เมนู

7. อากาสสุตฺตวณฺณนา

[155] ปุรตฺถิมาติ ปุรตฺถิมทิสโต อาคตวาตาฯ ปจฺฉิมทิสาทีสุปิ เอเสว นโยฯ จตฺตาโรปิ สติปฏฺฐานาติ ยเถว หิ เอเตสํ ปุรตฺถิมาทิเภทานํ วาตานํ สนฺนิปาโต อากาเส อิชฺฌติ, เอวํ อิธาปิ ‘‘จตฺตาโร สติปฏฺฐานา’’ติอาทินา นเยน วุตฺตา โพธิปกฺขิยธมฺมา สหวิปสฺสนสฺส อริยมคฺคสฺส ภาวนาย อิชฺฌนฺติ, เตเนตํ วุตฺตํฯ

8-9. ปฐมเมฆสุตฺตาทิวณฺณนา

[156-157] คิมฺหานํ ปจฺฉิเม มาเสติ อาสาฬฺหมาเสฯ อูหตนฺติ ทฺวิปทจตุปฺปทานํ ปาทปฺปหาเรน ปถวีตเล อุฏฺฐหิตฺวา อุทฺธํ คตํ วฏฺฏิวฏฺฏิ หุตฺวา อากาเส ปกฺขนฺตํฯ รโชชลฺลนฺติ ปํสุรโชชลฺลํฯ

10. นาวาสุตฺตวณฺณนา

[158] สามุทฺทิกาย นาวายาติอาทิ เหฏฺฐา วาณิชโกปเม วิตฺถาริตเมวฯ

11-12. อาคนฺตุกสุตฺตาทิวณฺณนา

[159-160] อาคนฺตุกาคารนฺติ ปุญฺญตฺถิเกหิ นครมชฺเฌ กตํ อาคนฺตุกฆรํ, ยตฺถ ราชราชมหามตฺเตหิปิ สกฺกา โหติ นิวาสํ อุปคนฺตุํฯ อภิญฺญา ปริญฺเญยฺยาติ ยเถว หิ เตสํ ปุรตฺถิมทิสาทีหิ อาคตานํ ขตฺติยาทีนํ วาโส อาคนฺตุกาคาเร อิชฺฌติ, เอวํ อิเมสํ อภิญฺญาปริญฺเญยฺยาติอาทีนํ ธมฺมานํ อภิญฺญาปริชานนาทีหิ สหวิปสฺสนสฺส อริยมคฺคสฺส ภาวนาย อิชฺฌนฺติ, เตเนตํ วุตฺตํฯ นทีสุตฺตํ เหฏฺฐา วุตฺตนยเมวาติฯ

พลกรณียวคฺโค นวโมฯ

10. เอสนาวคฺโค

1. เอสนาสุตฺตวณฺณนา

[161] เอสนาวคฺเค กาเมสนาติ กามานํ เอสนา คเวสนา มคฺคนา ปตฺถนาฯ ภเวสนาติ ภวานํ เอสนาฯ พฺรหฺมจริเยสนาติ มิจฺฉาทิฏฺฐิสงฺขาตสฺส พฺรหฺมจริยสฺส เอสนาฯ

2-11. วิธาสุตฺตาทิวณฺณนา

[162-171] วิธาติ มานโกฏฺฐาสา มานฐปนา วาฯ เสยฺโยหมสฺมีติ วิธาติ อหมสฺมิ เสยฺโยติ เอวํ มานโกฏฺฐาโส มานฐปนา วาฯ นีฆาติ ทุกฺขาฯ วจนตฺโถ ปเนตฺถ ยสฺส อุปฺปชฺชนฺติ, ตํ ปุริสํ นีหนนฺตีติ นีฆาฯ เสสเมตฺถ อุตฺตานเมวาติฯ

เอสนาวคฺโค ทสโมฯ

11. โอฆวคฺโค

1-2. โอฆสุตฺตาทิวณฺณนา

[172-173] โอฆวคฺเค กาโมโฆติ ปญฺจสุ กามคุเณสุ ฉนฺทราโคฯ ภโวโฆติ รูปารูปภเวสุ ฉนฺทราโคฯ ทิฏฺโฐโฆติ ทฺวาสฏฺฐิ ทิฏฺฐิโยฯ อวิชฺโชโฆติ จตูสุ สจฺเจสุ อญฺญาณํฯ กามโยคาทีสุปิ เอเสว นโยฯ

3-4. อุปาทานสุตฺตาทิวณฺณนา

[174-175] กามุปาทานนฺติ กามคฺคหณํฯ ทิฏฺฐุปาทานาทีสุปิ เอเสว นโยฯ คนฺถาติ คนฺถนา ฆฏนาฯ กายคนฺโถติ นามกายสฺส คนฺโถ คนฺถนฆฏนกิเลโสฯ อิทํสจฺจาภินิเวโสติ อนฺตคฺคาหิกทิฏฺฐิวเสน อุปฺปนฺโน ‘‘อิทเมว สจฺจ’’นฺติ เอวํ อภินิเวโสฯ