เมนู

นกุสลญฺจ นอพฺยากตญฺจ ธมฺมํ ปฏิจฺจ อกุสโล ธมฺโม อุปฺปชฺชติ เหตุปจฺจยาฯ นกุสลญฺจ นอพฺยากตญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ เหตุปจฺจยาฯ นกุสลญฺจ นอพฺยากตญฺจ ธมฺมํ ปฏิจฺจ อกุสโล จ อพฺยากโต จ ธมฺมา อุปฺปชฺชนฺติ เหตุปจฺจยาฯ ตีณิฯ

นอกุสลญฺจ นอพฺยากตญฺจ ธมฺมํ ปฏิจฺจ กุสโล ธมฺโม อุปฺปชฺชติ เหตุปจฺจยาฯ นอกุสลญฺจ นอพฺยากตญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ เหตุปจฺจยาฯ นอกุสลญฺจ นอพฺยากตญฺจ ธมฺมํ ปฏิจฺจ กุสโล จ อพฺยากโต จ ธมฺมา อุปฺปชฺชนฺติ เหตุปจฺจยาฯ ตีณิฯ

นกุสลญฺจ นอกุสลญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ เหตุปจฺจยาฯ เอกํฯ

[2] นกุสลํ ธมฺมํ ปฏิจฺจ อกุสโล ธมฺโม อุปฺปชฺชติ อารมฺมณปจฺจยาฯ นกุสลํ ธมฺมํ ปฏิจฺจ อพฺยากโต ธมฺโม อุปฺปชฺชติ อารมฺมณปจฺจยาฯ ทฺเวฯ

นอกุสลํ ธมฺมํ ปฏิจฺจ กุสโล ธมฺโม อุปฺปชฺชติ อารมฺมณปจฺจยาฯ นอกุสลํ ธมฺมํ ปฏิจฺจ อพฺยากโต ธมฺโม อุปฺปชฺชติ อารมฺมณปจฺจยาฯ ทฺเวฯ

นอพฺยากตํ ธมฺมํ ปฏิจฺจ กุสโล ธมฺโม อุปฺปชฺชติ อารมฺมณปจฺจยาฯ นอพฺยากตํ ธมฺมํ ปฏิจฺจ อกุสโล ธมฺโม อุปฺปชฺชติ อารมฺมณปจฺจยาฯ ทฺเวฯ

นกุสลญฺจ นอพฺยากตญฺจ ธมฺมํ ปฏิจฺจ อกุสโล ธมฺโม อุปฺปชฺชติ อารมฺมณปจฺจยาฯ เอกํฯ

นอกุสลญฺจ นอพฺยากตญฺจ ธมฺมํ ปฏิจฺจ กุสโล ธมฺโม อุปฺปชฺชติ อารมฺมณปจฺจยาฯ เอกํฯ

นกุสลญฺจ นอกุสลญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ อารมฺมณปจฺจยาฯ เอกํฯ เหตุยา อฏฺฐารส, อารมฺมเณ นว, อธิปติยา อฏฺฐารส…เป.… อวิคเต อฏฺฐารสฯ

ปจฺจนียํ

นเหตุ-นอารมฺมณปจฺจยา

[3] นกุสลํ ธมฺมํ ปฏิจฺจ อกุสโล ธมฺโม อุปฺปชฺชติ นเหตุปจฺจยาฯ นกุสลํ ธมฺมํ ปฏิจฺจ อพฺยากโต ธมฺโม อุปฺปชฺชติ นเหตุปจฺจยา…เป.… นกุสลญฺจ นอกุสลญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ นเหตุปจฺจยาฯ

[4] นกุสลํ ธมฺมํ ปฏิจฺจ อพฺยากโต ธมฺโม อุปฺปชฺชติ นอารมฺมณปจฺจยา…เป.… นกุสลญฺจ นอกุสลญฺจ ธมฺมํ ปฏิจฺจ อพฺยากโต ธมฺโม อุปฺปชฺชติ นอารมฺมณปจฺจยาฯ (สํขิตฺตํฯ)

[5] นเหตุยา ฉ, นอารมฺมเณ ฉ, นอธิปติยา อฏฺฐารส…เป.… โนวิคเต ฉฯ

เหตุปจฺจยา นอารมฺมเณ ฉ… (สํขิตฺตํ)ฯ

นเหตุปจฺจยา อารมฺมเณ ฉ… (สํขิตฺตํ)ฯ

(สหชาตวาโร ปฏิจฺจวารสทิโส)ฯ

3-6. ปจฺจยวาราทิ

[6] นกุสลํ ธมฺมํ ปจฺจยา กุสโล ธมฺโม อุปฺปชฺชติ เหตุปจฺจยาฯ นกุสลํ ธมฺมํ ปจฺจยา อกุสโล ธมฺโม อุปฺปชฺชติ เหตุปจฺจยาฯ นกุสลํ ธมฺมํ ปจฺจยา อพฺยากโต ธมฺโม อุปฺปชฺชติ เหตุปจฺจยาฯ นกุสลํ ธมฺมํ ปจฺจยา กุสโล จ อพฺยากโต จ ธมฺมา อุปฺปชฺชนฺติ เหตุปจฺจยาฯ นกุสลํ ธมฺมํ ปจฺจยา อกุสโล จ อพฺยากโต จ ธมฺมา อุปฺปชฺชนฺติ เหตุปจฺจยาฯ ปญฺจฯ

นอกุสลํ ธมฺมํ ปจฺจยา อกุสโล ธมฺโม อุปฺปชฺชติ เหตุปจฺจยา… ปญฺจฯ

นอพฺยากตํ ธมฺมํ ปจฺจยา อพฺยากโต ธมฺโม อุปฺปชฺชติ เหตุปจฺจยา… ปญฺจฯ

นกุสลญฺจ นอพฺยากตญฺจ ธมฺมํ ปจฺจยา… ตีณิฯ

นอกุสลญฺจ นอพฺยากตญฺจ ธมฺมํ ปจฺจยา… ตีณิฯ นกุสลญฺจ นอกุสลญฺจ ธมฺมํ ปจฺจยา กุสโล ธมฺโม อุปฺปชฺชติ เหตุปจฺจยา… ปญฺจฯ (สํขิตฺตํฯ) เหตุยา ฉพฺพีสติ, อารมฺมเณ เตรส…เป.… อวิคเต ฉพฺพีสติฯ

สํสฏฺฐวาเร เหตุยา นว…เป.… อวิคเต นวฯ (สํขิตฺตํฯ)

7. ปญฺหาวาโร