เมนู

6. จาลาสุตฺตวณฺณนา

[167] ฉฏฺเฐ โก นุ ตํ อิทมาทปยีติ โก นุ มนฺทพุทฺธิ พาโล ตํ เอวํ คาหาเปสิ? ปริกฺเลสนฺติ อญฺญมฺปิ นานปฺปการํ อุปทฺทวํฯ อิทานิ ยํ มาโร อาห – ‘‘โก นุ ตํ อิทมาทปยี’’ติ, ตํ มทฺทนฺตี – ‘‘น มํ อนฺธพาโล อาทเปสิ, โลเก ปน อคฺคปุคฺคโล สตฺถา ธมฺมํ เทเสสี’’ติ ทสฺเสตุํ, พุทฺโธติอาทิมาหฯ ตตฺถ สจฺเจ นิเวสยีติ ปรมตฺถสจฺเจ นิพฺพาเน นิเวเสสิฯ นิโรธํ อปฺปชานนฺตาติ นิโรธสจฺจํ อชานนฺตาฯ ฉฏฺฐํฯ

7. อุปจาลาสุตฺตวณฺณนา

[168] สตฺตเม เอนฺติ มารวสํ ปุนาติ ปุนปฺปุนํ มรณมารกิเลสมารเทวปุตฺตมารานํ วสํ อาคจฺฉนฺติฯ ปธูปิโตติ สนฺตาปิโตฯ อคติ ยตฺถ มารสฺสาติ ยตฺถ ตุยฺหํ มารสฺส อคติฯ ตตฺถาติ ตสฺมิํ นิพฺพาเนฯ สตฺตมํฯ

8. สีสุปจาลาสุตฺตวณฺณนา

[169] อฏฺฐเม สมณี วิย ทิสฺสสีติ สมณิสทิสา ทิสฺสสิฯ กิมิว จรสิ โมมูหาติ กิํ การณา โมมูหา วิย จรสิ? อิโต พหิทฺธาติ อิมมฺหา สาสนา พหิฯ ปาสํ เฑนฺตีติ ปาสณฺฑา, สตฺตานํ จิตฺเตสุ ทิฏฺฐิปาสํ ขิปนฺตีติ อตฺโถฯ สาสนํ ปน ปาเส โมเจติ, ตสฺมา ปาสณฺโฑติ น วุจฺจติ, อิโต พหิทฺธาเยว ปาสณฺฑา โหนฺติฯ ปสีทนฺตีติ สํสีทนฺติ ลคฺคนฺติฯ

อิทานิ ‘‘กํ นุ อุทฺทิสฺส มุณฺฑาสี’’ติ ปญฺหํ กเถนฺตี อตฺถิ สกฺยกุเล ชาโตติอาทิมาหฯ ตตฺถ สพฺพาภิภูติ สพฺพานิ ขนฺธายตนธาตุภวโยนิคติอาทีนิ อภิภวิตฺวา ฐิโตฯ มรณมาราทโย นุทิ นีหรีติ มารนุโทฯ สพฺพตฺถมปราชิโตติ สพฺเพสุ ราคาทีสุ วา มารยุทฺเธ วา อชิโตฯ สพฺพตฺถ มุตฺโตติ สพฺเพสุ ขนฺธาทีสุ มุตฺโตฯ อสิโตติ ตณฺหาทิฏฺฐินิสฺสเยน อนิสฺสิโตฯ สพฺพกมฺมกฺขยํ ปตฺโตติ สพฺพกมฺมกฺขยสงฺขาตํ อรหตฺตํ ปตฺโตฯ อุปธิสงฺขเยติ อุปธิสงฺขยสงฺขาเต นิพฺพาเน อารมฺมณโต วิมุตฺโตฯ อฏฺฐมํฯ

9. เสลาสุตฺตวณฺณนา

[170] นวเม เกนิทํ ปกตนฺติ เกน อิทํ กตํฯ พิมฺพนฺติ อตฺตภาวํ สนฺธาย วทติฯ อฆนฺติ ทุกฺขปติฏฺฐานตฺตา อตฺตภาวเมว วทติฯ เหตุภงฺคาติ เหตุนิโรเธน ปจฺจยเวกลฺเลนฯ นวมํฯ

10. วชิราสุตฺตวณฺณนา

[171] ทสเม นยิธ สตฺตุปลพฺภตีติ อิมสฺมิํ สุทฺธสงฺขารปุญฺเช ปรมตฺถโต สตฺโต นาม น อุปลพฺภติฯ ขนฺเธสุ สนฺเตสูติ ปญฺจสุ ขนฺเธสุ วิชฺชมาเนสุ เตน เตนากาเรน ววตฺถิเตสุฯ สมฺมุตีติ สตฺโตติ สมญฺญามตฺตเมว โหติฯ ทุกฺขนฺติ ปญฺจกฺขนฺธทุกฺขํฯ นาญฺญตฺร ทุกฺขาติ ฐเปตฺวา ทุกฺขํ อญฺโญ เนว สมฺโภติ น นิรุชฺฌตีติฯ ทสมํฯ

อิติ สารตฺถปฺปกาสินิยา

สํยุตฺตนิกาย-อฏฺฐกถาย

ภิกฺขุนีสํยุตฺตวณฺณนา นิฏฺฐิตาฯ

6. พฺรหฺมสํยุตฺตํ

1. ปฐมวคฺโค