เหตุปจฺจโย

[30] กุสลํ โลกิยํ ธมฺมํ ปฏิจฺจ กุสโล โลกิโย ธมฺโม อุปฺปชฺชติ เหตุปจฺจยาฯ กุสลํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ กุสลํ โลกิยํ ธมฺมํ ปฏิจฺจ กุสโล โลกิโย จ อพฺยากโต โลกิโย จ ธมฺมา อุปฺปชฺชนฺติ เหตุปจฺจยาฯ (3)

อกุสลํ โลกิยํ ธมฺมํ ปฏิจฺจ อกุสโล โลกิโย ธมฺโม อุปฺปชฺชติ เหตุปจฺจยา… ตีณิฯ

อพฺยากตํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ (1)

กุสลํ โลกิยญฺจ อพฺยากตํ โลกิยญฺจ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยาฯ (1)

อกุสลํ โลกิยญฺจ อพฺยากตํ โลกิยญฺจ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ เหตุปจฺจยา (1) (สํขิตฺตํฯ)

[31] เหตุยา นว, อารมฺมเณ ตีณิ…เป.… อวิคเต นว (สํขิตฺตํ)ฯ

ปจฺจนียํ

นเหตุปจฺจโย

[32] อกุสลํ โลกิยํ ธมฺมํ ปฏิจฺจ อกุสโล โลกิโย ธมฺโม อุปฺปชฺชติ นเหตุปจฺจยาฯ (1)

อพฺยากตํ โลกิยํ ธมฺมํ ปฏิจฺจ อพฺยากโต โลกิโย ธมฺโม อุปฺปชฺชติ นเหตุปจฺจยาฯ (1) (สํขิตฺตํฯ)

[33] นเหตุยา ทฺเว, นอารมฺมเณ ปญฺจ, นอธิปติยา นว…เป.… โนวิคเต ปญฺจ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

เหตุ-อารมฺมณปจฺจยา

[34] กุสโล โลกิโย ธมฺโม กุสลสฺส โลกิยสฺส ธมฺมสฺส เหตุปจฺจเยน ปจฺจโย… ตีณิฯ

อกุสโล โลกิโย ธมฺโม อกุสลสฺส โลกิยสฺส ธมฺมสฺส เหตุปจฺจเยน ปจฺจโย… ตีณิฯ

อพฺยากโต โลกิโย ธมฺโม อพฺยากตสฺส โลกิยสฺส ธมฺมสฺส เหตุปจฺจเยน ปจฺจโยฯ (1)

[35] กุสโล โลกิโย ธมฺโม กุสลสฺส โลกิยสฺส ธมฺมสฺส อารมฺมณปจฺจเยน ปจฺจโย… ตีณิฯ

อกุสโล โลกิโย ธมฺโม อกุสลสฺส โลกิยสฺส ธมฺมสฺส อารมฺมณปจฺจเยน ปจฺจโย… ตีณิฯ

อพฺยากโต โลกิโย ธมฺโม อพฺยากตสฺส โลกิยสฺส ธมฺมสฺส อารมฺมณปจฺจเยน ปจฺจโย… ตีณิ (สํขิตฺตํ)ฯ

[36] เหตุยา สตฺต, อารมฺมเณ นว, อธิปติยา นว…เป.… อวิคเต เตรส (สํขิตฺตํฯ ยถา กุสลตฺติเก ปญฺหาวารํ, เอวํ วิตฺถาเรตพฺพํ)ฯ

โลกุตฺตรปทํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[37] กุสลํ โลกุตฺตรํ ธมฺมํ ปฏิจฺจ กุสโล โลกุตฺตโร ธมฺโม อุปฺปชฺชติ เหตุปจฺจยาฯ (1)

อพฺยากตํ โลกุตฺตรํ ธมฺมํ ปฏิจฺจ อพฺยากโต โลกุตฺตโร ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[38] เหตุยา ทฺเว, อารมฺมเณ ทฺเว, อธิปติยา ทฺเว…เป.… อวิคเต ทฺเว (สํขิตฺตํ)ฯ

นอธิปติยา ทฺเว (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

เหตุอารมฺมณปจฺจยาทิ

[39] กุสโล โลกุตฺตโร ธมฺโม กุสลสฺส โลกุตฺตรสฺส ธมฺมสฺส เหตุปจฺจเยน ปจฺจโยฯ (1)

อพฺยากโต โลกุตฺตโร ธมฺโม อพฺยากตสฺส โลกุตฺตรสฺส ธมฺมสฺส เหตุปจฺจเยน ปจฺจโยฯ (1)

อพฺยากโต โลกุตฺตโร ธมฺโม อพฺยากตสฺส โลกุตฺตรสฺส ธมฺมสฺส อารมฺมณปจฺจเยน ปจฺจโยฯ อพฺยากโต โลกุตฺตโร ธมฺโม กุสลสฺส โลกุตฺตรสฺส ธมฺมสฺส อารมฺมณปจฺจเยน ปจฺจโยฯ (2)