เมนู

9. โอปมฺมสํยุตฺตํ

1. กูฏสุตฺตวณฺณนา

[223] โอปมฺมสํยุตฺตสฺส ปฐเม กูฏํ คจฺฉนฺตีติ กูฏงฺคมาฯ กูฏํ สโมสรนฺตีติ กูฏสโมสรณาฯ กูฏสมุคฺฆาตาติ กูฏสฺส สมุคฺฆาเตนฯ อวิชฺชาสมุคฺฆาตาติ อรหตฺตมคฺเคน อวิชฺชาย สมุคฺฆาเตนฯ อปฺปมตฺตาติ สติยา อวิปฺปวาเส ฐิตา หุตฺวาฯ ปฐมํฯ

2. นขสิขสุตฺตวณฺณนา

[224] ทุติเย มนุสฺเสสุ ปจฺจาชายนฺตีติ เย มนุสฺสโลกโต จุตา มนุสฺเสสุ ชายนฺติ, เต เอวํ อปฺปกาติ อธิปฺปาโยฯ อญฺญตฺร มนุสฺเสหีติ เย ปน มนุสฺสโลกโต จุตา ฐเปตฺวา มนุสฺสโลกํ จตูสุ อปาเยสุ ปจฺจาชายนฺติ, เต มหาปถวิยํ ปํสุ วิย พหุตราฯ อิมสฺมิญฺจ สุตฺเต เทวาปิ มนุสฺเสเหว สงฺคหิตาฯ ตสฺมา ยถา มนุสฺเสสุ ชายนฺตา อปฺปกา, เอวํ เทเวสุปีติ เวทิตพฺพาฯ ทุติยํฯ

3. กุลสุตฺตวณฺณนา

[225] ตติเย สุปฺปธํสิยานีติ สุวิเหฐิยานิฯ กุมฺภตฺเถนเกหีติ เย ปรฆรํ ปวิสิตฺวา ทีปาโลเกน โอโลเกตฺวา ปรภณฺฑํ หริตุกามา ฆเฏ ทีปํ กตฺวา ปวิสนฺติ, เต กุมฺภตฺเถนกา นาม, เตหิ กุมฺภตฺเถนเกหิฯ สุปฺปธํสิโย โหติ อมนุสฺเสหีติ เมตฺตาภาวนารหิตํ ปํสุปิสาจกา วิธํสยนฺติ, ปเคว อุฬารา อมนุสฺสาฯ ภาวิตาติ วฑฺฒิตาฯ พหุลีกตาติ ปุนปฺปุนํ กตาฯ ยานีกตาติ ยุตฺตยานํ วิย กตาฯ วตฺถุกตาติ ปติฏฺฐานฏฺเฐน วตฺถุ วิย กตาฯ อนุฏฺฐิตาติ อธิฏฺฐิตา ปริจิตาติ สมนฺตโต จิตา สุวฑฺฒิตาฯ สุสมารทฺธาติ จิตฺเตน สุฏฺฐุ สมารทฺธาฯ ตติยํฯ