เมนู

(ยถา กุสลตฺติเก ปญฺหาวารสฺส อนุโลมมฺปิ ปจฺจนียมฺปิ อนุโลมปจฺจนียมฺปิ ปจฺจนียานุโลมมฺปิ คณิตํ, เอวํ คเณตพฺพํฯ)

เหตุทุกอตีตารมฺมณตฺติกํ นิฏฺฐิตํฯ

1-20. เหตุทุก-อชฺฌตฺตตฺติกํ

1. อชฺฌตฺตปทํ

1-6. ปฏิจฺจวาราทิ

ปจฺจยจตุกฺกํ

เหตุปจฺจโย

[509] เหตุํ อชฺฌตฺตํ ธมฺมํ ปฏิจฺจ เหตุ อชฺฌตฺโต ธมฺโม อุปฺปชฺชติ เหตุปจฺจยา… ตีณิฯ

นเหตุํ อชฺฌตฺตํ ธมฺมํ ปฏิจฺจ นเหตุ อชฺฌตฺโต ธมฺโม อุปฺปชฺชติ เหตุปจฺจยา… ตีณิฯ

เหตุํ อชฺฌตฺตญฺจ นเหตุํ อชฺฌตฺตญฺจ ธมฺมํ ปฏิจฺจ เหตุ อชฺฌตฺโต ธมฺโม อุปฺปชฺชติ เหตุปจฺจยา… ตีณิ (สํขิตฺตํ)ฯ

[510] เหตุยา นว, อารมฺมเณ นว, อธิปติยา นว…เป.… กมฺเม นว, วิปาเก นว, อาหาเร นว…เป.… อวิคเต นว (สํขิตฺตํ)ฯ

นเหตุปจฺจยาทิ

[511] นเหตุํ อชฺฌตฺตํ ธมฺมํ ปฏิจฺจ นเหตุ อชฺฌตฺโต ธมฺโม อุปฺปชฺชติ นเหตุปจฺจยาฯ นเหตุํ อชฺฌตฺตํ ธมฺมํ ปฏิจฺจ เหตุ อชฺฌตฺโต ธมฺโม อุปฺปชฺชติ นเหตุปจฺจยาฯ (2)

เหตุํ อชฺฌตฺตํ ธมฺมํ ปฏิจฺจ นเหตุ อชฺฌตฺโต ธมฺโม อุปฺปชฺชติ นอารมฺมณปจฺจยาฯ (1)

นเหตุํ อชฺฌตฺตํ ธมฺมํ ปฏิจฺจ นเหตุ อชฺฌตฺโต ธมฺโม อุปฺปชฺชติ นอารมฺมณปจฺจยาฯ (1)

เหตุํ อชฺฌตฺตญฺจ นเหตุํ อชฺฌตฺตญฺจ ธมฺมํ ปฏิจฺจ นเหตุ อชฺฌตฺโต ธมฺโม อุปฺปชฺชติ นอารมฺมณปจฺจยาฯ (1)

เหตุํ อชฺฌตฺตํ ธมฺมํ ปฏิจฺจ เหตุ อชฺฌตฺโต ธมฺโม อุปฺปชฺชติ นอธิปติปจฺจยา (สํขิตฺตํ)ฯ

[512] นเหตุยา ทฺเว, นอารมฺมเณ ตีณิ, นอธิปติยา นว, นอนนฺตเร ตีณิ, นสมนนฺตเร ตีณิ, นอญฺญมญฺเญ ตีณิ, นอุปนิสฺสเย ตีณิ, นปุเรชาเต นว, นปจฺฉาชาเต นว, นอาเสวเน นว, นกมฺเม ตีณิ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ตีณิ, นวิปฺปยุตฺเต นว, โนนตฺถิยา ตีณิ, โนวิคเต ตีณิ (สํขิตฺตํ)ฯ

เหตุปจฺจยา นอารมฺมเณ ตีณิ (สํขิตฺตํ)ฯ

นเหตุปจฺจยา อารมฺมเณ ทฺเว (สํขิตฺตํ)ฯ

(สหชาตวาโรปิ ปจฺจยวาโรปิ นิสฺสยวาโรปิ สํสฏฺฐวาโรปิ สมฺปยุตฺตวาโรปิ ปฏิจฺจวารสทิสา วิตฺถาเรตพฺพาฯ)

7. ปญฺหาวาโร

ปจฺจยจตุกฺกํ

เหตุปจฺจยาทิ

[513] เหตุ อชฺฌตฺโต ธมฺโม เหตุสฺส อชฺฌตฺตสฺส ธมฺมสฺส เหตุปจฺจเยน ปจฺจโย… ตีณิฯ

เหตุ อชฺฌตฺโต ธมฺโม เหตุสฺส อชฺฌตฺตสฺส ธมฺมสฺส อารมฺมณปจฺจเยน ปจฺจโย… นวฯ

เหตุ อชฺฌตฺโต ธมฺโม เหตุสฺส อชฺฌตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิฯ

นเหตุ อชฺฌตฺโต ธมฺโม นเหตุสฺส อชฺฌตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติ… ตีณิฯ

เหตุ อชฺฌตฺโต จ นเหตุ อชฺฌตฺโต จ ธมฺมา เหตุสฺส อชฺฌตฺตสฺส ธมฺมสฺส อธิปติปจฺจเยน ปจฺจโย – อารมฺมณาธิปติ… ตีณิ (สํขิตฺตํ)ฯ