เมนู

1. ภณฺฑคามวคฺโค

1. อนุพุทฺธสุตฺตวณฺณนา

[1] จตุกฺกนิปาตสฺส ปฐเม อนนุโพธาติ อพุชฺฌเนน อชานเนนฯ อปฺปฏิเวธาติ อปฺปฏิวิชฺฌเนน อปจฺจกฺขกิริยายฯ ทีฆมทฺธานนฺติ จิรกาลํฯ สนฺธาวิตนฺติ ภวโต ภวํ คมนวเสน สนฺธาวิตํฯ สํสริตนฺติ ปุนปฺปุนํ คมนาคมนวเสน สํสริตํฯ มมญฺเจว ตุมฺหากญฺจาติ มยา จ ตุมฺเหหิ จฯ อถ วา สนฺธาวิตํ สํสริตนฺติ สนฺธาวนํ สํสรณํ มมญฺเจว ตุมฺหากญฺจ อโหสีติ เอวเมตฺถ อตฺโถ เวทิตพฺโพฯ อริยสฺสาติ นิทฺโทสสฺสฯ สีลํ สมาธิ ปญฺญาติ อิเม ปน ตโย ธมฺมา มคฺคผลสมฺปยุตฺตาว เวทิตพฺพา, วิมุตฺตินาเมน ผลเมว นิทฺทิฏฺฐํฯ ภวตณฺหาติ ภเวสุ ตณฺหาฯ ภวเนตฺตีติ ภวรชฺชุฯ ตณฺหาย เอว เอตํ นามํฯ ตาย หิ สตฺตา โคณา วิย คีวาย พนฺธิตฺวา ตํ ตํ ภวํ นียนฺติ, ตสฺมา ภวเนตฺตีติ วุจฺจติฯ

อนุตฺตราติ โลกุตฺตราฯ ทุกฺขสฺสนฺตกโรติ วฏฺฏทุกฺขสฺส อนฺตกโรฯ จกฺขุมาติ ปญฺจหิ จกฺขูหิ จกฺขุมาฯ ปรินิพฺพุโตติ กิเลสปรินิพฺพาเนน ปรินิพฺพุโตฯ อิทมสฺส โพธิมณฺเฑ ปฐมปรินิพฺพานํ, ปจฺฉา ปน ยมกสาลานมนฺตเร อนุปาทิเสสาย นิพฺพานธาตุยา ปรินิพฺพุโตติ ยถานุสนฺธินา เทสนํ นิฏฺฐาเปสิฯ

2. ปปติตสุตฺตวณฺณนา

[2] ทุติเย ปปติโตติ ปติโต จุโตฯ อปฺปปติโตติ อปติโต ปติฏฺฐิโตฯ ตตฺถ โลกิยมหาชโน ปติโตเยว นาม, โสตาปนฺนาทโย กิเลสุปฺปตฺติกฺขเณ ปติตา นาม, ขีณาสโว เอกนฺตปติฏฺฐิโต นามฯ

จุตา ปตนฺตีติ เย จุตา, เต ปตนฺติ นามฯ ปติตาติ เย ปติตา, เต จุตา นามฯ จุตตฺตา ปติตา, ปติตตฺตา จุตาติ อตฺโถฯ คิทฺธาติ ราครตฺตาฯ ปุนราคตาติ ปุน ชาติํ ปุน ชรํ ปุน พฺยาธิํ ปุน มรณํ อาคตา นาม โหนฺติฯ กตํ กิจฺจนฺติ จตูหิ มคฺเคหิ กตฺตพฺพกิจฺจํ กตํฯ รตํ รมฺมนฺติ รมิตพฺพยุตฺตเก คุณชาเต รมิตํฯ สุเขนานฺวาคตํ สุขนฺติ สุเขน สุขํ อนุอาคตํ สมฺปตฺตํฯ มานุสกสุเขน ทิพฺพสุขํ, ฌานสุเขน วิปสฺสนาสุขํ, วิปสฺสนาสุเขน มคฺคสุขํ, มคฺคสุเขน ผลสุขํ, ผลสุเขน นิพฺพานสุขํ สมฺปตฺตํ อธิคตนฺติ อตฺโถฯ

3. ปฐมขตสุตฺตวณฺณนา

[3] ตติยํ ทุกนิปาตวณฺณนายํ วุตฺตเมวฯ คาถาสุ ปน นินฺทิยนฺติ นินฺทิตพฺพยุตฺตกํฯ นินฺทตีติ ครหติฯ ปสํสิโยติ ปสํสิตพฺพยุตฺโตฯ วิจินาติ มุเขน โส กลินฺติ โย เอวํ ปวตฺโต , เตน มุเขน กลิํ วิจินาติ นามฯ กลินา เตน สุขํ น วินฺทตีติ เตน จ กลินา สุขํ น ปฏิลภติฯ สพฺพสฺสาปิ สหาปิ อตฺตนาติ สพฺเพนปิ สเกน ธเนน เจว อตฺตนา จ สทฺธิํ โย ปราชโย, โส อปฺปมตฺตโกว กลีติ อตฺโถฯ โย สุคเตสูติ โย ปน สมฺมคฺคเตสุ ปุคฺคเลสุ จิตฺตํ ปทุสฺเสยฺย, อยํ จิตฺตปโทโสว ตโต กลิโต มหนฺตตโร กลิฯ อิทานิ ตสฺส มหนฺตตรภาวํ ทสฺเสนฺโต สตํ สหสฺสานนฺติอาทิมาหฯ ตตฺถ สตํ สหสฺสานนฺติ นิรพฺพุทคณนาย สตสหสฺสํฯ ฉตฺติํสตีติ อปรานิ จ ฉตฺติํสติ นิรพฺพุทานิฯ ปญฺจ จาติ อพฺพุทคณนาย จ ปญฺจ อพฺพุทานิฯ ยมริยครหีติ ยํ อริเย ครหนฺโต นิรยํ อุปปชฺชติ, ตตฺถ เอตฺตกํ อายุปฺปมาณนฺติฯ

4. ทุติยขตสุตฺตวณฺณนา

[4] จตุตฺเถ มาตริ ปิตริ จาติอาทีสุ มิตฺตวินฺทโก มาตริ มิจฺฉาปฏิปนฺโน นาม, อชาตสตฺตุ ปิตริ มิจฺฉาปฏิปนฺโน นาม, เทวทตฺโต ตถาคเต มิจฺฉาปฏิปนฺโน นาม, โกกาลิโก ตถาคตสาวเก มิจฺฉาปฏิปนฺโน นามฯ พหุญฺจาติ พหุกเมวฯ ปสวตีติ ปฏิลภติฯ ตายาติ ตาย มิจฺฉาปฏิปตฺติสงฺขาตาย อธมฺมจริยายฯ เปจฺจาติ อิโต คนฺตฺวาฯ อปายํ คจฺฉตีติ นิรยาทีสุ อญฺญตรสฺมิํ นิพฺพตฺตติฯ สุกฺกปกฺเขปิ เอเสว นโยฯ