9. นวมสงฺฆาทิเสสสิกฺขาปทวณฺณนา

[723] นวเม – สํสฏฺฐาติ มิสฺสีภูตาฯ อนนุโลมิเกนาติ ปพฺพชิตานํ อนนุโลเมน กายิกวาจสิเกนฯ สํสฏฺฐาติ คิหีนํ โกฏฺฏนปจนคนฺธปิสนมาลาคนฺถนาทินา กายิเกน สาสนปฏิสาสนาหรณสญฺจริตฺตาทินา วาจสิเกน จ สํสฏฺฐาฯ ปาโป กิตฺติสทฺโท เอตาสนฺติ ปาปสทฺทา ฯ ปาโป อาชีวสงฺขาโต สิโลโก เอตาสนฺติ ปาปสิโลกาฯ เสสํ อุตฺตานเมว สทฺธิํ สมุฏฺฐานาทีหีติฯ

นวมสิกฺขาปทํฯ

10. ทสมสงฺฆาทิเสสสิกฺขาปทวณฺณนา

[727] ทสเม – เอวาจาราติ เอวํอาจาราฯ ยาทิโส ตุมฺหากํ อาจาโร, ตาทิสา อาจาราติ อตฺโถฯ เอส นโย สพฺพตฺถฯ อุญฺญายาติ อวญฺญาย นีจํ กตฺวา ชานนายฯ ปริภเวนาติ กิํ อิมา กริสฺสนฺตีติ เอวํ ปริภวิตฺวา ชานเนนฯ อกฺขนฺติยาติ อสหนตาย; โกเธนาติ อตฺโถฯ เวภสฺสิยาติ พลวภสฺสภาเวน; อตฺตโน พลปฺปกาสเนน สมุตฺราสเนนาติ อตฺโถฯ ทุพฺพลฺยาติ ตุมฺหากํ ทุพฺพลภาเวนฯ สพฺพตฺถ อุญฺญาย จ ปริภเวน จาติ เอวํ สมุจฺจยตฺโถ ทฏฺฐพฺโพฯ วิวิจฺจถาติ วินา โหถฯ เสสํ อุตฺตานเมว สทฺธิํ สมุฏฺฐานาทีหีติฯ

ทสมสิกฺขาปทํฯ

อุทฺทิฏฺฐา โข อยฺยาโย สตฺตรส สงฺฆาทิเสสาติ เอตฺถ ฉนฺนํ ปฐมาปตฺติกานํ อนนฺตรา สญฺจริตฺตํ, ทฺเว ทุฏฺฐโทสาติ อิมานิ ตีณิ สิกฺขาปทานิ มหาวิภงฺคโต ปกฺขิปิตฺวา นว ปฐมาปตฺติกา, จตุนฺนํ ยาวตติยกานํ อนนฺตรา มหาวิภงฺคโตปิ จตฺตาโร ยาวตติยเก ปกฺขิปิตฺวา อฏฺฐ ยาวตติยกา เวทิตพฺพาฯ เอวํ สพฺเพปิ ปาติโมกฺขุทฺเทสมคฺเคน อุทฺทิฏฺฐา โข อยฺยาโย สตฺตรส สงฺฆาทิเสสา ธมฺมาติ เอวเมตฺถ อตฺโถ ทฏฺฐพฺโพฯ เสสํ อุตฺตานเมว อญฺญตฺร ปกฺขมานตฺตาฯ ตํ ปน ขนฺธเก วิตฺถาเรน วณฺณยิสฺสามาติฯ

สมนฺตปาสาทิกาย วินยสํวณฺณนาย ภิกฺขุนีวิภงฺเค

สตฺตรสกวณฺณนา นิฏฺฐิตาฯ

สงฺฆาทิเสสกณฺฑํ นิฏฺฐิตํฯ

3. นิสฺสคฺคิยกณฺฑํ (ภิกฺขุนีวิภงฺควณฺณนา)

ปฐมนิสฺสคฺคิยปาจิตฺติยสิกฺขาปทวณฺณนา

ติํส นิสฺสคฺคิยา ธมฺมา, ภิกฺขุนีนํ ปกาสิตา;

เย เตสํ ทานิ ภวติ, อยํ สํวณฺณนากฺกโมฯ

[733] อามตฺติกาปณนฺติ อมตฺตานิ วุจฺจนฺติ ภาชนานิ; ตานิ เย วิกฺกิณนฺติ, เต วุจฺจนฺติ อามตฺติกา; เตสํ อาปโณ อามตฺติกาปโณ; ตํ วา ปสาเรสฺสนฺตีติ อตฺโถฯ

[734] ปตฺตสนฺนิจยํ กเรยฺยาติ ปตฺตสนฺนิธิํ กเรยฺย; เอกาหํ อนธิฏฺฐหิตฺวา วา อวิกปฺเปตฺวา วา ปตฺตํ ฐเปยฺยาติ อตฺโถฯ เสสํ มหาวิภงฺเค วุตฺตนเยเนว เวทิตพฺพํฯ อยเมว หิ วิเสโส – ตตฺถ ทสาหํ ปริหาโร, อิธ เอกาหมฺปิ นตฺถิฯ เสสํ ตาทิสเมวฯ

อิทมฺปิ กถินสมุฏฺฐานํ – กายวาจโต กายวาจาจิตฺตโต จ สมุฏฺฐาติ, อกิริยํ, โนสญฺญาวิโมกฺขํ, อจิตฺตกํ, ปณฺณตฺติวชฺชํ, กายกมฺมํ, วจีกมฺมํ, ติจิตฺตํ, ติเวทนนฺติฯ

ปฐมสิกฺขาปทํฯ

ทุติยนิสฺสคฺคิยปาจิตฺติยสิกฺขาปทวณฺณนา

[738] ทุติเย – ทุจฺโจฬาติ วิรูปโจฬา; ชิณฺณโจฬาติ อตฺโถฯ อปยฺยาหีติ อปิ อยฺยาหิฯ

[740] อาทิสฺส ทินฺนนฺติ สมฺปตฺตา ภาเชนฺตูติ วตฺวาปิ อิทํ คณสฺส อิทํ ตุมฺหากํ ทมฺมีติ วตฺวา วา ทาตุกมฺยตาย ปาทมูเล ฐเปตฺวา วา ทินฺนมฺปิ อาทิสฺส ทินฺนํ นาม โหติฯ เอตํ สพฺพมฺปิ อกาลจีวรํฯ อยฺยาย ทมฺมีติ เอวํ ปฏิลทฺธํ ปน ยถาทาเนเยว อุปเนตพฺพํฯ เสสํ อุตฺตานเมวฯ

ติสมุฏฺฐานํ – กิริยํ, สญฺญาวิโมกฺขํ, สจิตฺตกํ, โลกวชฺชํ, กายกมฺมํ, วจีกมฺมํ, อกุสลจิตฺตํ, ติเวทนนฺติฯ

ทุติยสิกฺขาปทํฯ