เมนู

เหตุปจฺจยา นอารมฺมเณ จตฺตาริ (สํขิตฺตํ)ฯ

นเหตุปจฺจยา อารมฺมเณ ตีณิ (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

คนฺถโคจฺฉกกุสลตฺติกํ นิฏฺฐิตํฯ

(โอฆโคจฺฉกมฺปิ โยคโคจฺฉกมฺปิ อาสวโคจฺฉกกุสลตฺติกสทิสํฯ)

44-1. นีวรณทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[1] โนนีวรณํ กุสลํ ธมฺมํ ปฏิจฺจ โนนีวรโณ กุสโล ธมฺโม อุปฺปชฺชติ เหตุปจฺจยา (สํขิตฺตํ)ฯ

[2] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ…เป.… ปญฺหาวาเรปิ สพฺพตฺถ เอกํ)ฯ

[3] นีวรณํ อกุสลํ ธมฺมํ ปฏิจฺจ นีวรโณ อกุสโล ธมฺโม อุปฺปชฺชติ เหตุปจฺจยาฯ นีวรณํ อกุสลํ ธมฺมํ ปฏิจฺจ โนนีวรโณ อกุสโล ธมฺโม อุปฺปชฺชติ เหตุปจฺจยาฯ นีวรณํ อกุสลํ ธมฺมํ ปฏิจฺจ นีวรโณ อกุสโล จ โนนีวรโณ อกุสโล จ ธมฺมา อุปฺปชฺชนฺติ เหตุปจฺจยาฯ (3) (สํขิตฺตํฯ)

[4] เหตุยา นว, อารมฺมเณ นว…เป.… อวิคเต นว (สํขิตฺตํ)ฯ

ปจฺจนียํ

นเหตุปจฺจโย

[5] นีวรณํ อกุสลํ ธมฺมํ ปฏิจฺจ นีวรโณ อกุสโล ธมฺโม อุปฺปชฺชติ นเหตุปจฺจยา – วิจิกิจฺฉานีวรณํ อุทฺธจฺจนีวรณํ ปฏิจฺจ อวิชฺชานีวรณํฯ (1)

โนนีวรณํ อกุสลํ ธมฺมํ ปฏิจฺจ นีวรโณ อกุสโล ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ อวิชฺชานีวรณํฯ (1)

นีวรณญฺจ โนนีวรณญฺจ อกุสลํ ธมฺมํ ปฏิจฺจ นีวรโณ อกุสโล ธมฺโม อุปฺปชฺชติ นเหตุปจฺจยา – วิจิกิจฺฉานีวรณญฺจ อุทฺธจฺจนีวรณญฺจ สมฺปยุตฺตเก จ ขนฺเธ ปฏิจฺจ อวิชฺชานีวรณํฯ (1) (สํขิตฺตํฯ)

[6] นเหตุยา ตีณิ, นอธิปติยา นว, นปุเรชาเต นว…เป.… นกมฺเม ตีณิ…เป.… นวิปฺปยุตฺเต นว (สํขิตฺตํ)ฯ

(สหชาตวาเรปิ… สมฺปยุตฺตวาเรปิ สพฺพตฺถ นวฯ)

[7] นีวรโณ อกุสโล ธมฺโม นีวรณสฺส อกุสลสฺส ธมฺมสฺส เหตุปจฺจเยน ปจฺจโย (สํขิตฺตํ)ฯ

[8] เหตุยา ตีณิ, อารมฺมเณ นว, อธิปติยา นว…เป.… อาเสวเน นว, กมฺเม อาหาเร อินฺทฺริเย ฌาเน มคฺเค ตีณิ, สมฺปยุตฺเต นว…เป.… อวิคเต นว (สํขิตฺตํ)ฯ

นเหตุยา นว, นอารมฺมเณ นว (สํขิตฺตํ)ฯ

เหตุปจฺจยา นอารมฺมเณ ตีณิ (สํขิตฺตํ)ฯ

นเหตุปจฺจยา อารมฺมเณ นว (สํขิตฺตํ)ฯ

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํ)ฯ

[9] โนนีวรณํ อพฺยากตํ ธมฺมํ ปฏิจฺจ โนนีวรโณ อพฺยากโต ธมฺโม อุปฺปชฺชติ เหตุปจฺจยา (สํขิตฺตํ)ฯ

[10] เหตุยา เอกํ, อารมฺมเณ เอกํ…เป.… อวิคเต เอกํ (สํขิตฺตํ)ฯ

(สหชาตวาเรปิ…เป.… ปญฺหาวาเรปิ สพฺพตฺถ เอกํฯ)

45-1. นีวรณิยทุก-กุสลตฺติกํ

1-7. ปฏิจฺจวาราทิ

ปจฺจยจตุกฺกํ

เหตุปจฺจโย

[11] นีวรณิยํ กุสลํ ธมฺมํ ปฏิจฺจ นีวรณิโย กุสโล ธมฺโม อุปฺปชฺชติ เหตุปจฺจยาฯ (1)