4. จตุตฺถสิกฺขาปทวณฺณนา
[1037] จตุตฺเถ – สพฺพํ อุตฺตานเมวฯ จตุสมุฏฺฐานํ – กายโต กายวาจโต กายจิตฺตโต กายวาจาจิตฺตโต จ สมุฏฺฐาติฯ นิมนฺติตาย อนาปุจฺฉา ภุญฺชนฺติยา อาปตฺติสมฺภวโต สิยา กิริยากิริยํ, ปวาริตาย กปฺปิยํ กาเรตฺวาปิ อกาเรตฺวาปิ ภุญฺชนฺติยา อาปตฺติสมฺภวโต สิยา กิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, วจีกมฺมํ, ติจิตฺตํ, ติเวทนนฺติฯ
จตุตฺถสิกฺขาปทํฯ
5. ปญฺจมสิกฺขาปทวณฺณนา
[1043] ปญฺจเม – กุเล มจฺฉโร กุลมจฺฉโร, กุลมจฺฉโร เอติสฺสา อตฺถีติ กุลมจฺฉรินี กุลํ วา มจฺฉรายตีติ กุลมจฺฉรินีฯ กุลสฺส อวณฺณนฺติ ตํ กุลํ อสฺสทฺธํ อปฺปสนฺนนฺติฯ ภิกฺขุนีนํ อวณฺณนฺติ ภิกฺขุนิโย ทุสฺสีลา ปาปธมฺมาติฯ
[1045] สนฺตํเยว อาทีนวนฺติ กุลสฺส วา ภิกฺขุนีนํ วา สนฺตํ อคุณํฯ เสสํ อุตฺตานเมวฯ ติสมุฏฺฐานํ – กิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, วจีกมฺมํ, อกุสลจิตฺตํ ทุกฺขเวทนนฺติฯ
ปญฺจมสิกฺขาปทํฯ
6. ฉฏฺฐสิกฺขาปทวณฺณนา
[1048] ฉฏฺเฐ – โอวาทายาติ ครุธมฺมตฺถายฯ สํวาสายาติ อุโปสถปวารณาปุจฺฉนตฺถายฯ อยเมตฺถ สงฺเขโปฯ วิตฺถาโร ปน ภิกฺขุโนวาทกสิกฺขาปทวณฺณนายํ วุตฺโตเยวฯ
เอฬกโลมสมุฏฺฐานํ – กิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, ติจิตฺตํ, ติเวทนนฺติฯ
ฉฏฺฐสิกฺขาปทํฯ
7. สตฺตมสิกฺขาปทวณฺณนา
[1053] สตฺตเม – ปริเยสิตฺวา น ลภตีติ ภิกฺขุนิํ น ลภติฯ เสสํ อุตฺตานเมวฯ อิมสฺสาปิ วิตฺถาโร ภิกฺขุโนวาทเก วุตฺโตเยวฯ
ธุรนิกฺเขปสมุฏฺฐานํ – อกิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, วจีกมฺมํ, อกุสลจิตฺตํ, ทุกฺขเวทนนฺติฯ
สตฺตมสิกฺขาปทํฯ
8. อฏฺฐมสิกฺขาปทวณฺณนา
[1056] อฏฺฐเม – เอกกมฺมนฺติอาทีหิ อุโปสถปวารณาเยว วุตฺตาฯ เสสํ อุตฺตานเมวฯ อิมสฺสาปิ วิตฺถาโร ภิกฺขุโนวาทเก วุตฺโตเยวฯ
ปฐมปาราชิกสมุฏฺฐานํ – อกิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, อกุสลจิตฺตํ, ทุกฺขเวทนนฺติฯ
อฏฺฐมสิกฺขาปทํฯ
9. นวมสิกฺขาปทวณฺณนา
[1058] นวเม – สพฺพํ อุตฺตานเมวฯ อิมสฺสาปิ วิตฺถาโร ภิกฺขุโนวาทเก วุตฺโตเยวฯ
ธุรนิกฺเขปสมุฏฺฐานํ – อกิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, วจีกมฺมํ, อกุสลจิตฺตํ, ทุกฺขเวทนนฺติฯ
นวมสิกฺขาปทํฯ
10. ทสมสิกฺขาปทวณฺณนา
[1062] ทสเม – ปสาเขติ อโธกาเยฯ อโธกาโย หิ ยสฺมา ตโต รุกฺขสฺส สาขา วิย อุโภ อูรู ปภิชฺชิตฺวา คตา, ตสฺมา ปสาโขติ วุจฺจติฯ
[1065] ภินฺทาติอาทีสุ สเจ ‘‘ภินฺท, ผาเลหี’’ติ สพฺพานิ อาณาเปติ, โส จ ตเถว กโรติ, ฉ อาณตฺติทุกฺกฏานิ ฉ จ ปาจิตฺติยานิ อาปชฺชติฯ