฺถุนฺติ อนุปคนฺตพฺพํ การณํ, ปญฺจนฺนํ เวรานํ ทฺวาสฏฺฐิยา จ ทิฏฺฐิคตานเมตํ อธิวจนํฯ อฏฺฐมํ ภวนฺติ กามาวจเร อฏฺฐมํ ปฏิสนฺธิํฯ นวเม โกตูหลมงฺคเลนาติ ทิฏฺฐสุตมุตมงฺคเลน ฯ ทสเม สยํกตนฺติอาทีนิ อตฺตทิฏฺฐิวเสน วุตฺตานิฯ อธิจฺจสมุปฺปนฺนนฺติ อเหตุนิพฺพตฺตํฯ เสสํ สพฺพตฺถ อุตฺตานเมวาติฯ

สีติวคฺโค นวโมฯ

10. อานิสํสวคฺโค

1-2. ปาตุภาวสุตฺตาทิวณฺณนา

[96-97] ทสมสฺส ปฐเม อริยายตเนติ มชฺฌิมเทเสฯ อินฺทฺริยานนฺติ มนจฺฉฏฺฐานํฯ ทุติเย สทฺธมฺมนิยโตติ สาสนสทฺธมฺเม นิยโตฯ อสาธารเณนาติ ปุถุชฺชเนหิ อสาธารเณนฯ

7. อนวตฺถิตสุตฺตวณฺณนา

[102] สตฺตเม อโนธิํ กริตฺวาติ ‘‘เอตฺตกาว สงฺขารา อนิจฺจา, น อิโต ปเร’’ติ เอวํ สีมํ มริยาทํ อกตฺวาฯ อนวตฺถิตาติ อวตฺถิตาย รหิตา, ภิชฺชมานาว หุตฺวา อุปฏฺฐหิสฺสนฺตีติ อตฺโถฯ สพฺพโลเกติ สกเล เตธาตุเกฯ สามญฺเญนาติ สมณภาเวน, อริยมคฺเคนาติ อตฺโถฯ

8. อุกฺขิตฺตาสิกสุตฺตวณฺณนา

[103] อฏฺฐเม เมตฺตาวตายาติ เมตฺตายุตฺตาย ปาริจริยายฯ สตฺต หิ เสขา ตถาคตํ เมตฺตาวตาย ปริจรนฺติ, ขีณาสโว ปริจิณฺณสตฺถุโกฯ

9. อตมฺมยสุตฺตวณฺณนา

[104] นวเม อตมฺมโยติ ตมฺมยา วุจฺจนฺติ ตณฺหาทิฏฺฐิโย, ตาหิ รหิโตฯ อหํการาติ อหํการทิฏฺฐิฯ มมํการาติ มมํการตณฺหาฯ เสสํ สพฺพตฺถ อุตฺตานเมวาติฯ

อานิสํสวคฺโค ทสโมฯ

ทุติยปณฺณาสกํ นิฏฺฐิตํฯ