เมนู

เหตุยา ทฺเว, อารมฺมเณ ทฺเว…เป.… อวิคเต ทฺเวฯ (สํขิตฺตํฯ) (สหชาตวาเรปิ …เป.… ปญฺหาวาเรปิ สพฺพตฺถ วิตฺถาเรตพฺโพฯ)

[68] สรณํ พหิทฺธารมฺมณํ ธมฺมํ ปฏิจฺจ สรโณ พหิทฺธารมฺมโณ ธมฺโม อุปฺปชฺชติ เหตุปจฺจยาฯ (1)

อรณํ พหิทฺธารมฺมณํ ธมฺมํ ปฏิจฺจ อรโณ พหิทฺธารมฺมโณ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ทฺเว, อารมฺมเณ ทฺเว…เป.… อวิคเต ทฺเวฯ (สํขิตฺตํฯ) (สหชาตวาเรปิ…เป.… ปญฺหาวาเรปิ สพฺพตฺถ วิตฺถาเรตพฺโพฯ)

100-22. สรณทุก-สนิทสฺสนตฺติกํ

1-7. ปฏิจฺจวาราทิ

ปจฺจยจตุกฺกํ

[69] อรณํ อนิทสฺสนสปฺปฏิฆํ ธมฺมํ ปฏิจฺจ อรโณ อนิทสฺสนสปฺปฏิโฆ ธมฺโม อุปฺปชฺชติ เหตุปจฺจยา (สํขิตฺตํ)ฯ

เหตุยา เอกํ, อธิปติยา เอกํ…เป.… อวิคเต เอกํฯ (สํขิตฺตํฯ) (สหชาตวาเรปิ…เป.… ปญฺหาวาเรปิ สพฺพตฺถ เอกํฯ)

[70] สรณํ อนิทสฺสนอปฺปฏิฆํ ธมฺมํ ปฏิจฺจ สรโณ อนิทสฺสนอปฺปฏิโฆ ธมฺโม อุปฺปชฺชติ เหตุปจฺจยา… ตีณิฯ

อรณํ อนิทสฺสนอปฺปฏิฆํ ธมฺมํ ปฏิจฺจ อรโณ อนิทสฺสนอปฺปฏิโฆ ธมฺโม อุปฺปชฺชติ เหตุปจฺจยาฯ (1)

สรณํ อนิทสฺสนอปฺปฏิฆญฺจ อรณํ อนิทสฺสนอปฺปฏิฆญฺจ ธมฺมํ ปฏิจฺจ อรโณ อนิทสฺสนอปฺปฏิโฆ ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

เหตุยา ปญฺจ, อารมฺมเณ ทฺเว…เป.… อวิคเต ปญฺจฯ (สํขิตฺตํฯ) (สหชาตวาโรปิ…เป.… สมฺปยุตฺตวาโรปิ วิตฺถาเรตพฺพาฯ)

[71] อรโณ อนิทสฺสนสปฺปฏิโฆ ธมฺโม อรณสฺส อนิทสฺสนสปฺปฏิฆสฺส ธมฺมสฺส สหชาตปจฺจเยน ปจฺจโย… เอกํ (อญฺญมญฺเญ เอกํ, นิสฺสเย เอกํ, อตฺถิยา เอกํ, อวิคเต เอกํฯ สํขิตฺตํ)ฯ

[72] สรโณ อนิทสฺสนอปฺปฏิโฆ ธมฺโม สรณสฺส อนิทสฺสนอปฺปฏิฆสฺส ธมฺมสฺส เหตุปจฺจเยน ปจฺจโย… ตีณิฯ อรโณ อนิทสฺสนอปฺปฏิโฆ ธมฺโม อรณสฺส อนิทสฺสนอปฺปฏิฆสฺส ธมฺมสฺส เหตุปจฺจเยน ปจฺจโยฯ (1) (สํขิตฺตํฯ)

[73] เหตุยา จตฺตาริ, อารมฺมเณ จตฺตาริ…เป.… อวิคเต สตฺต (สํขิตฺตํ)ฯ

นเหตุยา สตฺต, นอารมฺมเณ สตฺต (สํขิตฺตํ)ฯ

เหตุปจฺจยา นอารมฺมเณ จตฺตาริ (สํขิตฺตํ)ฯ

นเหตุปจฺจยา อารมฺมเณ จตฺตาริ (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

ธมฺมานุโลเม ทุกติกปฏฺฐานํ นิฏฺฐิตํฯ

ธมฺมานุโลเม ติกทุกปฏฺฐานํ

1-1. กุสลตฺติก-เหตุทุกํ

1. เหตุปทํ

1-6. ปฏิจฺจวาราทิ

ปจฺจยจตุกฺกํ