อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นอกุสโล นสุขาย เวทนาย สมฺปยุตฺโต ธมฺโม อุปฺปชฺชติ เหตุปจฺจยาฯ อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต จ นอกุสโล นสุขาย เวทนาย สมฺปยุตฺโต จ ธมฺมา อุปฺปชฺชนฺติ เหตุปจฺจยาฯ ตีณิฯ (สํขิตฺตํฯ)

เหตุยา เตรส, อารมฺมเณ นว…เป.… อวิคเต เตรสฯ

ปจฺจนียํ

นเหตุนอารมฺมณปจฺจยาทิ

[2] อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต ธมฺโม อุปฺปชฺชติ นเหตุปจฺจยา … ตีณิฯ

[3] กุสลํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต ธมฺโม อุปฺปชฺชติ นอารมฺมณปจฺจยาฯ กุสลํ สุขาย เวทนาย สมฺปยุตฺตํ ธมฺมํ ปฏิจฺจ นอกุสโล นสุขาย เวทนาย สมฺปยุตฺโต ธมฺโม อุปฺปชฺชติ นอารมฺมณปจฺจยาฯ กุสลํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต จ นอกุสโล นสุขาย เวทนาย สมฺปยุตฺโต จ ธมฺมา อุปฺปชฺชนฺติ นอารมฺมณปจฺจยาฯ ตีณิฯ

อกุสลํ สุขาย เวทนาย สมฺปยุตฺตํ ธมฺมํ ปฏิจฺจ นอกุสโล นสุขาย เวทนาย สมฺปยุตฺโต ธมฺโม อุปฺปชฺชติ นอารมฺมณปจฺจยา… ตีณิฯ

อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต ธมฺโม อุปฺปชฺชติ นอารมฺมณปจฺจยาฯ อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นอกุสโล นสุขาย เวทนาย สมฺปยุตฺโต ธมฺโม อุปฺปชฺชติ นอารมฺมณปจฺจยาฯ อพฺยากตํ สุขาย เวทนาย สมฺปยุตฺตํ ธมฺมํ ปฏิจฺจ นกุสโล นสุขาย เวทนาย สมฺปยุตฺโต จ นอกุสโล นสุขาย เวทนาย สมฺปยุตฺโต จ ธมฺมา อุปฺปชฺชนฺติ นอารมฺมณปจฺจยาฯ ตีณิฯ

[4] นเหตุยา ตีณิ, นอารมฺมเณ นว, นอธิปติยา เตรส…เป.… โนวิคเต นวฯ

เหตุปจฺจยา นอารมฺมเณ นวฯ

นเหตุปจฺจยา อารมฺมเณ ตีณิฯ

(สหชาตวารมฺปิ ปจฺจยวารมฺปิ นิสฺสยวารมฺปิ สํสฏฺฐวารมฺปิ สมฺปยุตฺตวารมฺปิ ปฏิจฺจวารสทิสํฯ)

[5] กุสโล สุขาย เวทนาย สมฺปยุตฺโต ธมฺโม นกุสลสฺส นสุขาย เวทนาย สมฺปยุตฺตสฺส ธมฺมสฺส เหตุปจฺจเยน ปจฺจโย…เป.…ฯ

อารมฺมเณ อฏฺฐารสฯ (ปญฺหาวารมฺปิ วิตฺถาเรตพฺพํฯ)

อกุสลปทํ

เหตุปจฺจโย

[6] อกุสลํ ทุกฺขาย เวทนาย สมฺปยุตฺตํ ธมฺมํ ปฏิจฺจ นอกุสโล นทุกฺขาย เวทนาย สมฺปยุตฺโต ธมฺโม อุปฺปชฺชติ เหตุปจฺจยาฯ อกุสลํ ทุกฺขาย เวทนาย สมฺปยุตฺตํ ธมฺมํ ปฏิจฺจ นกุสโล นทุกฺขาย เวทนาย สมฺปยุตฺโต ธมฺโม อุปฺปชฺชติ เหตุปจฺจยา…เป.… อกุสลํ ทุกฺขาย เวทนาย สมฺปยุตฺตํ ธมฺมํ ปฏิจฺจ นกุสโล นทุกฺขาย เวทนาย สมฺปยุตฺโต จ นอกุสโล นทุกฺขาย เวทนาย สมฺปยุตฺโต จ ธมฺมา อุปฺปชฺชนฺติ เหตุปจฺจยาฯ เหตุยา ปญฺจ, อารมฺมเณ ฉ…เป.… อวิคเต อฏฺฐฯ

อพฺยากตปทํ

ปจฺจนียํ

[7] อพฺยากตํ ทุกฺขาย เวทนาย สมฺปยุตฺตํ ธมฺมํ ปฏิจฺจ นกุสโล นทุกฺขาย เวทนาย สมฺปยุตฺโต ธมฺโม อุปฺปชฺชติ นเหตุปจฺจยาฯ อพฺยากตํ ทุกฺขาย เวทนาย สมฺปยุตฺตํ ธมฺมํ ปฏิจฺจ นอกุสโล นทุกฺขาย เวทนาย สมฺปยุตฺโต ธมฺโม อุปฺปชฺชติ นเหตุปจฺจยาฯ อพฺยากตํ ทุกฺขาย เวทนาย สมฺปยุตฺตํ ธมฺมํ ปฏิจฺจ นกุสโล นทุกฺขาย เวทนาย สมฺปยุตฺโต จ นอกุสโล นทุกฺขาย เวทนาย สมฺปยุตฺโต จ ธมฺมา อุปฺปชฺชนฺติ นเหตุปจฺจยาฯ

นเหตุยา ตีณิฯ (สหชาตวารมฺปิ…เป.… ปญฺหาวารมฺปิ วิตฺถาเรตพฺพํฯ)

[8] กุสลํ อทุกฺขมสุขาย เวทนาย สมฺปยุตฺตํ ธมฺมํ ปฏิจฺจ นกุสโล นอทุกฺขมสุขาย เวทนาย สมฺปยุตฺโต ธมฺโม อุปฺปชฺชติ เหตุปจฺจยาฯ (สํขิตฺตํฯ) เหตุยา เตรสฯ (สพฺพตฺถ วิตฺถาโร)ฯ

1-2. กุสลตฺติก-วิปากตฺติกํ