นิคมนกถา

เอตฺตาวตา หิ –

‘‘พหุการสฺส ยตีนํ วิปสฺสนาจารนิปุณพุทฺธีนํ,

สํยุตฺตวรนิกายสฺส อตฺถสํวณฺณนํ กาตุํฯ

‘‘สทฺธมฺมสฺส จิรฏฺฐิติมาสิสมาเนน ยา มยา;

นิปุณา อฏฺฐกถา อารทฺธา สารตฺถปกาสินี นามฯ

‘‘สา หิ มหาอฏฺฐกถาย สารมาทาย นิฏฺฐิตา เอสา;

อฏฺฐสตฺตติมตฺตาย ปาฬิยา ภาณวาเรหิฯ

‘‘เอกูนสฏฺฐิมตฺโต วิสุทฺธิมคฺโคปิ ภาณวาเรหิ;

อตฺถปฺปกาสนตฺถาย อาคมานํ กโต ยสฺมาฯ

‘‘ตสฺมา เตน สหายํ อฏฺฐกถา ภาณวารคณนาย;

โถเกน อปริปูรํ สตฺตติํสสตํ โหติฯ

‘‘สตฺตติํสาธิกสต-ปริมาณํ ภาณวารโต เอวํ;

สมยํ ปกาสยนฺติํ มหาวิหาราธิวาสีนํฯ

‘‘มูลฏฺฐกถาย สารมาทาย มยา อิมํ กโรนฺเตน;

ยํ ปุญฺญมุปจิตํ เตน โหตุ สพฺโพ สุขี โลโกฯ

‘‘เอติสฺสา กรณตฺถํ เถเรน ภทนฺตโชติปาเลน;

สุจิสีเลน สุภาสิตสฺส ปกาสยนฺตญาเณนฯ

‘‘สาสนวิภูติกาเมน ยาจมาเนน มํ สุภคุเณน;

ยํ สมธิคตํ ปุญฺญํ เตนาปิ ชโน สุขี ภวตู’’ติฯ

ปรมวิสุทฺธสทฺธาพุทฺธิวีริยปฺปฏิมณฺฑิเตน สีลาจารชฺชวมทฺทวาทิคุณสมุทยสมุทิเตน สกสมยสมยนฺตรคหนชฺโฌคาหณสมตฺเถน ปญฺญาเวยฺยตฺติยสมนฺนาคเตน ติปิฏกปริยตฺติปฺปเภเท สาฏฺฐกเถ สตฺถุสาสเน อปฺปฏิหตญาณปฺปภาเวน มหาเวยฺยากรเณน กรณสมฺปตฺติชนิตสุขวินิคฺคตมธุโรทารวจนลาวณฺณยุตฺเตน ยุตฺตมุตฺตวาทินา วาทีวเรน มหากวินา ปภินฺนปฏิสมฺภิทาปริวาเร ฉฬภิญฺญาทิปฺปเภทคุณปฺปฏิมณฺฑิเต อุตฺตริมนุสฺสธมฺเม สุปฺปติฏฺฐิตพุทฺธีนํ เถรวํสปฺปทีปานํ เถรานํ มหาวิหารวาสีนํ วํสาลงฺการภูเตน วิปุลวิสุทฺธพุทฺธินา พุทฺธโฆโสติ ครูหิ คหิตนามเธยฺเยน เถเรน กตา อยํ สารตฺถปฺปกาสินี นาม สํยุตฺตนิกายฏฺฐกถาฯ

‘‘ตาว ติฏฺฐตุ โลกสฺมิํ, โลกนิตฺถรเณสินํ;

ทสฺเสนฺตี กุลปุตฺตานํ, นยํ สีลวิสุทฺธิยาฯ

‘‘ยาว พุทฺโธติ นามมฺปิ, สุทฺธจิตฺตสฺส ตาทิโน;

โลกมฺหิ โลกเชฏฺฐสฺส, ปวตฺตติ มเหสิโน’’ติฯ

สารตฺถปฺปกาสินี นาม

สํยุตฺตนิกาย-อฏฺฐกถา สพฺพากาเรน นิฏฺฐิตาฯ