เมนู

เหตุ-อารมฺมณปจฺจยา

[31] นนเหตุ นอนิทสฺสนสปฺปฏิโฆ ธมฺโม นนเหตุสฺส นอนิทสฺสนสปฺปฏิฆสฺส ธมฺมสฺส เหตุปจฺจเยน ปจฺจโยฯ นนเหตุ นอนิทสฺสนสปฺปฏิโฆ ธมฺโม นเหตุสฺส นอนิทสฺสนสปฺปฏิฆสฺส ธมฺมสฺส เหตุปจฺจเยน ปจฺจโยฯ นนเหตุ นอนิทสฺสนสปฺปฏิโฆ ธมฺโม นเหตุสฺส นอนิทสฺสนสปฺปฏิฆสฺส จ นนเหตุสฺส นอนิทสฺสนสปฺปฏิฆสฺส จ ธมฺมสฺส เหตุปจฺจเยน ปจฺจโยฯ (3)

นเหตุ นอนิทสฺสนสปฺปฏิโฆ ธมฺโม นเหตุสฺส นอนิทสฺสนสปฺปฏิฆสฺส ธมฺมสฺส อารมฺมณปจฺจเยน ปจฺจโยฯ (สํขิตฺตํฯ)

เหตุยา ตีณิ, อารมฺมเณ นว…เป.… อุปนิสฺสเย นว, ปุเรชาเต ปจฺฉาชาเต ตีณิ, อาเสวเน นว, กมฺเม ตีณิ, วิปาเก นว, อาหาเร ตีณิ, อินฺทฺริเย นว, ฌาเน ตีณิ, มคฺเค สมฺปยุตฺเต นว, วิปฺปยุตฺเต ปญฺจ…เป.… อวิคเต นวฯ (ปญฺหาวารํ เอวํ วิตฺถาเรตพฺพํฯ)

[32] นเหตุํ นอนิทสฺสนอปฺปฏิฆํ ธมฺมํ ปฏิจฺจ นเหตุ นอนิทสฺสนอปฺปฏิโฆ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา เอกํฯ (สพฺพตฺถ วิตฺถาโรฯ)

2-3-1. สเหตุกทุกาทิ-กุสลตฺติกํ

[33] นสเหตุกํ นกุสลํ ธมฺมํ ปฏิจฺจ นสเหตุโก นกุสโล ธมฺโม อุปฺปชฺชติ เหตุปจฺจยา – วิจิกิจฺฉาสหคตํ อุทฺธจฺจสหคตํ โมหํ ปฏิจฺจ จิตฺตสมุฏฺฐานํ รูปํ, เอกํ มหาภูตํ ปฏิจฺจ ตโย มหาภูตา…เป.… ทฺเว มหาภูเต…เป.… นสเหตุกํ นกุสลํ ธมฺมํ ปฏิจฺจ นอเหตุโก นกุสโล ธมฺโม อุปฺปชฺชติ เหตุปจฺจยา – วิจิกิจฺฉาสหคตํ อุทฺธจฺจสหคตํ โมหํ ปฏิจฺจ สมฺปยุตฺตกา ขนฺธา; ปฏิสนฺธิกฺขเณ วตฺถุํ ปฏิจฺจ สเหตุกา ขนฺธาฯ นสเหตุกํ นกุสลํ ธมฺมํ ปฏิจฺจ นสเหตุโก นกุสโล จ นอเหตุโก นกุสโล จ ธมฺมา อุปฺปชฺชนฺติ เหตุปจฺจยาฯ (3)

นอเหตุกํ นกุสลํ ธมฺมํ ปฏิจฺจ นอเหตุโก นกุสโล ธมฺโม อุปฺปชฺชติ เหตุปจฺจยา… ตีณิฯ