[5] โนปรามาโส อกุสโล ธมฺโม โนปรามาสสฺส อกุสลสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ

[6] เหตุยา ตีณิ, อารมฺมเณ นว, อธิปติยา นว…เป.… อวิคเต ปญฺจ (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

[7] โนปรามาสํ อพฺยากตํ ธมฺมํ ปฏิจฺจ โนปรามาโส อพฺยากโต ธมฺโม อุปฺปชฺชติ เหตุปจฺจยา (สํขิตฺตํ)ฯ

[8] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ…เป.… ปญฺหาวาเรปิ สพฺพตฺถ เอกํฯ)

51-1. ปรามฏฺฐทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[9] ปรามฏฺฐํ กุสลํ ธมฺมํ ปฏิจฺจ ปรามฏฺโฐ กุสโล ธมฺโม อุปฺปชฺชติ เหตุปจฺจยาฯ (1)

อปรามฏฺฐํ กุสลํ ธมฺมํ ปฏิจฺจ อปรามฏฺโฐ กุสโล ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[10] เหตุยา ทฺเว, อารมฺมเณ ทฺเว…เป.… อวิคเต ทฺเว (สํขิตฺตํ)ฯ

(สหชาตวาโรปิ …เป.… ปญฺหาวาโรปิ วิตฺถาเรตพฺพาฯ)

[11] ปรามฏฺฐํ อกุสลํ ธมฺมํ ปฏิจฺจ ปรามฏฺโฐ อกุสโล ธมฺโม อุปฺปชฺชติ เหตุปจฺจยา (สํขิตฺตํ)ฯ

[12] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ…เป.… ปญฺหาวาเรปิ สพฺพตฺถ เอกํฯ)

[13] ปรามฏฺฐํ อพฺยากตํ ธมฺมํ ปฏิจฺจ ปรามฏฺโฐ อพฺยากโต ธมฺโม อุปฺปชฺชติ เหตุปจฺจยาฯ (1)

อปรามฏฺฐํ อพฺยากตํ ธมฺมํ ปฏิจฺจ อปรามฏฺโฐ อพฺยากโต ธมฺโม อุปฺปชฺชติ เหตุปจฺจยา… ตีณิฯ

ปรามฏฺฐํ อพฺยากตญฺจ อปรามฏฺฐํ อพฺยากตญฺจ ธมฺมํ ปฏิจฺจ ปรามฏฺโฐ อพฺยากโต ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[14] เหตุยา ปญฺจ, อารมฺมเณ ทฺเว…เป.… อาเสวเน เอกํ…เป.… อวิคเต ปญฺจ (สํขิตฺตํ)ฯ (สหชาตวารมฺปิ…เป.… ปญฺหาวารมฺปิ วิตฺถาเรตพฺพํฯ)

52-1. ปรามาสสมฺปยุตฺตทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[15] ปรามาสวิปฺปยุตฺตํ กุสลํ ธมฺมํ ปฏิจฺจ ปรามาสวิปฺปยุตฺโต กุสโล ธมฺโม อุปฺปชฺชติ เหตุปจฺจยา (สํขิตฺตํ)ฯ

[16] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ …เป.… ปญฺหาวาเรปิ สพฺพตฺถ เอกํฯ)

[17] ปรามาสสมฺปยุตฺตํ อกุสลํ ธมฺมํ ปฏิจฺจ ปรามาสสมฺปยุตฺโต อกุสโล ธมฺโม อุปฺปชฺชติ เหตุปจฺจยาฯ (1)

ปรามาสวิปฺปยุตฺตํ อกุสลํ ธมฺมํ ปฏิจฺจ ปรามาสวิปฺปยุตฺโต อกุสโล ธมฺโม อุปฺปชฺชติ เหตุปจฺจยาฯ (1) (สํขิตฺตํฯ)

[18] เหตุยา ทฺเว, อารมฺมเณ ทฺเว (สพฺพตฺถ ทฺเว)…เป.… อวิคเต ทฺเว (สํขิตฺตํ)ฯ

นเหตุยา เอกํ, นอธิปติยา ทฺเว (สพฺพตฺถ ทฺเว)…เป.… นวิปฺปยุตฺเต ทฺเว (สํขิตฺตํ)ฯ (สหชาตวาโรปิ…เป.… สมฺปยุตฺตวาโรปิ วิตฺถาเรตพฺพาฯ)

[19] ปรามาสสมฺปยุตฺโต อกุสโล ธมฺโม ปรามาสสมฺปยุตฺตสฺส อกุสลสฺส ธมฺมสฺส เหตุปจฺจเยน ปจฺจโยฯ (1)