‘‘ปุน จปรํ , ภนฺเต, อิเธกจฺโจ สมโณ วา พฺราหฺมโณ วา อาตปฺปมนฺวาย…เป.… ตถารูปํ เจโตสมาธิํ ผุสติ, ยถาสมาหิเต จิตฺเต อิมเมว กายํ อุทฺธํ ปาทตลา อโธ เกสมตฺถกา ตจปริยนฺตํ ปูรํ นานปฺปการสฺส อสุจิโน ปจฺจเวกฺขติ – ‘อตฺถิ อิมสฺมิํ กาเย เกสา โลมา…เป.… ลสิกา มุตฺต’นฺติฯ อติกฺกมฺม จ ปุริสสฺส ฉวิมํสโลหิตํ อฏฺฐิํ ปจฺจเวกฺขติฯ อยํ ทุติยา ทสฺสนสมาปตฺติฯ

‘‘ปุน จปรํ, ภนฺเต, อิเธกจฺโจ สมโณ วา พฺราหฺมโณ วา อาตปฺปมนฺวาย…เป.… ตถารูปํ เจโตสมาธิํ ผุสติ, ยถาสมาหิเต จิตฺเต อิมเมว กายํ อุทฺธํ ปาทตลา อโธ เกสมตฺถกา ตจปริยนฺตํ ปูรํ นานปฺปการสฺส อสุจิโน ปจฺจเวกฺขติ – ‘อตฺถิ อิมสฺมิํ กาเย เกสา โลมา…เป.… ลสิกา มุตฺต’นฺติฯ อติกฺกมฺม จ ปุริสสฺส ฉวิมํสโลหิตํ อฏฺฐิํ ปจฺจเวกฺขติฯ ปุริสสฺส จ วิญฺญาณโสตํ ปชานาติ, อุภยโต อพฺโพจฺฉินฺนํ อิธ โลเก ปติฏฺฐิตญฺจ ปรโลเก ปติฏฺฐิตญฺจฯ อยํ ตติยา ทสฺสนสมาปตฺติฯ

‘‘ปุน จปรํ, ภนฺเต, อิเธกจฺโจ สมโณ วา พฺราหฺมโณ วา อาตปฺปมนฺวาย…เป.… ตถารูปํ เจโตสมาธิํ ผุสติ, ยถาสมาหิเต จิตฺเต อิมเมว กายํ อุทฺธํ ปาทตลา อโธ เกสมตฺถกา ตจปริยนฺตํ ปูรํ นานปฺปการสฺส อสุจิโน ปจฺจเวกฺขติ – ‘อตฺถิ อิมสฺมิํ กาเย เกสา โลมา…เป.… ลสิกา มุตฺต’นฺติฯ อติกฺกมฺม จ ปุริสสฺส ฉวิมํสโลหิตํ อฏฺฐิํ ปจฺจเวกฺขติฯ ปุริสสฺส จ วิญฺญาณโสตํ ปชานาติ, อุภยโต อพฺโพจฺฉินฺนํ อิธ โลเก อปฺปติฏฺฐิตญฺจ ปรโลเก อปฺปติฏฺฐิตญฺจฯ อยํ จตุตฺถา ทสฺสนสมาปตฺติฯ เอตทานุตฺตริยํ, ภนฺเต, ทสฺสนสมาปตฺตีสุฯ

ปุคฺคลปณฺณตฺติเทสนา

[150] ‘‘อปรํ ปน, ภนฺเต, เอตทานุตฺตริยํ, ยถา ภควา ธมฺมํ เทเสติ ปุคฺคลปณฺณตฺตีสุฯ สตฺติเม, ภนฺเต, ปุคฺคลาฯ อุภโตภาควิมุตฺโต ปญฺญาวิมุตฺโต กายสกฺขี ทิฏฺฐิปฺปตฺโต สทฺธาวิมุตฺโต ธมฺมานุสารี สทฺธานุสารีฯ เอตทานุตฺตริยํ, ภนฺเต, ปุคฺคลปณฺณตฺตีสุฯ