ปจฺจยจตุกฺกํ

[72] กุสลํ อตีตารมฺมณํ ธมฺมํ ปฏิจฺจ กุสโล อตีตารมฺมโณ ธมฺโม อุปฺปชฺชติ เหตุปจฺจยาฯ (1)

อกุสลํ อตีตารมฺมณํ ธมฺมํ ปฏิจฺจ อกุสโล อตีตารมฺมโณ ธมฺโม อุปฺปชฺชติ เหตุปจฺจยาฯ (1)

อพฺยากตํ อตีตารมฺมณํ ธมฺมํ ปฏิจฺจ อพฺยากโต อตีตารมฺมโณ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ตีณิ, อวิคเต ตีณิฯ (สํขิตฺตํฯ)

(สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํฯ)

[73] กุสโล อตีตารมฺมโณ ธมฺโม กุสลสฺส อตีตารมฺมณสฺส ธมฺมสฺส เหตุปจฺจเยน ปจฺจโยฯ (1)

อกุสโล อตีตารมฺมโณ ธมฺโม อกุสลสฺส อตีตารมฺมณสฺส ธมฺมสฺส เหตุปจฺจเยน ปจฺจโยฯ (1)

อพฺยากโต อตีตารมฺมโณ ธมฺโม อพฺยากตสฺส อตีตารมฺมณสฺส ธมฺมสฺส เหตุปจฺจเยน ปจฺจโยฯ (1) (สํขิตฺตํฯ)

เหตุยา ตีณิ, อารมฺมเณ นว, อวิคเต ตีณิฯ (สํขิตฺตํฯ ยถา กุสลตฺติเก ปญฺหาวารํ เอวํ วิตฺถาเรตพฺพํฯ)

อนาคตารมฺมณปทํ

เหตุปจฺจโย

[74] กุสลํ อนาคตารมฺมณํ ธมฺมํ ปฏิจฺจ กุสโล อนาคตารมฺมโณ ธมฺโม อุปฺปชฺชติ เหตุปจฺจยาฯ (สํขิตฺตํฯ)

เหตุยา ตีณิ, อารมฺมเณ ตีณิ, อวิคเต ตีณิฯ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํฯ)