เมนู

เอวเมตา จตสฺโส รูปวตฺถุกา สกฺกายทิฏฺฐิมญฺญนา เวทิตพฺพาฯ ตตฺถ เอกา อุจฺเฉททิฏฺฐิ, ติสฺโส สสฺสตทิฏฺฐิโยติ ทฺเวว ทิฏฺฐิโย โหนฺตีติ อยมฺปิ อตฺถวิเสโส เวทิตพฺโพฯ

อาโปวาราทิวณฺณนา นิฏฺฐิตาฯ

ภูตวาราทิวณฺณนา

[3] เอวํ รูปมุเขน สงฺขารวตฺถุกํ มญฺญนํ วตฺวา อิทานิ เย สงฺขาเร อุปาทาย สตฺตา ปญฺญปียนฺติ, เตสุ สงฺขาเรสุ สตฺเตสุปิ ยสฺมา ปุถุชฺชโน มญฺญนํ กโรติ, ตสฺมา เต สตฺเต นิทฺทิสนฺโต ภูเต ภูตโต สญฺชานาตีติอาทิมาหฯ ตตฺถายํ ภูตสทฺโท ปญฺจกฺขนฺธอมนุสฺสธาตุวิชฺชมานขีณาสวสตฺตรุกฺขาทีสุ ทิสฺสติฯ ‘‘ภูตมิทนฺติ, ภิกฺขเว, สมนุปสฺสถา’’ติอาทีสุ (ม. นิ. 1.401) หิ อยํ ปญฺจกฺขนฺเธสุ ทิสฺสติฯ ‘‘ยานีธ ภูตานิ สมาคตานี’’ติ (สุ. นิ. 224) เอตฺถ อมนุสฺเสสุฯ ‘‘จตฺตาโร โข, ภิกฺขุ, มหาภูตา เหตู’’ติ (ม. นิ. 3.86) เอตฺถ ธาตูสุฯ ‘‘ภูตสฺมิํ ปาจิตฺติย’’นฺติอาทีสุ (ปาจิ. 69) วิชฺชมาเนฯ ‘‘โย จ กาลฆโส ภูโต’’ติ (ชา. 1.10.190) เอตฺถ ขีณาสเวฯ ‘‘สพฺเพว นิกฺขิปิสฺสนฺติ ภูตา โลเก สมุสฺสย’’นฺติ (ที. นิ. 2.220) เอตฺถ สตฺเตสุฯ ‘‘ภูตคามปาตพฺยตายา’’ติ (ปาจิ. 90) เอตฺถ รุกฺขาทีสุฯ อิธ ปนายํ สตฺเตสุ วตฺตติ, โน จ โข อวิเสเสนฯ จาตุมหาราชิกานํ หิ เหฏฺฐา สตฺตา อิธ ภูตาติ อธิปฺเปตาฯ

ตตฺถ ภูเต ภูตโต สญฺชานาตีติอาทิ วุตฺตนยเมวฯ ภูเต มญฺญตีติอาทีสุ ปน ติสฺโสปิ มญฺญนา โยเชตพฺพาฯ กถํ? อยญฺหิ ‘‘โส ปสฺสติ คหปติํ วา คหปติปุตฺตํ วา ปญฺจหิ กามคุเณหิ สมปฺปิตํ สมงฺคิภูต’’นฺติ (อ. นิ. 7.50) วุตฺตนเยน ภูเต สุภา สุขิตาติ คเหตฺวา รชฺชติ, ทิสฺวาปิ เน รชฺชติ, สุตฺวาปิ, ฆายิตฺวาปิ, สายิตฺวาปิ, ผุสิตฺวาปิ, ญตฺวาปิฯ เอวํ ภูเต ตณฺหามญฺญนาย มญฺญติฯ ‘‘อโห วตาหํ ขตฺติยมหาสาลานํ วา สหพฺยตํ อุปปชฺเชยฺย’’นฺติอาทินา (ที. นิ. 3.337) วา ปน นเยน อปฺปฏิลทฺธสฺส ปฏิลาภาย จิตฺตํ ปณิทหติ, เอวมฺปิ ภูเต ตณฺหามญฺญนาย มญฺญติฯ อตฺตโน ปน ภูตานญฺจ สมฺปตฺติวิปตฺติํ นิสฺสาย อตฺตานํ วา เสยฺยํ ทหติฯ

ภูเตสุ จ ยํกิญฺจิ ภูตํ หีนํ อตฺตานํ วา หีนํ, ยํกิญฺจิ ภูตํ เสยฺยํ ฯ อตฺตานํ วา ภูเตน, ภูตํ วา อตฺตนา สทิสํ ทหติฯ ยถาห ‘‘อิเธกจฺโจ ชาติยา วา…เป.… อญฺญตรญฺญตเรน วตฺถุนา ปุพฺพกาลํ ปเรหิ สทิสํ อตฺตานํ ทหติฯ อปรกาลํ อตฺตานํ เสยฺยํ ทหติฯ ปเร หีเน ทหติ, โย เอวรูโป มาโน …เป.… อยํ วุจฺจติ มานาติมาโน’’ติ (วิภ. 876-880)ฯ เอวํ ภูเต มานมญฺญนาย มญฺญติฯ

ภูเต ปน ‘‘นิจฺจา ธุวา สสฺสตา อวิปริณามธมฺมา’’ติ วา ‘‘สพฺเพ สตฺตา สพฺเพ ปาณา สพฺเพ ภูตา สพฺเพ ชีวา อวสา อพลา อวีริยา นิยติสงฺคติภาวปริณตา ฉสฺเววาภิชาตีสุ สุขทุกฺขํ ปฏิสํเวเทนฺตี’’ติ (ที. นิ. 1.168) วา มญฺญมาโน ทิฏฺฐิมญฺญนาย มญฺญติฯ เอวํ ภูเต ตีหิ มญฺญนาหิ มญฺญติฯ

กถํ ภูเตสุ มญฺญติ? เตสุ เตสุ ภูเตสุ อตฺตโน อุปปตฺติํ วา สุขุปฺปตฺติํ วา อากงฺขติฯ เอวํ ตาว ตณฺหามญฺญนาย ภูเตสุ มญฺญติฯ ภูเตสุ วา อุปปตฺติํ อากงฺขมาโน ทานํ เทติ, สีลํ สมาทิยติ, อุโปสถกมฺมํ กโรติฯ เอวมฺปิ ภูเตสุ ตณฺหามญฺญนาย มญฺญติฯ ภูเต ปน สมูหคฺคาเหน คเหตฺวา ตตฺถ เอกจฺเจ ภูเต เสยฺยโต ทหติ, เอกจฺเจ สทิสโต วา หีนโต วาติฯ เอวํ ภูเตสุ มานมญฺญนาย มญฺญติฯ ตถา เอกจฺเจ ภูเต นิจฺจา ธุวาติ มญฺญติฯ เอกจฺเจ อนิจฺจา อธุวาติ, อหมฺปิ ภูเตสุ อญฺญตโรสฺมีติ วา มญฺญติฯ เอวํ ภูเตสุ ทิฏฺฐิมญฺญนาย มญฺญติฯ

ภูตโต มญฺญตีติ เอตฺถ ปน สอุปกรณสฺส อตฺตโน วา ปรสฺส วา ยโต กุโตจิ ภูตโต อุปฺปตฺติํ มญฺญมาโน ภูตโต มญฺญตีติ เวทิตพฺโพ, อยมสฺส ทิฏฺฐิมญฺญนาฯ ตสฺมิํเยว ปนสฺส ทิฏฺฐิมญฺญนาย มญฺญิเต วตฺถุสฺมิํ สิเนหํ มานญฺจ อุปฺปาทยโต ตณฺหามานมญฺญนาปิ เวทิตพฺพาฯ ภูเต เมติ มญฺญตีติ เอตฺถ ปน เอกา ตณฺหามญฺญนาว ลพฺภติฯ สา จายํ ‘‘มม ปุตฺตา, มม ธีตา, มม อเชฬกา, กุกฺกุฏสูกรา, หตฺถิควสฺสวฬวา’’ติ เอวมาทินา นเยน มมายโต ปวตฺตตีติ เวทิตพฺพาฯ ภูเต อภินนฺทตีติ เอตํ วุตฺตนยเมวฯ อปริญฺญาตํ ตสฺสาติ เอตฺถ ปน เย สงฺขาเร อุปาทาย ภูตานํ ปญฺญตฺติ, เตสํ อปริญฺญาตตฺตา ภูตา อปริญฺญาตา โหนฺตีติ เวทิตพฺพาฯ โยชนา ปน วุตฺตนเยเนว กาตพฺพาฯ

เอวํ สงฺเขปโต สงฺขารวเสน จ สตฺตวเสน จ มญฺญนาวตฺถุํ ทสฺเสตฺวา อิทานิ ภูมิวิเสสาทินา เภเทน วิตฺถารโตปิ ตํ ทสฺเสนฺโต เทเว เทวโตติอาทิมาหฯ ตตฺถ ทิพฺพนฺติ ปญฺจหิ กามคุเณหิ อตฺตโน วา อิทฺธิยาติ เทวา, กีฬนฺติ โชเตนฺติ จาติ อตฺโถฯ เต ติวิธา สมฺมุติเทวา อุปปตฺติเทวา วิสุทฺธิเทวาติฯ สมฺมุติเทวา นาม ราชาโน เทวิโย ราชกุมาราฯ อุปปตฺติเทวา นาม จาตุมหาราชิเก เทเว อุปาทาย ตตุตฺตริเทวาฯ วิสุทฺธิเทวา นาม อรหนฺโต ขีณาสวาฯ อิธ ปน อุปปตฺติเทวา ทฏฺฐพฺพา, โน จ โข อวิเสเสนฯ ปรนิมฺมิตวสวตฺติเทวโลเก มารํ สปริสํ ฐเปตฺวา เสสา ฉ กามาวจรา อิธ เทวาติ อธิปฺเปตาฯ ตตฺถ สพฺพา อตฺถวณฺณนา ภูตวาเร วุตฺตนเยเนว เวทิตพฺพาฯ

ปชาปตินฺติ เอตฺถ ปน มาโร ปชาปตีติ เวทิตพฺโพฯ เกจิ ปน ‘‘เตสํ เตสํ เทวานํ อธิปตีนํ มหาราชาทีนเมตํ อธิวจน’’นฺติ วทนฺติฯ ตํ เทวคฺคหเณเนว เตสํ คหิตตฺตา อยุตฺตนฺติ มหาอฏฺฐกถายํ ปฏิกฺขิตฺตํ, มาโรเยว ปน สตฺตสงฺขาตาย ปชาย อธิปติภาเวน อิธ ปชาปตีติ อธิปฺเปโตฯ โส กุหิํ วสติ? ปรนิมฺมิตวสวตฺติเทวโลเก ฯ ตตฺร หิ วสวตฺติราชา รชฺชํ กาเรติฯ มาโร เอกสฺมิํ ปเทเส อตฺตโน ปริสาย อิสฺสริยํ ปวตฺเตนฺโต รชฺชปจฺจนฺเต ทามริกราชปุตฺโต วิย วสตีติ วทนฺติฯ มารคฺคหเณเนว เจตฺถ มารปริสายปิ คหณํ เวทิตพฺพํฯ โยชนานโย เจตฺถ ปชาปติํ วณฺณวนฺตํ ทีฆายุกํ สุขพหุลํ ทิสฺวา วา สุตฺวา วา รชฺชนฺโต ตณฺหามญฺญนาย มญฺญติฯ ‘‘อโห วตาหํ ปชาปติโน สหพฺยตํ อุปปชฺเชยฺย’’นฺติอาทินา วา ปน นเยน อปฺปฏิลทฺธสฺส ปฏิลาภาย จิตฺตํ ปณิทหนฺโตปิ ปชาปติํ ตณฺหามญฺญนาย มญฺญติฯ ปชาปติภาวํ ปน ปตฺโต สมาโน อหมสฺมิ ปชานมิสฺสโร อธิปตีติ มานํ ชเนนฺโต ปชาปติํ มานมญฺญนาย มญฺญติฯ ‘‘ปชาปติ นิจฺโจ ธุโว’’ติ วา ‘‘อุจฺฉิชฺชิสฺสติ วินสฺสิสฺสตี’’ติ วา ‘‘อวโส อพโล อวีริโย นิยติสงฺคติภาวปริณโต ฉสฺเววาภิชาตีสุ สุขทุกฺขํ ปฏิสํเวเทตี’’ติ วา มญฺญมาโน ปน ปชาปติํ ทิฏฺฐิมญฺญนาย มญฺญตีติ เวทิตพฺโพฯ

ปชาปติสฺมินฺติ เอตฺถ ปน เอกา ทิฏฺฐิมญฺญนาว ยุชฺชติฯ ตสฺสา เอวํ ปวตฺติ เวทิตพฺพาฯ

อิเธกจฺโจ ‘‘ปชาปติสฺมิํ เย จ ธมฺมา สํวิชฺชนฺติ, สพฺเพ เต นิจฺจา ธุวา สสฺสตา อวิปริณามธมฺมา’’ติ มญฺญติฯ อถ วา ‘‘ปชาปติสฺมิํ นตฺถิ ปาปํ, น ตสฺมิํ ปาปกานิ กมฺมานิ อุปลพฺภนฺตี’’ติ มญฺญติฯ

ปชาปติโตติ เอตฺถ ติสฺโสปิ มญฺญนา ลพฺภนฺติฯ กถํ? อิเธกจฺโจ สอุปกรณสฺส อตฺตโน วา ปรสฺส วา ปชาปติโต อุปฺปตฺติํ วา นิคฺคมนํ วา มญฺญติ, อยมสฺส ทิฏฺฐิมญฺญนาฯ ตสฺมิํเยว ปนสฺส ทิฏฺฐิมญฺญนาย มญฺญิเต วตฺถุสฺมิํ สิเนหํ มานญฺจ อุปฺปาทยโต ตณฺหามานมญฺญนาปิ เวทิตพฺพาฯ ปชาปติํ เมติ เอตฺถ ปน เอกา ตณฺหามญฺญนาว ลพฺภติฯ สา จายํ ‘‘ปชาปติ มม สตฺถา มม สามี’’ติอาทินา นเยน มมายโต ปวตฺตตีติ เวทิตพฺพาฯ เสสํ วุตฺตนยเมวฯ

พฺรหฺมํ พฺรหฺมโตติ เอตฺถ พฺรูหิโต เตหิ เตหิ คุณวิเสเสหีติ พฺรหฺมาฯ อปิจ พฺรหฺมาติ มหาพฺรหฺมาปิ วุจฺจติ, ตถาคโตปิ พฺราหฺมโณปิ มาตาปิตโรปิ เสฏฺฐมฺปิฯ ‘‘สหสฺโส พฺรหฺมา ทฺวิสหสฺโส พฺรหฺมา’’ติอาทีสุ (ม. นิ. 3.165-166) หิ มหาพฺรหฺมา พฺรหฺมาติ วุจฺจติฯ ‘‘พฺรหฺมาติ โข, ภิกฺขเว , ตถาคตสฺเสตํ อธิวจน’’นฺติ เอตฺถ ตถาคโตฯ

‘‘ตโมนุโท พุทฺโธ สมนฺตจกฺขุ,

โลกนฺตคู สพฺพภวาติวตฺโต;

อนาสโว สพฺพทุกฺขปฺปหีโน,

สจฺจวฺหโย พฺรหฺเม อุปาสิโต เม’’ติฯ (จูฬนิ. 104) –

เอตฺถ พฺราหฺมโณฯ

‘‘พฺรหฺมาติ มาตาปิตโร, ปุพฺพาจริยาติ วุจฺจเร’’ติฯ (อิติวุ. 106; ชา. 2.20.181) –

เอตฺถ มาตาปิตโรฯ ‘‘พฺรหฺมจกฺกํ ปวตฺเตตี’’ติ (ม. นิ. 1.148; อ. นิ. 5.11) เอตฺถ เสฏฺฐํฯ อิธ ปน ปฐมาภินิพฺพตฺโต กปฺปายุโก พฺรหฺมา อธิปฺเปโตฯ ตคฺคหเณเนว จ พฺรหฺมปุโรหิตพฺรหฺมปาริสชฺชาปิ คหิตาติ เวทิตพฺพาฯ อตฺถวณฺณนา ปเนตฺถ ปชาปติวาเร วุตฺตนเยเนว เวทิตพฺพาฯ

อาภสฺสรวาเร ทณฺฑทีปิกาย อจฺจิ วิย เอเตสํ สรีรโต อาภา ฉิชฺชิตฺวา ฉิชฺชิตฺวา ปตนฺตี วิย สรติ วิสรตีติ อาภสฺสราฯ

เตสํ คหเณน สพฺพาปิ ทุติยชฺฌานภูมิ คหิตา, เอกตลวาสิโน เอว เจเต สพฺเพปิ ปริตฺตาภา อปฺปมาณาภา อาภสฺสราติ เวทิตพฺพาฯ

สุภกิณฺหวาเร สุเภน โอกิณฺณา วิกิณฺณา สุเภน สรีรปฺปภาวณฺเณน เอกคฺฆนา สุวณฺณมญฺชูสาย ฐปิตสมฺปชฺชลิตกญฺจนปิณฺฑสสฺสิริกาติ สุภกิณฺหาฯ เตสํ คหเณน สพฺพาปิ ตติยชฺฌานภูมิ คหิตาฯ เอกตลวาสิโน เอว เจเต สพฺเพปิ ปริตฺตสุภา อปฺปมาณสุภา สุภกิณฺหาติ เวทิตพฺพาฯ

เวหปฺผลวาเร, วิปุลา ผลาติ เวหปฺผลาฯ จตุตฺถชฺฌานภูมิ พฺรหฺมาโน วุจฺจนฺติฯ อตฺถนยโยชนา ปน อิเมสุ ตีสุปิ วาเรสุ ภูตวาเร วุตฺตนเยเนว เวทิตพฺพาฯ

อภิภูวาเร อภิภวีติ อภิภูฯ กิํ อภิภวิ? จตฺตาโร ขนฺเธ อรูปิโนฯ อสญฺญภวสฺเสตํ อธิวจนํฯ อสญฺญสตฺตา เทวา เวหปฺผเลหิ สทฺธิํ เอกตลาเยว เอกสฺมิํ โอกาเส เยน อิริยาปเถน นิพฺพตฺตา, เตเนว ยาวตายุกํ ติฏฺฐนฺติ จิตฺตกมฺมรูปสทิสา หุตฺวาฯ เต อิธ สพฺเพปิ อภิภูวจเนน คหิตาฯ เกจิ อภิภู นาม สหสฺโส พฺรหฺมาติ เอวมาทินา นเยน ตตฺถ ตตฺถ อธิปติพฺรหฺมานํ วณฺณยนฺติฯ พฺรหฺมคฺคหเณเนว ปน ตสฺส คหิตตฺตา อยุตฺตเมตนฺติ เวทิตพฺพํฯ โยชนานโย เจตฺถ อภิภู วณฺณวา ทีฆายุโกติ สุตฺวา ตตฺถ ฉนฺทราคํ อุปฺปาเทนฺโต อภิภุํ ตณฺหามญฺญนาย มญฺญติฯ ‘‘อโห วตาหํ อภิภุโน สหพฺยตํ อุปปชฺเชยฺย’’นฺติอาทินา ปน นเยน อปฺปฏิลทฺธสฺส ปฏิลาภาย จิตฺตํ ปณิทหนฺโตปิ อภิภุํ ตณฺหามญฺญนาย มญฺญติฯ อตฺตานํ หีนโต อภิภุํ เสยฺยโต ทหนฺโต ปน อภิภุํ มานมญฺญนาย มญฺญติฯ ‘‘อภิภู นิจฺโจ ธุโว’’ติอาทินา นเยน ปรามสนฺโต อภิภุํ ทิฏฺฐิมญฺญนาย มญฺญตีติ เวทิตพฺโพฯ เสสํ ปชาปติวาเร วุตฺตนยเมวฯ

ภูตวาราทิวณฺณนา นิฏฺฐิตาฯ

อากาสานญฺจายตนวาราทิวณฺณนา

[4] เอวํ ภควา ปฏิปาฏิยา เทวโลเก ทสฺเสนฺโตปิ อภิภูวจเนน อสญฺญภวํ ทสฺเสตฺวา อิทานิ ยสฺมา อยํ วฏฺฏกถา, สุทฺธาวาสา จ วิวฏฺฏปกฺเข ฐิตา, อนาคามิขีณาสวา เอว หิ เต เทวาฯ ยสฺมา วา กติปยกปฺปสหสฺสายุกา เต เทวา, พุทฺธุปฺปาทกาเลเยว โหนฺติฯ พุทฺธา ปน อสงฺเขเยปิ กปฺเป น อุปฺปชฺชนฺติ, ตทา สุญฺญาปิ สา ภูมิ โหติฯ รญฺโญ ขนฺธาวารฏฺฐานํ วิย หิ พุทฺธานํ สุทฺธาวาสภโวฯ เต เตเนว จ การเณน วิญฺญาณฏฺฐิติสตฺตาวาสวเสนปิ น คหิตา, สพฺพกาลิกา ปน อิมา มญฺญนาฯ ตสฺมา ตาสํ สทาวิชฺชมานภูมิํ ทสฺเสนฺโต สุทฺธาวาเส อติกฺกมิตฺวา, อากาสานญฺจายตนนฺติอาทิมาหฯ ตตฺถ อากาสานญฺจายตนนฺติ ตพฺภูมิกา จตฺตาโร กุสลวิปากกิริยา ขนฺธาฯ เต จ ตตฺรูปปนฺนาเยว ทฏฺฐพฺพา ภวปริจฺเฉทกถา อยนฺติ กตฺวาฯ เอส นโย วิญฺญาณญฺจายตนาทีสุฯ อตฺถโยชนา ปน จตูสุปิ เอเตสุ วาเรสุ อภิภูวาเร วุตฺตนเยเนว เวทิตพฺพาฯ มานมญฺญนา เจตฺถ ปชาปติวาเร วุตฺตนเยนาปิ ยุชฺชติฯ

อากาสานญฺจายตนวาราทิวณฺณนา นิฏฺฐิตาฯ

ทิฏฺฐสุตวาราทิวณฺณนา

[5] เอวํ ภูมิวิเสสาทินา เภเทน วิตฺถารโตปิ มญฺญนาวตฺถุํ ทสฺเสตฺวา อิทานิ สพฺพมญฺญนาวตฺถุภูตํ สกฺกายปริยาปนฺนํ เตภูมกธมฺมเภทํ ทิฏฺฐาทีหิ จตูหิ สงฺคณฺหิตฺวา ทสฺเสนฺโต, ทิฏฺฐํ ทิฏฺฐโตติอาทิมาหฯ

ตตฺถ ทิฏฺฐนฺติ มํสจกฺขุนาปิ ทิฏฺฐํ, ทิพฺพจกฺขุนาปิ ทิฏฺฐํฯ รูปายตนสฺเสตํ อธิวจนํฯ ตตฺถ ทิฏฺฐํ มญฺญตีติ ทิฏฺฐํ ตีหิ มญฺญนาหิ มญฺญติฯ กถํ? รูปายตนํ สุภสญฺญาย สุขสญฺญาย จ ปสฺสนฺโต ตตฺถ ฉนฺทราคํ ชเนติ, ตํ อสฺสาเทติ อภินนฺทติฯ วุตฺตมฺปิ เหตํ ภควตา ‘‘อิตฺถิรูเป, ภิกฺขเว, สตฺตา รตฺตา คิทฺธา คธิตา มุจฺฉิตา อชฺโฌสนฺนา, เต ทีฆรตฺตํ โสจนฺติ อิตฺถิรูปวสานุคา’’ติ (อ. นิ. 5.55)ฯ เอวํ ทิฏฺฐํ ตณฺหามญฺญนาย มญฺญติฯ ‘‘อิติ เม รูปํ สิยา อนาคตมทฺธานนฺติ วา ปเนตฺถ นนฺทิํ สมนฺนาเนติ, รูปสมฺปทํ วา ปน อากงฺขมาโน ทานํ เทตี’’ติ วิตฺถาโรฯ เอวมฺปิ ทิฏฺฐํ ตณฺหามญฺญนาย มญฺญติฯ อตฺตโน ปน ปรสฺส จ รูปสมฺปตฺติํ วิปตฺติํ นิสฺสาย มานํ ชเนติฯ ‘‘อิมินาหํ เสยฺโยสฺมี’’ติ วา ‘‘สทิโสสฺมี’’ติ วา ‘‘หีโนสฺมี’’ติ วาติ เอวํ ทิฏฺฐํ มานมญฺญนาย มญฺญติฯ รูปายตนํ ปน นิจฺจํ ธุวํ สสฺสตนฺติ มญฺญติ, อตฺตานํ อตฺตนิยนฺติ มญฺญติ, มงฺคลํ อมงฺคลนฺติ มญฺญติ, เอวํ ทิฏฺฐํ ทิฏฺฐิมญฺญนาย มญฺญติฯ เอวํ ทิฏฺฐํ ตีหิ มญฺญนาหิ มญฺญติฯ