เมนู

สํกิลิฏฺโฐ ธมฺโม อสํกิลิฏฺฐสฺส ธมฺมสฺส เหตุปจฺจเยน ปจฺจโย – สํกิลิฏฺฐา เหตู จิตฺตสมุฏฺฐานานํ รูปานํ เหตุปจฺจเยน ปจฺจโยฯ (2)

สํกิลิฏฺโฐ ธมฺโม สํกิลิฏฺฐสฺส จ อสํกิลิฏฺฐสฺส จ ธมฺมสฺส เหตุปจฺจเยน ปจฺจโย – สํกิลิฏฺฐา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโยฯ (3)

อสํกิลิฏฺโฐ ธมฺโม อสํกิลิฏฺฐสฺส ธมฺมสฺส เหตุปจฺจเยน ปจฺจโย – อสํกิลิฏฺฐา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโย; ปฏิสนฺธิกฺขเณ…เป.…ฯ (1)

อารมฺมณปจฺจโย

[52] สํกิลิฏฺโฐ ธมฺโม สํกิลิฏฺฐสฺส ธมฺมสฺส อารมฺมณปจฺจเยน ปจฺจโย – ราคํ อสฺสาเทติ อภินนฺทติ, ตํ อารพฺภ ราโค อุปฺปชฺชติ, ทิฏฺฐิ อุปฺปชฺชติ; วิจิกิจฺฉา…เป.… อุทฺธจฺจ…เป.… โทมนสฺสํ อุปฺปชฺชติ; ทิฏฺฐิํ อสฺสาเทติ…เป.… (กุสลตฺติกสทิสํ); วิจิกิจฺฉํ อารพฺภ…เป.… อุทฺธจฺจํ อารพฺภ…เป.… โทมนสฺสํ อุปฺปชฺชติ; ทิฏฺฐิ…เป.… วิจิกิจฺฉา…เป.… อุทฺธจฺจํ อุปฺปชฺชติฯ (1)

สํกิลิฏฺโฐ ธมฺโม อสํกิลิฏฺฐสฺส ธมฺมสฺส อารมฺมณปจฺจเยน ปจฺจโย – อริยา ปหีเน กิเลเส ปจฺจเวกฺขนฺติ, วิกฺขมฺภิเต กิเลเส…เป.… ปุพฺเพ สมุทาจิณฺเณ…เป.… สํกิลิฏฺเฐ ขนฺเธ อนิจฺจโต…เป.… วิปสฺสติ, เจโตปริยญาเณน สํกิลิฏฺฐจิตฺตสมงฺคิสฺส จิตฺตํ ชานาติ; สํกิลิฏฺฐา ขนฺธา เจโตปริยญาณสฺส, ปุพฺเพนิวาสานุสฺสติญาณสฺส, ยถากมฺมูปคญาณสฺส, อนาคตํสญาณสฺส, อาวชฺชนาย อารมฺมณปจฺจเยน ปจฺจโยฯ (2)

[53] อสํกิลิฏฺโฐ ธมฺโม อสํกิลิฏฺฐสฺส ธมฺมสฺส อารมฺมณปจฺจเยน ปจฺจโย – ทานํ…เป.… สีลํ…เป.… อุโปสถกมฺมํ…เป.… ปุพฺเพ…เป.… ฌานา วุฏฺฐหิตฺวา ฌานํ ปจฺจเวกฺขติ, อริยา มคฺคา วุฏฺฐหิตฺวา มคฺคํ ปจฺจเวกฺขนฺติ…เป.… อาวชฺชนาย อารมฺมณปจฺจเยน ปจฺจโย; จกฺขุํ…เป.… วตฺถุํ อสํกิลิฏฺเฐ ขนฺเธ อนิจฺจโต…เป.… วิปสฺสติ, ทิพฺเพน จกฺขุนา รูปํ ปสฺสติ…เป.… อนาคตํสญาณสฺส, อาวชฺชนาย อารมฺมณปจฺจเยน ปจฺจโยฯ (1)