[88] สํกิลิฏฺโฐ เจว โน จ กิเลโส ธมฺโม สํกิลิฏฺฐสฺส เจว โน จ กิเลสสฺส ธมฺมสฺส อารมฺมณปจฺจเยน ปจฺจโย – สํกิลิฏฺเฐ เจว โน จ กิเลเส ขนฺเธ อารพฺภ สํกิลิฏฺฐา เจว โน จ กิเลสา ขนฺธา อุปฺปชฺชนฺติฯ (มูลํ กาตพฺพํฯ) สํกิลิฏฺเฐ เจว โน จ กิเลเส ขนฺเธ อารพฺภ กิเลสา อุปฺปชฺชนฺติฯ (มูลํ กาตพฺพํฯ) สํกิลิฏฺเฐ เจว โน จ กิเลเส ขนฺเธ อารพฺภ กิเลสา จ สมฺปยุตฺตกา ขนฺธา จ อุปฺปชฺชนฺติฯ (3)
(อิตเรปิ ตีณิ กาตพฺพาฯ)
อธิปติปจฺจโย
[89] กิเลโส เจว สํกิลิฏฺโฐ จ ธมฺโม กิเลสสฺส เจว สํกิลิฏฺฐสฺส จ ธมฺมสฺส อธิปติปจฺจเยน ปจฺจโย – อารมฺมณาธิปติ… ตีณิฯ
สํกิลิฏฺโฐ เจว โน จ กิเลโส ธมฺโม สํกิลิฏฺฐสฺส เจว โน จ กิเลสสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – สํกิลิฏฺเฐ เจว โน จ กิเลเส ขนฺเธ ครุํ กตฺวา…เป.… ตีณิฯ (ทฺเว อธิปติ ตีณิปิ กาตพฺพา, อิตเร ทฺเวปิ ตีณิ กาตพฺพาฯ)
อนนฺตรปจฺจยาทิ
[90] กิเลโส เจว สํกิลิฏฺโฐ จ ธมฺโม กิเลสสฺส เจว สํกิลิฏฺฐสฺส จ ธมฺมสฺส อนนฺตรปจฺจเยน ปจฺจโย (นวปิ กาตพฺพา, อาวชฺชนาปิ วุฏฺฐานมฺปิ นตฺถิ)… สมนนฺตรปจฺจเยน ปจฺจโย… สหชาตปจฺจเยน ปจฺจโย… อญฺญมญฺญปจฺจเยน ปจฺจโย… นิสฺสยปจฺจเยน ปจฺจโย… อุปนิสฺสยปจฺจเยน ปจฺจโย… นว ปญฺหา (ปุเรชาตปจฺจโย ปจฺฉาชาตปจฺจโยปิ นตฺถิ)… อาเสวนปจฺจเยน ปจฺจโยฯ
กมฺมปจฺจยาทิ
[91] สํกิลิฏฺโฐ เจว โน จ กิเลโส ธมฺโม สํกิลิฏฺฐสฺส เจว โน จ กิเลสสฺส ธมฺมสฺส กมฺมปจฺจเยน ปจฺจโย – สํกิลิฏฺฐา เจว โน จ กิเลสา เจตนา สมฺปยุตฺตกานํ ขนฺธานํ กมฺมปจฺจเยน ปจฺจโยฯ (1)