อธิปติปจฺจโย

[78] กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อธิปติปจฺจเยน ปจฺจโย – อารมฺมณาธิปติ… ตีณิฯ

สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อธิปติปจฺจเยน ปจฺจโย – อารมฺมณาธิปติ, สหชาตาธิปติฯ อารมฺมณาธิปติ – ทานํ…เป.… สีลํ…เป.… อุโปสถกมฺมํ…เป.… ปุพฺเพ สุจิณฺณานิ…เป.… ฌานา วุฏฺฐหิตฺวา ฌานํ ครุํ กตฺวา ปจฺจเวกฺขติ, เสกฺขา โคตฺรภุํ ครุํ กตฺวา ปจฺจเวกฺขนฺติ, โวทานํ ครุํ กตฺวา ปจฺจเวกฺขนฺติ; จกฺขุํ…เป.… วตฺถุํ สํกิเลสิเก เจว โน จ กิเลเส ขนฺเธ ครุํ กตฺวา สํกิเลสิกา เจว โน จ กิเลสา ขนฺธา อุปฺปชฺชนฺติฯ สหชาตาธิปติ – สํกิเลสิกา เจว โน จ กิเลสาธิปติ สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ อธิปติปจฺจเยน ปจฺจโยฯ (อิตเร ทฺเวปิ กิเลสทุกสทิสาฯ ฆฏนาธิปติปิฯ)

อนนฺตรปจฺจยาทิ

[79] กิเลโส เจว สํกิเลสิโก จ ธมฺโม กิเลสสฺส เจว สํกิเลสิกสฺส จ ธมฺมสฺส อนนฺตรปจฺจเยน ปจฺจโย… ตีณิ (กิเลสทุกสทิสา)ฯ

สํกิเลสิโก เจว โน จ กิเลโส ธมฺโม สํกิเลสิกสฺส เจว โน จ กิเลสสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สํกิเลสิกา เจว โน จ กิเลสา ขนฺธา ปจฺฉิมานํ ปจฺฉิมานํ สํกิเลสิกานญฺเจว โน จ กิเลสานํ ขนฺธานํ อนนฺตรปจฺจเยน ปจฺจโย; อนุโลมํ โคตฺรภุสฺส… อนุโลมํ โวทานสฺส… อาวชฺชนา สํกิเลสิกานญฺเจว โน จ กิเลสานํ ขนฺธานํ อนนฺตรปจฺจเยน ปจฺจโยฯ

(อิตเร ทฺเว อนนฺตรา กิเลสทุกสทิสา, นินฺนานากรณาฯ ฆฏนานนฺตรมฺปิ สพฺเพ ปจฺจยา กิเลสทุกสทิสา , นินฺนานากรณาฯ อุปนิสฺสเย โลกุตฺตรํ นตฺถิ, อิทํ ทุกํ กิเลสทุกสทิสํ, นินฺนานากรณํฯ)

กิเลสสํกิเลสิกทุกํ นิฏฺฐิตํฯ

80. กิเลสสํกิลิฏฺฐทุกํ

1. ปฏิจฺจวาโร

1. ปจฺจยานุโลมํ

1. วิภงฺควาโร

เหตุปจฺจโย

[80] กิเลสญฺเจว สํกิลิฏฺฐญฺจ ธมฺมํ ปฏิจฺจ กิเลโส เจว สํกิลิฏฺโฐ จ ธมฺโม อุปฺปชฺชติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ (จกฺกํ)ฯ (1)

กิเลสญฺเจว สํกิลิฏฺฐญฺจ ธมฺมํ ปฏิจฺจ สํกิลิฏฺโฐ เจว โน จ กิเลโส ธมฺโม อุปฺปชฺชติ เหตุปจฺจยา – กิเลเส ปฏิจฺจ สมฺปยุตฺตกา ขนฺธาฯ (2)

กิเลสญฺเจว สํกิลิฏฺฐญฺจ ธมฺมํ ปฏิจฺจ กิเลโส เจว สํกิลิฏฺโฐ จ สํกิลิฏฺโฐ เจว โน จ กิเลโส จ ธมฺมา อุปฺปชฺชนฺติ เหตุปจฺจยา – โลภํ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ สมฺปยุตฺตกา จ ขนฺธา (จกฺกํ)ฯ (3)

[81] สํกิลิฏฺฐญฺเจว โน จ กิเลสํ ธมฺมํ ปฏิจฺจ สํกิลิฏฺโฐ เจว โน จ กิเลโส ธมฺโม อุปฺปชฺชติ เหตุปจฺจยา – สํกิลิฏฺฐญฺเจว โน จ กิเลสํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ…เป.…ฯ (1)

สํกิลิฏฺฐญฺเจว โน จ กิเลสํ ธมฺมํ ปฏิจฺจ กิเลโส เจว สํกิลิฏฺโฐ จ ธมฺโม อุปฺปชฺชติ เหตุปจฺจยา – สํกิลิฏฺเฐ เจว โน จ กิเลเส ขนฺเธ ปฏิจฺจ กิเลสาฯ (2)

สํกิลิฏฺฐญฺเจว โน จ กิเลสํ ธมฺมํ ปฏิจฺจ กิเลโส เจว สํกิลิฏฺโฐ จ สํกิลิฏฺโฐ เจว โน จ กิเลโส จ ธมฺมา อุปฺปชฺชนฺติ เหตุปจฺจยา – สํกิลิฏฺฐญฺเจว โน จ กิเลสํ เอกํ ขนฺธํ ปฏิจฺจ ตโย ขนฺธา กิเลสา จ…เป.… ทฺเว ขนฺเธ…เป.…ฯ (3)

[82] กิเลสญฺเจว สํกิลิฏฺฐญฺจ สํกิลิฏฺฐญฺเจว โน จ กิเลสญฺจ ธมฺมํ ปฏิจฺจ กิเลโส เจว สํกิลิฏฺโฐ จ ธมฺโม อุปฺปชฺชติ เหตุปจฺจยา – โลภญฺจ สมฺปยุตฺตเก จ ขนฺเธ ปฏิจฺจ โมโห ทิฏฺฐิ ถินํ อุทฺธจฺจํ อหิริกํ อโนตฺตปฺปํ (จกฺกํ)ฯ (1)