[8] นเหตุํ สเหตุกํ ธมฺมํ ปฏิจฺจ นเหตุ นสเหตุโก ธมฺโม อุปฺปชฺชติ เหตุปจฺจยาฯ (สํขิตฺตํฯ)

เหตุยา นวฯ (สหชาตวารมฺปิ…เป.… ปญฺหาวารมฺปิ วิตฺถาเรตพฺพํฯ)

เหตุโคจฺฉกํ นิฏฺฐิตํฯ

7-8. สปฺปจฺจยทุกาทิ

1-7. ปฏิจฺจวาราทิ

[9] สปฺปจฺจยํ ธมฺมํ ปฏิจฺจ นอปฺปจฺจโย ธมฺโม อุปฺปชฺชติ เหตุปจฺจยาฯ (สํขิตฺตํฯ) เหตุยา เอกํฯ

[10] สปฺปจฺจโย ธมฺโม นอปฺปจฺจยสฺส ธมฺมสฺส อารมฺมณปจฺจเยน ปจฺจโยฯ

อปฺปจฺจโย ธมฺโม นอปฺปจฺจยสฺส ธมฺมสฺส อารมฺมณปจฺจเยน ปจฺจโยฯ (สงฺขตํ สปฺปจฺจยสทิสํฯ)

9. สนิทสฺสนทุกํ

1-7. ปฏิจฺจวาราทิ

[11] อนิทสฺสนํ ธมฺมํ ปฏิจฺจ นอนิทสฺสโน ธมฺโม อุปฺปชฺชติ เหตุปจฺจยาฯ อนิทสฺสนํ ธมฺมํ ปฏิจฺจ นสนิทสฺสโน ธมฺโม อุปฺปชฺชติ เหตุปจฺจยาฯ อนิทสฺสนํ ธมฺมํ ปฏิจฺจ นสนิทสฺสโน จ นอนิทสฺสโน จ ธมฺมา อุปฺปชฺชนฺติ เหตุปจฺจยาฯ (3) (สํขิตฺตํฯ)

เหตุยา ตีณิฯ (สพฺพตฺถ วิตฺถาโรฯ)

10. สปฺปฏิฆทุกํ

1-7. ปฏิจฺจวาราทิ

[12] สปฺปฏิฆํ ธมฺมํ ปฏิจฺจ นสปฺปฏิโฆ ธมฺโม อุปฺปชฺชติ เหตุปจฺจยาฯ สปฺปฏิฆํ ธมฺมํ ปฏิจฺจ นอปฺปฏิโฆ ธมฺโม อุปฺปชฺชติ เหตุปจฺจยาฯ สปฺปฏิฆํ ธมฺมํ ปฏิจฺจ นสปฺปฏิโฆ จ นอปฺปฏิโฆ จ ธมฺมา อุปฺปชฺชนฺติ เหตุปจฺจยาฯ (3)

อปฺปฏิฆํ ธมฺมํ ปฏิจฺจ นอปฺปฏิโฆ ธมฺโม อุปฺปชฺชติ เหตุปจฺจยาฯ อปฺปฏิฆํ ธมฺมํ ปฏิจฺจ นสปฺปฏิโฆ ธมฺโม อุปฺปชฺชติ เหตุปจฺจยาฯ อปฺปฏิฆํ ธมฺมํ ปฏิจฺจ นสปฺปฏิโฆ จ นอปฺปฏิโฆ จ ธมฺมา อุปฺปชฺชนฺติ เหตุปจฺจยาฯ (3)

สปฺปฏิฆญฺจ อปฺปฏิฆญฺจ ธมฺมํ ปฏิจฺจ นสปฺปฏิโฆ ธมฺโม อุปฺปชฺชติ เหตุปจฺจยาฯ สปฺปฏิฆญฺจ อปฺปฏิฆญฺจ ธมฺมํ ปฏิจฺจ นอปฺปฏิโฆ ธมฺโม อุปฺปชฺชติ เหตุปจฺจยาฯ สปฺปฏิฆญฺจ อปฺปฏิฆญฺจ ธมฺมํ ปฏิจฺจ นสปฺปฏิโฆ จ นอปฺปฏิโฆ จ ธมฺมา อุปฺปชฺชนฺติ เหตุปจฺจยาฯ (3) (สํขิตฺตํฯ)

เหตุยา นวฯ (สพฺพตฺถ วิตฺถาโรฯ)

11. รูปีทุกํ

1-7. ปฏิจฺจวาราทิ

[13] รูปิํ ธมฺมํ ปฏิจฺจ นรูปี ธมฺโม อุปฺปชฺชติ เหตุปจฺจยาฯ (สํขิตฺตํฯ)

เหตุยา นวฯ (สพฺพตฺถ วิตฺถาโรฯ)

12. โลกิยทุกํ

1-7. ปฏิจฺจวาราทิ

[14] โลกิยํ ธมฺมํ ปฏิจฺจ นโลกุตฺตโร ธมฺโม อุปฺปชฺชติ เหตุปจฺจยาฯ (1)

โลกุตฺตรํ ธมฺมํ ปฏิจฺจ นโลกุตฺตโร ธมฺโม อุปฺปชฺชติ เหตุปจฺจยาฯ โลกุตฺตรํ ธมฺมํ ปฏิจฺจ นโลกิโย ธมฺโม อุปฺปชฺชติ เหตุปจฺจยาฯ (โลกุตฺตรํ ธมฺมํ ปฏิจฺจ นโลกิโย จ นโลกุตฺตโร จ ธมฺมา อุปฺปชฺชนฺติ เหตุปจฺจยาฯ) [อยํ สงฺขฺยา วิจาเรตพฺพา, นโลกิยนโลกุตฺตรธมฺโม นาม นตฺถิ] (3)

โลกิยญฺจ โลกุตฺตรญฺจ ธมฺมํ ปฏิจฺจ นโลกุตฺตโร ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ปญฺจฯ (สพฺพตฺถ ปญฺจฯ)

13. เกนจิวิญฺเญยฺยทุกํ

1-7. ปฏิจฺจวาราทิ

[15] เกนจิ วิญฺเญยฺยํ ธมฺมํ ปฏิจฺจ นเกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ เกนจิ วิญฺเญยฺยํ ธมฺมํ ปฏิจฺจ นนเกนจิ วิญฺเญยฺโย ธมฺโม อุปฺปชฺชติ เหตุปจฺจยาฯ เกนจิ วิญฺเญยฺยํ ธมฺมํ ปฏิจฺจ นเกนจิ วิญฺเญยฺโย จ นนเกนจิ วิญฺเญยฺโย จ ธมฺมา อุปฺปชฺชนฺติ เหตุปจฺจยาฯ (3)

นเกนจิ วิญฺเญยฺยํ ธมฺมํ ปฏิจฺจ นนเกนจิ วิญฺเญยฺโย ธมฺโม อุปฺปชฺชติ เหตุปจฺจยา… ตีณิฯ