ปจฺจยจตุกฺกํ

[30] สุขาย เวทนาย สมฺปยุตฺตํ นเหตุํ ธมฺมํ ปฏิจฺจ สุขาย เวทนาย สมฺปยุตฺโต นเหตุ ธมฺโม อุปฺปชฺชติ เหตุปจฺจยาฯ (1)

ทุกฺขาย เวทนาย สมฺปยุตฺตํ นเหตุํ ธมฺมํ ปฏิจฺจ ทุกฺขาย เวทนาย สมฺปยุตฺโต นเหตุ ธมฺโม อุปฺปชฺชติ เหตุปจฺจยาฯ (1)

อทุกฺขมสุขาย เวทนาย สมฺปยุตฺตํ นเหตุํ ธมฺมํ ปฏิจฺจ อทุกฺขมสุขาย เวทนาย สมฺปยุตฺโต นเหตุ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[31] เหตุยา ตีณิ, อารมฺมเณ ตีณิ…เป.… อวิคเต ตีณิ (สํขิตฺตํ)ฯ

นเหตุยา ตีณิ, นอธิปติยา ตีณิ, นปุเรชาเต ทฺเว, นปจฺฉาชาเต ตีณิ, นอาเสวเน ตีณิ, นกมฺเม ตีณิ, นวิปาเก ตีณิ…เป.… นวิปฺปยุตฺเต ทฺเว (สํขิตฺตํ)ฯ

(สหชาตวารมฺปิ…เป.… สมฺปยุตฺตวารมฺปิ วิตฺถาเรตพฺพํฯ)

7. ปญฺหาวาโร

ปจฺจยจตุกฺกํ

อารมฺมณปจฺจยาทิ

[32] สุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ สุขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ สุขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

ทุกฺขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ ทุกฺขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ ทุกฺขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

อทุกฺขมสุขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ อทุกฺขมสุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโย ฯ อทุกฺขมสุขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อารมฺมณปจฺจเยน ปจฺจโยฯ (3)

[33] สุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อธิปติปจฺจเยน ปจฺจโยฯ สุขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อธิปติปจฺจเยน ปจฺจโยฯ (2)

ทุกฺขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อธิปติปจฺจเยน ปจฺจโยฯ (1)

อทุกฺขมสุขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อธิปติปจฺจเยน ปจฺจโยฯ อทุกฺขมสุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อธิปติปจฺจเยน ปจฺจโยฯ (2)

อนนฺตร-อุปนิสฺสยปจฺจยา

[34] สุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อนนฺตรปจฺจเยน ปจฺจโย… ทฺเวฯ

ทุกฺขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อนนฺตรปจฺจเยน ปจฺจโย… ทฺเวฯ

อทุกฺขมสุขาย เวทนาย สมฺปยุตฺโต นเหตุ ธมฺโม อทุกฺขมสุขาย เวทนาย สมฺปยุตฺตสฺส นเหตุสฺส ธมฺมสฺส อนนฺตรปจฺจเยน ปจฺจโย… ตีณิ…เป.…ฯ

[35] สุขาย เวทนาย สมฺปยุตฺโต นเหตุ ธมฺโม สุขาย เวทนาย สมฺปยุตฺตสฺส นเหตุสฺส ธมฺมสฺส อุปนิสฺสยปจฺจเยน ปจฺจโย… ตีณิฯ

ทุกฺขาย เวทนาย สมฺปยุตฺโต นเหตุ ธมฺโม ทุกฺขาย เวทนาย สมฺปยุตฺตสฺส นเหตุสฺส ธมฺมสฺส อุปนิสฺสยปจฺจเยน ปจฺจโย… ตีณิฯ