เมนู

ปญฺจมนิสฺสคฺคิยปาจิตฺติยสิกฺขาปทวณฺณนา

[753] ปญฺจเม น เม สิกฺขมาเนติ อิทํ กิร สา กุลธีตา ‘‘อยํ อทฺธา เอวํ วุตฺตา อิทํ เตลํ ฐเปตฺวา สปฺปิมฺปิ เม อตฺตโน กุลฆรา อาหริสฺสตี’’ติ มญฺญมานา อาหฯ เจตาเปตฺวาติ ชานาเปตฺวา อิจฺเจว อตฺโถฯ เสสํ สพฺพตฺถ จตุตฺถสทิสเมวาติฯ

ปญฺจมสิกฺขาปทํฯ

ฉฏฺฐนิสฺสคฺคิยปาจิตฺติยสิกฺขาปทวณฺณนา

[758] ฉฏฺเฐ ฉนฺทกนฺติ ‘‘อิทํ นาม ธมฺมกิจฺจํ กริสฺสาม, ยํ สกฺโกถ; ตํ เทถา’’ติ เอวํ ปเรสํ ฉนฺทญฺจ รุจิญฺจ อุปฺปาเทตฺวา คหิตปริกฺขารสฺเสตํ อธิวจนํฯ อญฺญทตฺถิเกนาติ อญฺญสฺสตฺถาย ทินฺเนนฯ อญฺญุทฺทิสิเกนาติ อญฺญํ อุทฺทิสิตฺวา ทินฺเนนฯ สงฺฆิเกนาติ สงฺฆสฺส ปริจฺจตฺเตนฯ

[762] เสสกํ อุปเนตีติ ยทตฺถาย ทินฺโน, ตํ เจตาเปตฺวา อวเสสํ อญฺญสฺสตฺถาย อุปเนติฯ สามิเก อปโลเกตฺวาติ ‘‘ตุมฺเหหิ จีวรตฺถาย ทินฺโน, อมฺหากญฺจ จีวรํ อตฺถิ, เตลาทีหิ ปน อตฺโถ’’ติ เอวํ อาปุจฺฉิตฺวา อุปเนติฯ อาปทาสูติ ตถารูเปสุ อุปทฺทเวสุ; ภิกฺขุนิโย วิหารํ ฉฑฺเฑตฺวา ปกฺกมนฺติ, เอวรูปาสุ อาปทาสุ ยํ วา ตํ วา เจตาเปตุํ วฏฺฏติฯ เสสํ อุตฺตานเมวฯ

ฉสมุฏฺฐานํ – กิริยากิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, วจีกมฺมํ, ติจิตฺตํ, ติเวทนนฺติฯ

ฉฏฺฐสิกฺขาปทํฯ

สตฺตมนิสฺสคฺคิยปาจิตฺติยสิกฺขาปทวณฺณนา

[764] สตฺตเม – สญฺญาจิเกนาติ สยํ ยาจิตเกนฯ เอตเทเวตฺถ นานากรณํฯ เสสํ ฉฏฺฐสทิสเมวาติฯ

สตฺตมสิกฺขาปทํฯ

อฏฺฐมนิสฺสคฺคิยปาจิตฺติยสิกฺขาปทวณฺณนา

[769] อฏฺฐเม มหาชนิเกนาติ คณสฺส ปริจฺจตฺเตนฯ เอตเทเวตฺถ นานากรณํฯ

อฏฺฐมสิกฺขาปทํฯ

นวมนิสฺสคฺคิยปาจิตฺติยสิกฺขาปทวณฺณนา

[774] นวมสิกฺขาปเท – สญฺญาจิเกนาติ อิทํ ปทํ อิโต อธิกตรํฯ

นวมสิกฺขาปทํฯ

ทสมนิสฺสคฺคิยปาจิตฺติยสิกฺขาปทวณฺณนา

[778] ทสเม – ปริเวณํ อุนฺทฺริยตีติ ปริเวณํ วินสฺสติ; ปริปตตีติ อตฺโถฯ อิทญฺจ ปทํ ปุคฺคลิเกน สญฺญาจิเกนาติ อิทญฺจ เอตฺตกเมว นานากรณํฯ เสสํ ปุพฺพสทิสเมวาติฯ

ทสมสิกฺขาปทํฯ

เอกาทสมนิสฺสคฺคิยปาจิตฺติยสิกฺขาปทวณฺณนา

[784] เอกาทสเม ครุปาวุรณนฺติ สีตกาเล ปาวุรณํฯ จตุกฺกํสปรมนฺติ เอตฺถ กํโส นาม จตุกฺกหาปณิโก โหติ; ตสฺมา ปทภาชเน ‘‘โสฬสกหาปณคฺฆนก’’นฺติ วุตฺตํฯ

เอกาทสมสิกฺขาปทํฯ

ทฺวาทสมนิสฺสคฺคิยปาจิตฺติยสิกฺขาปทวณฺณนา

[789] ทฺวาทสเม – ลหุปาวุรณนฺติ อุณฺหกาเล ปาวุรณํฯ เสสํ สิกฺขาปททฺวเยปิ อุตฺตานเมวฯ