นเหตุยา เอกํ, นอารมฺมเณ ปญฺจ, นอธิปติยา ตีณิ…เป.… โนวิคเต ปญฺจ (สํขิตฺตํ)ฯ

เหตุปจฺจยา นอารมฺมเณ ปญฺจ (สํขิตฺตํ)ฯ

นเหตุปจฺจยา อารมฺมเณ เอกํ (สํขิตฺตํ)ฯ

(สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ วิตฺถาเรตพฺพํฯ)

7. ปญฺหาวาโร

ปจฺจยจตุกฺกํ

[156] เสกฺโข นเหตุ ธมฺโม เนวเสกฺขนาเสกฺขสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (1)

อเสกฺโข นเหตุ ธมฺโม เนวเสกฺขนาเสกฺขสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (1)

เนวเสกฺขนาเสกฺโข นเหตุ ธมฺโม เนวเสกฺขนาเสกฺขสฺส นเหตุสฺส ธมฺมสฺส อารมฺมณปจฺจเยน ปจฺจโยฯ เนวเสกฺขนาเสกฺโข นเหตุ ธมฺโม เสกฺขสฺส นเหตุสฺส ธมฺมสฺส อารมฺมณปจฺจเยน ปจฺจโยฯ เนวเสกฺขนาเสกฺโข นเหตุ ธมฺโม อเสกฺขสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

เสกฺโข นเหตุ ธมฺโม เสกฺขสฺส นเหตุสฺส ธมฺมสฺส อธิปติปจฺจเยน ปจฺจโย… ตีณิฯ

อเสกฺโข นเหตุ ธมฺโม อเสกฺขสฺส นเหตุสฺส ธมฺมสฺส อธิปติปจฺจเยน ปจฺจโย… ตีณิฯ

เนวเสกฺขนาเสกฺโข นเหตุ ธมฺโม เนวเสกฺขนาเสกฺขสฺส นเหตุสฺส ธมฺมสฺส อธิปติปจฺจเยน ปจฺจโย… ตีณิ (สํขิตฺตํ)ฯ

[157] อารมฺมเณ ปญฺจ, อธิปติยา นว, อนนฺตเร อฏฺฐ, สมนนฺตเร อฏฺฐ, สหชาเต นว, อญฺญมญฺเญ ตีณิ, นิสฺสเย เตรส, อุปนิสฺสเย อฏฺฐ…เป.… อวิคเต เตรส (สํขิตฺตํ)ฯ

นเหตุยา จุทฺทส, นอารมฺมเณ จุทฺทส (สํขิตฺตํ)ฯ

อารมฺมณปจฺจยา นเหตุยา ปญฺจ (สํขิตฺตํ)ฯ

นเหตุปจฺจยา อารมฺมเณ ปญฺจ (สํขิตฺตํ)ฯ

(ยถา กุสลตฺติเก ปญฺหาวารํ, เอวํ วิตฺถาเรตพฺพํฯ)

11-1. ปริตฺตตฺติก-เหตุทุกํ

1-7. ปฏิจฺจวาราทิ

ปจฺจยจตุกฺกํ

[158] ปริตฺตํ เหตุํ ธมฺมํ ปฏิจฺจ ปริตฺโต เหตุ ธมฺโม อุปฺปชฺชติ เหตุปจฺจยาฯ (1)

มหคฺคตํ เหตุํ ธมฺมํ ปฏิจฺจ มหคฺคโต เหตุ ธมฺโม อุปฺปชฺชติ เหตุปจฺจยาฯ (1)

อปฺปมาณํ เหตุํ ธมฺมํ ปฏิจฺจ อปฺปมาโณ เหตุ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ตีณิ, อารมฺมเณ ตีณิ…เป.… อวิคเต ตีณิ (สํขิตฺตํ)ฯ

นอธิปติยา ตีณิ…เป.… นวิปฺปยุตฺเต ตีณิ (สํขิตฺตํ)ฯ

(สหชาตวารมฺปิ…เป.… สมฺปยุตฺตวารมฺปิ ปฏิจฺจวารสทิสํ วิตฺถาเรตพฺพํฯ)

เหตุอารมฺมณปจฺจยาทิ

[159] ปริตฺโต เหตุ ธมฺโม ปริตฺตสฺส เหตุสฺส ธมฺมสฺส เหตุปจฺจเยน ปจฺจโยฯ (1)

มหคฺคโต เหตุ ธมฺโม มหคฺคตสฺส เหตุสฺส ธมฺมสฺส เหตุปจฺจเยน ปจฺจโยฯ (1)

อปฺปมาโณ เหตุ ธมฺโม อปฺปมาณสฺส เหตุสฺส ธมฺมสฺส เหตุปจฺจเยน ปจฺจโยฯ (1)

ปริตฺโต เหตุ ธมฺโม ปริตฺตสฺส เหตุสฺส ธมฺมสฺส อารมฺมณปจฺจเยน ปจฺจโยฯ ปริตฺโต เหตุ ธมฺโม มหคฺคตสฺส เหตุสฺส ธมฺมสฺส อารมฺมณปจฺจเยน ปจฺจโยฯ (2)