ปจฺจนียํ –นเหตุปจฺจโย

[13] อกุสลํ อนิทสฺสนํ ธมฺมํ ปฏิจฺจ อกุสโล อนิทสฺสโน ธมฺโม อุปฺปชฺชติ นเหตุปจฺจยาฯ (1)

อพฺยากตํ อนิทสฺสนํ ธมฺมํ ปฏิจฺจ อพฺยากโต อนิทสฺสโน ธมฺโม อุปฺปชฺชติ นเหตุปจฺจยาฯ (1) (สํขิตฺตํฯ)

นเหตุยา ทฺเว, นอารมฺมเณ ปญฺจ, นอธิปติยา นว…เป.… โนวิคเต ปญฺจ (สํขิตฺตํฯ สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ)ฯ

เหตุ-อารมฺมณปจฺจยา

[14] กุสโล อนิทสฺสโน ธมฺโม กุสลสฺส อนิทสฺสนสฺส ธมฺมสฺส เหตุปจฺจเยน ปจฺจโย… ตีณิฯ

อกุสโล อนิทสฺสโน ธมฺโม อกุสลสฺส อนิทสฺสนสฺส ธมฺมสฺส เหตุปจฺจเยน ปจฺจโย… ตีณิฯ

อพฺยากโต อนิทสฺสโน ธมฺโม อพฺยากตสฺส อนิทสฺสนสฺส ธมฺมสฺส เหตุปจฺจเยน ปจฺจโยฯ (1)

[15] กุสโล อนิทสฺสโน ธมฺโม กุสลสฺส อนิทสฺสนสฺส ธมฺมสฺส อารมฺมณปจฺจเยน ปจฺจโย… ตีณิฯ

อกุสโล อนิทสฺสโน ธมฺโม อกุสลสฺส อนิทสฺสนสฺส ธมฺมสฺส อารมฺมณปจฺจเยน ปจฺจโย… ตีณิฯ

อพฺยากโต อนิทสฺสโน ธมฺโม อพฺยากตสฺส อนิทสฺสนสฺส ธมฺมสฺส อารมฺมณปจฺจเยน ปจฺจโย… ตีณิ (สํขิตฺตํ)ฯ

[16] เหตุยา สตฺต, อารมฺมเณ นว, อธิปติยา ทส, อนนฺตเร สตฺต…เป.… อุปนิสฺสเย นว…เป.… อวิคเต เตรส (สํขิตฺตํ)ฯ

(ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

1-10. กุสลตฺติก-สปฺปฏิฆทุกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[17] อพฺยากตํ สปฺปฏิฆํ ธมฺมํ ปฏิจฺจ อพฺยากโต สปฺปฏิโฆ ธมฺโม อุปฺปชฺชติ เหตุปจฺจยา (สํขิตฺตํ)ฯ

เหตุยา เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ…เป.… ปญฺหาวาเรปิ สพฺพตฺถ เอกํฯ)

[18] กุสลํ อปฺปฏิฆํ ธมฺมํ ปฏิจฺจ กุสโล อปฺปฏิโฆ ธมฺโม อุปฺปชฺชติ เหตุปจฺจยา… ตีณิฯ

อกุสลํ อปฺปฏิฆํ ธมฺมํ ปฏิจฺจ อกุสโล อปฺปฏิโฆ ธมฺโม อุปฺปชฺชติ เหตุปจฺจยา… ตีณิฯ

อพฺยากตํ อปฺปฏิฆํ ธมฺมํ ปฏิจฺจ อพฺยากโต อปฺปฏิโฆ ธมฺโม อุปฺปชฺชติ เหตุปจฺจยาฯ (1)

กุสลํ อปฺปฏิฆญฺจ อพฺยากตํ อปฺปฏิฆญฺจ ธมฺมํ ปฏิจฺจ อพฺยากโต อปฺปฏิโฆ ธมฺโม อุปฺปชฺชติ เหตุปจฺจยาฯ (1)

อกุสลํ อปฺปฏิฆญฺจ อพฺยากตํ อปฺปฏิฆญฺจ ธมฺมํ ปฏิจฺจ อพฺยากโต อปฺปฏิโฆ ธมฺโม อุปฺปชฺชติ เหตุปจฺจยาฯ (1)

อารมฺมณปจฺจโย

[19] กุสลํ อปฺปฏิฆํ ธมฺมํ ปฏิจฺจ กุสโล อปฺปฏิโฆ ธมฺโม อุปฺปชฺชติ อารมฺมณปจฺจยาฯ (1)

อกุสลํ อปฺปฏิฆํ ธมฺมํ ปฏิจฺจ อกุสโล อปฺปฏิโฆ ธมฺโม อุปฺปชฺชติ อารมฺมณปจฺจยาฯ (1)

อพฺยากตํ อปฺปฏิฆํ ธมฺมํ ปฏิจฺจ อพฺยากโต อปฺปฏิโฆ ธมฺโม อุปฺปชฺชติ อารมฺมณปจฺจยา ฯ (1) (สํขิตฺตํฯ)

[20] เหตุยา นว, อารมฺมเณ ตีณิ, อธิปติยา นว…เป.… อวิคเต นว (สํขิตฺตํ)ฯ

ปจฺจนียํ

นเหตุปจฺจโย

[21] อกุสลํ อปฺปฏิฆํ ธมฺมํ ปฏิจฺจ อกุสโล อปฺปฏิโฆ ธมฺโม อุปฺปชฺชติ นเหตุปจฺจยาฯ (1)

อพฺยากตํ อปฺปฏิฆํ ธมฺมํ ปฏิจฺจ อพฺยากโต อปฺปฏิโฆ ธมฺโม อุปฺปชฺชติ นเหตุปจฺจยาฯ (1) (สํขิตฺตํฯ)