เมนู

เหตุปจฺจโย

[43] จิตฺตสมุฏฺฐานํ กุสลํ ธมฺมํ ปฏิจฺจ จิตฺตสมุฏฺฐาโน กุสโล ธมฺโม อุปฺปชฺชติ เหตุปจฺจยาฯ จิตฺตสมุฏฺฐานํ กุสลํ ธมฺมํ ปฏิจฺจ โนจิตฺตสมุฏฺฐาโน กุสโล ธมฺโม อุปฺปชฺชติ เหตุปจฺจยาฯ จิตฺตสมุฏฺฐานํ กุสลํ ธมฺมํ ปฏิจฺจ จิตฺตสมุฏฺฐาโน กุสโล จ โนจิตฺตสมุฏฺฐาโน กุสโล จ ธมฺมา อุปฺปชฺชนฺติ เหตุปจฺจยาฯ (3)

โนจิตฺตสมุฏฺฐานํ กุสลํ ธมฺมํ ปฏิจฺจ จิตฺตสมุฏฺฐาโน กุสโล ธมฺโม อุปฺปชฺชติ เหตุปจฺจยาฯ (1)

จิตฺตสมุฏฺฐานํ กุสลญฺจ โนจิตฺตสมุฏฺฐานํ กุสลญฺจ ธมฺมํ ปฏิจฺจ จิตฺตสมุฏฺฐาโน กุสโล ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[44] เหตุยา ปญฺจ, อารมฺมเณ ปญฺจ (สพฺพตฺถ ปญฺจ), อวิคเต ปญฺจ (สํขิตฺตํ)ฯ

นอธิปติยา ปญฺจ, นปุเรชาเต ปญฺจ…เป.… นกมฺเม ตีณิ , นวิปาเก ปญฺจ…เป.… นวิปฺปยุตฺเต ปญฺจ (สํขิตฺตํ, สหชาตวาราทิ วิตฺถาเรตพฺโพ)ฯ

[45] จิตฺตสมุฏฺฐาโน กุสโล ธมฺโม จิตฺตสมุฏฺฐานสฺส กุสลสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ

[46] เหตุยา ตีณิ, อารมฺมเณ นว, อธิปติยา นว, อนนฺตเร นว, สมนนฺตเร นว, สหชาเต ปญฺจ…เป.… อุปนิสฺสเย นว, อาเสวเน นว, กมฺเม ตีณิ, อาหาเร ปญฺจ, อินฺทฺริเย ปญฺจ, ฌาเน ตีณิ, มคฺเค ตีณิ, สมฺปยุตฺเต ปญฺจ, อตฺถิยา ปญฺจ…เป.… อวิคเต ปญฺจ (สํขิตฺตํ)ฯ

[47] จิตฺตสมุฏฺฐานํ อกุสลํ ธมฺมํ ปฏิจฺจ จิตฺตสมุฏฺฐาโน อกุสโล ธมฺโม อุปฺปชฺชติ เหตุปจฺจยา… ตีณิฯ

โนจิตฺตสมุฏฺฐานํ อกุสลํ ธมฺมํ ปฏิจฺจ จิตฺตสมุฏฺฐาโน อกุสโล ธมฺโม อุปฺปชฺชติ เหตุปจฺจยาฯ (1)

จิตฺตสมุฏฺฐานํ อกุสลญฺจ โนจิตฺตสมุฏฺฐานํ อกุสลญฺจ ธมฺมํ ปฏิจฺจ จิตฺตสมุฏฺฐาโน อกุสโล ธมฺโม อุปฺปชฺชติ เหตุปจฺจยาฯ (1) (สํขิตฺตํ)ฯ

[48] เหตุยา ปญฺจ, อารมฺมเณ ปญฺจ…เป.… อวิคเต ปญฺจ (สํขิตฺตํ)ฯ

(กุสลตฺติกสทิสํ สหชาตวารมฺปิ …เป.… ปญฺหาวารมฺปิ วิตฺถาเรตพฺพํฯ)

[49] จิตฺตสมุฏฺฐานํ อพฺยากตํ ธมฺมํ ปฏิจฺจ จิตฺตสมุฏฺฐาโน อพฺยากโต ธมฺโม อุปฺปชฺชติ เหตุปจฺจยา… ตีณิฯ

โนจิตฺตสมุฏฺฐานํ อพฺยากตํ ธมฺมํ ปฏิจฺจ โนจิตฺตสมุฏฺฐาโน อพฺยากโต ธมฺโม อุปฺปชฺชติ เหตุปจฺจยา… ตีณิฯ

จิตฺตสมุฏฺฐานํ อพฺยากตญฺจ โนจิตฺตสมุฏฺฐานํ อพฺยากตญฺจ ธมฺมํ ปฏิจฺจ จิตฺตสมุฏฺฐาโน อพฺยากโต ธมฺโม อุปฺปชฺชติ เหตุปจฺจยา… ตีณิ (สํขิตฺตํ)ฯ

[50] เหตุยา นว, อารมฺมเณ นว, อธิปติยา ปญฺจ (สพฺพตฺถ นว), ปุเรชาเต ปญฺจ, อาเสวเน ปญฺจ…เป.… อวิคเต นว (สํขิตฺตํ)ฯ

นเหตุยา นว, นอารมฺมเณ ฉ, นอธิปติยา นว…เป.… นกมฺเม ตีณิ, นวิปาเก ฉ, นอาหาเร เอกํ, นอินฺทฺริเย เอกํ, นฌาเน ฉ, นมคฺเค นว, นสมฺปยุตฺเต ฉ, นวิปฺปยุตฺเต ฉ, โนนตฺถิยา ฉ, โนวิคเต ฉ (สํขิตฺตํ)ฯ

(สหชาตวารมฺปิ…เป.… สมฺปยุตฺตวารมฺปิ วิตฺถาเรตพฺพํฯ)

[51] จิตฺตสมุฏฺฐาโน อพฺยากโต ธมฺโม จิตฺตสมุฏฺฐานสฺส อพฺยากตสฺส ธมฺมสฺส เหตุปจฺจเยน ปจฺจโย… ตีณิฯ

จิตฺตสมุฏฺฐาโน อพฺยากโต ธมฺโม จิตฺตสมุฏฺฐานสฺส อพฺยากตสฺส ธมฺมสฺส อารมฺมณปจฺจเยน ปจฺจโย (สํขิตฺตํ)ฯ

[52] เหตุยา ตีณิ, อารมฺมเณ นว, อธิปติยา นว, อนนฺตเร นว (สพฺพตฺถ นว), ปุเรชาเต นว, ปจฺฉาชาเต นว, อาเสวเน นว, กมฺเม ตีณิ, วิปาเก นว, อาหาเร นว (จิตฺตสมุฏฺฐานมูลํ โนจิตฺตสมุฏฺฐานสฺส กพฬีกาโร อาหาโร กาตพฺโพฯ โนจิตฺตสมุฏฺฐาโน จิตฺตสมุฏฺฐานสฺส กพฬีกาโร อาหาโร ฆฏเน มชฺเฌ กพฬีกาโร อาหาโร), อินฺทฺริเย นว (รูปชีวิตินฺทฺริยํ เอกํ), ฌาเน ตีณิ, มคฺเค ตีณิ, สมฺปยุตฺเต ปญฺจ, วิปฺปยุตฺเต นว, อตฺถิยา นว, นตฺถิยา นว, วิคเต นว, อวิคเต นว (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

61-1. จิตฺตสหภูทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ