เมนู

เหตุปจฺจโย

[16] สุขาย เวทนาย สมฺปยุตฺโต ธมฺโม นสุขาย เวทนาย สมฺปยุตฺตสฺส ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นทุกฺขาย เวทนาย สมฺปยุตฺตสฺส ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นอทุกฺขมสุขาย เวทนาย สมฺปยุตฺตสฺส ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นสุขาย เวทนาย สมฺปยุตฺตสฺส จ นอทุกฺขมสุขาย เวทนาย สมฺปยุตฺตสฺส จ ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นทุกฺขาย เวทนาย สมฺปยุตฺตสฺส จ นอทุกฺขมสุขาย เวทนาย สมฺปยุตฺตสฺส จ ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นสุขาย เวทนาย สมฺปยุตฺตสฺส จ นทุกฺขาย เวทนาย สมฺปยุตฺตสฺส จ ธมฺมสฺส เหตุปจฺจเยน ปจฺจโยฯ สุขาย เวทนาย สมฺปยุตฺโต ธมฺโม นสุขาย เวทนาย สมฺปยุตฺตสฺส จ นทุกฺขาย เวทนาย สมฺปยุตฺตสฺส จ นอทุกฺขมสุขาย เวทนาย สมฺปยุตฺตสฺส จ ธมฺมสฺส เหตุปจฺจเยน ปจฺจโย ฯ (7) (สํขิตฺตํฯ)

เหตุยา เอกวีส, อารมฺมเณ เอกวีส…เป.… อวิคเต เอกวีสฯ (ปญฺหาวารํ วิตฺถาเรตพฺพํฯ)

3. วิปากตฺติกํ

1-6. ปฏิจฺจวาราทิ

ปจฺจยจตุกฺกํ

เหตุ-อารมฺมณปจฺจยา

[17] วิปากํ ธมฺมํ ปฏิจฺจ นวิปาโก ธมฺโม อุปฺปชฺชติ เหตุปจฺจยาฯ วิปากํ ธมฺมํ ปฏิจฺจ นวิปากธมฺมธมฺโม อุปฺปชฺชติ เหตุปจฺจยาฯ วิปากํ ธมฺมํ ปฏิจฺจ นเนววิปากนวิปากธมฺมธมฺโม อุปฺปชฺชติ เหตุปจฺจยาฯ วิปากํ ธมฺมํ ปฏิจฺจ นวิปากธมฺมธมฺโม จ นเนววิปากนวิปากธมฺมธมฺโม จ ธมฺมา อุปฺปชฺชนฺติ เหตุปจฺจยาฯ วิปากํ ธมฺมํ ปฏิจฺจ นวิปาโก จ นวิปากธมฺมธมฺโม จ ธมฺมา อุปฺปชฺชนฺติ เหตุปจฺจยาฯ (ปญฺจ ปญฺหาฯ)

[18] วิปากธมฺมธมฺมํ ปฏิจฺจ นวิปากธมฺมธมฺโม อุปฺปชฺชติ เหตุปจฺจยาฯ วิปากธมฺมธมฺมํ ปฏิจฺจ นวิปาโก ธมฺโม อุปฺปชฺชติ เหตุปจฺจยาฯ วิปากธมฺมธมฺมํ ปฏิจฺจ นเนววิปากนวิปากธมฺมธมฺโม อุปฺปชฺชติ เหตุปจฺจยาฯ วิปากธมฺมธมฺมํ ปฏิจฺจ นวิปาโก จ นเนววิปากนวิปากธมฺมธมฺโม จ ธมฺมา อุปฺปชฺชนฺติ เหตุปจฺจยาฯ วิปากธมฺมธมฺมํ ปฏิจฺจ นวิปาโก จ นวิปากธมฺมธมฺโม จ ธมฺมา อุปฺปชฺชนฺติ เหตุปจฺจยาฯ (ปญฺจ ปญฺหาฯ)