เมนู

[75] กุสโล อนาคตารมฺมโณ ธมฺโม กุสลสฺส อนาคตารมฺมณสฺส ธมฺมสฺส เหตุปจฺจเยน ปจฺจโยฯ (สํขิตฺตํฯ)

เหตุยา ตีณิ, อารมฺมเณ นว, อวิคเต ตีณิฯ (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

ปจฺจุปฺปนฺนารมฺมณปทํ

เหตุปจฺจโย

[76] กุสลํ ปจฺจุปฺปนฺนารมฺมณํ ธมฺมํ ปฏิจฺจ กุสโล ปจฺจุปฺปนฺนารมฺมโณ ธมฺโม อุปฺปชฺชติ เหตุปจฺจยาฯ (สํขิตฺตํฯ)

เหตุยา ตีณิ, อารมฺมเณ ตีณิ, อวิคเต ตีณิฯ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํฯ)

[77] กุสโล ปจฺจุปฺปนฺนารมฺมโณ ธมฺโม กุสลสฺส ปจฺจุปฺปนฺนารมฺมณสฺส ธมฺมสฺส เหตุปจฺจเยน ปจฺจโยฯ (1)

อกุสโล ปจฺจุปฺปนฺนารมฺมโณ ธมฺโม อกุสลสฺส ปจฺจุปฺปนฺนารมฺมณสฺส ธมฺมสฺส เหตุปจฺจเยน ปจฺจโยฯ (1)

อพฺยากโต ปจฺจุปฺปนฺนารมฺมโณ ธมฺโม อพฺยากตสฺส ปจฺจุปฺปนฺนารมฺมณสฺส ธมฺมสฺส เหตุปจฺจเยน ปจฺจโยฯ (1) (สํขิตฺตํฯ)

เหตุยา ตีณิ, อารมฺมเณ ฉ, อวิคเต ตีณิฯ (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

1-19. กุสลตฺติก-อชฺฌตฺตตฺติกํ

1-7. ปฏิจฺจวาราทิ

ปจฺจยจตุกฺกํ

[78] กุสลํ อชฺฌตฺตํ ธมฺมํ ปฏิจฺจ กุสโล อชฺฌตฺโต ธมฺโม อุปฺปชฺชติ เหตุปจฺจยา… ตีณิฯ

อกุสลํ อชฺฌตฺตํ ธมฺมํ ปฏิจฺจ อกุสโล อชฺฌตฺโต ธมฺโม อุปฺปชฺชติ เหตุปจฺจยา… ตีณิฯ

อพฺยากตํ อชฺฌตฺตํ ธมฺมํ ปฏิจฺจ อพฺยากโต อชฺฌตฺโต ธมฺโม อุปฺปชฺชติ เหตุปจฺจยา… ตีณิฯ