[21] เหตุยา ตีณิ, อารมฺมเณ ตีณิ…เป.… อวิคเต ตีณิ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

[22] กุสโล สปฺปีติโก ธมฺโม กุสลสฺส สปฺปีติกสฺส ธมฺมสฺส เหตุปจฺจเยน ปจฺจโยฯ (1)

อกุสโล สปฺปีติโก ธมฺโม อกุสลสฺส สปฺปีติกสฺส ธมฺมสฺส เหตุปจฺจเยน ปจฺจโยฯ (1)

อพฺยากโต สปฺปีติโก ธมฺโม อพฺยากตสฺส สปฺปีติกสฺส ธมฺมสฺส เหตุปจฺจเยน ปจฺจโยฯ (1) (สํขิตฺตํฯ)

[23] เหตุยา ตีณิ, อารมฺมเณ นว…เป.… อวิคเต ตีณิ (สํขิตฺตํ)ฯ

อปฺปีติกปทํ

เหตุปจฺจโย

[24] กุสลํ อปฺปีติกํ ธมฺมํ ปฏิจฺจ กุสโล อปฺปีติโก ธมฺโม อุปฺปชฺชติ เหตุปจฺจยา… ตีณิฯ

อกุสลํ อปฺปีติกํ ธมฺมํ ปฏิจฺจ อกุสโล อปฺปีติโก ธมฺโม อุปฺปชฺชติ เหตุปจฺจยา… ตีณิฯ

อพฺยากตํ อปฺปีติกํ ธมฺมํ ปฏิจฺจ อพฺยากโต อปฺปีติโก ธมฺโม อุปฺปชฺชติ เหตุปจฺจยาฯ (1)

กุสลํ อปฺปีติกญฺจ อพฺยากตํ อปฺปีติกญฺจ ธมฺมํ ปฏิจฺจ อพฺยากโต อปฺปีติโก ธมฺโม อุปฺปชฺชติ เหตุปจฺจยาฯ (1)

อกุสลํ อปฺปีติกญฺจ อพฺยากตํ อปฺปีติกญฺจ ธมฺมํ ปฏิจฺจ อพฺยากโต อปฺปีติโก ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[25] เหตุยา นว, อารมฺมเณ ตีณิ…เป.… อวิคเต นว (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

[26] กุสโล อปฺปีติโก ธมฺโม กุสลสฺส อปฺปีติกสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ

เหตุยา สตฺต, อารมฺมเณ นว…เป.… อวิคเต เตรส (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํ)ฯ

1-90-92. กุสลตฺติก-ปีติสหคตาทิทุกานิ

1-7. ปฏิจฺจวาราทิ

ปจฺจยจตุกฺกํ

[27] กุสลํ ปีติสหคตํ ธมฺมํ ปฏิจฺจ กุสโล ปีติสหคโต ธมฺโม อุปฺปชฺชติ เหตุปจฺจยาฯ กุสลํ นปีติสหคตํ ธมฺมํ ปฏิจฺจ…เป.… กุสลํ สุขสหคตํ ธมฺมํ ปฏิจฺจ…เป.… กุสลํ นสุขสหคตํ ธมฺมํ ปฏิจฺจ…เป.… กุสลํ อุเปกฺขาสหคตํ ธมฺมํ ปฏิจฺจ…เป.… กุสลํ นอุเปกฺขาสหคตํ ธมฺมํ ปฏิจฺจ… (สํขิตฺตํ)ฯ

1-93. กุสลตฺติก-กามาวจรทุกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[28] กุสลํ กามาวจรํ ธมฺมํ ปฏิจฺจ กุสโล กามาวจโร ธมฺโม อุปฺปชฺชติ เหตุปจฺจยาฯ กุสลํ กามาวจรํ ธมฺมํ ปฏิจฺจ อพฺยากโต กามาวจโร ธมฺโม อุปฺปชฺชติ เหตุปจฺจยาฯ กุสลํ กามาวจรํ ธมฺมํ ปฏิจฺจ กุสโล กามาวจโร จ อพฺยากโต กามาวจโร จ ธมฺมา อุปฺปชฺชนฺติ เหตุปจฺจยาฯ (3)

อกุสลํ กามาวจรํ ธมฺมํ ปฏิจฺจ อกุสโล กามาวจโร ธมฺโม อุปฺปชฺชติ เหตุปจฺจยา… ตีณิฯ

อพฺยากตํ กามาวจรํ ธมฺมํ ปฏิจฺจ อพฺยากโต กามาวจโร ธมฺโม อุปฺปชฺชติ เหตุปจฺจยาฯ (1)

กุสลํ กามาวจรญฺจ อพฺยากตํ กามาวจรญฺจ ธมฺมํ ปฏิจฺจ อพฺยากโต กามาวจโร ธมฺโม อุปฺปชฺชติ เหตุปจฺจยาฯ (1)