[46] เหตุยา นว, อารมฺมเณ จตฺตาริ, อธิปติยา นว, อนนฺตเร จตฺตาริ, สมนนฺตเร จตฺตาริ, สหชาเต นว, อญฺญมญฺเญ จตฺตาริ, นิสฺสเย นว, อุปนิสฺสเย จตฺตาริ, ปุเรชาเต จตฺตาริ, อาเสวเน จตฺตาริ , กมฺเม นว, วิปาเก เอกํ, อาหาเร นว, อินฺทฺริเย นว…เป.… วิคเต จตฺตาริ, อวิคเต นวฯ

2. ปจฺจยปจฺจนียํ

1. วิภงฺควาโร

นเหตุปจฺจโย

[47] สํกิลิฏฺฐํ ธมฺมํ ปจฺจยา สํกิลิฏฺโฐ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ ปจฺจยา วิจิกิจฺฉาสหคโต อุทฺธจฺจสหคโต โมโหฯ (1)

อสํกิลิฏฺฐํ ธมฺมํ ปจฺจยา อสํกิลิฏฺโฐ ธมฺโม อุปฺปชฺชติ นเหตุปจฺจยา – อเหตุกํ อสํกิลิฏฺฐํ…เป.… (ยาว อสญฺญสตฺตา) จกฺขายตนํ ปจฺจยา จกฺขุวิญฺญาณํ…เป.… กายายตนํ ปจฺจยา กายวิญฺญาณํ, วตฺถุํ ปจฺจยา อเหตุกา อสํกิลิฏฺฐา ขนฺธาฯ (1)

อสํกิลิฏฺฐํ ธมฺมํ ปจฺจยา สํกิลิฏฺโฐ ธมฺโม อุปฺปชฺชติ นเหตุปจฺจยา – วตฺถุํ ปจฺจยา วิจิกิจฺฉาสหคโต อุทฺธจฺจสหคโต โมโหฯ (2)

สํกิลิฏฺฐญฺจ อสํกิลิฏฺฐญฺจ ธมฺมํ ปจฺจยา สํกิลิฏฺโฐ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ จ วตฺถุญฺจ ปจฺจยา วิจิกิจฺฉาสหคโต อุทฺธจฺจสหคโต โมโหฯ (1)

2. ปจฺจยปจฺจนียํ

2. สงฺขฺยาวาโร

[48] นเหตุยา จตฺตาริ, นอารมฺมเณ ตีณิ, นอธิปติยา นว, นอนนฺตเร ตีณิ, นสมนนฺตเร ตีณิ, นอญฺญมญฺเญ ตีณิ, นอุปนิสฺสเย ตีณิ, นปุเรชาเต จตฺตาริ, นปจฺฉาชาเต นว, นอาเสวเน นว, นกมฺเม จตฺตาริ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ตีณิ, นวิปฺปยุตฺเต ทฺเว, โนนตฺถิยา ตีณิ, โนวิคเต ตีณิฯ

4. นิสฺสยวาโร

(เอวํ อิตเร ทฺเว คณนาปิ นิสฺสยวาโรปิ กาตพฺโพฯ)

5. สํสฏฺฐวาโร

1-4. ปจฺจยานุโลมาทิ

เหตุปจฺจโย

[49] สํกิลิฏฺฐํ ธมฺมํ สํสฏฺโฐ สํกิลิฏฺโฐ ธมฺโม อุปฺปชฺชติ เหตุปจฺจยา – สํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ …เป.…ฯ (1)

อสํกิลิฏฺฐํ ธมฺมํ สํสฏฺโฐ อสํกิลิฏฺโฐ ธมฺโม อุปฺปชฺชติ เหตุปจฺจยา – อสํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… ปฏิสนฺธิกฺขเณ…เป.…ฯ (1)

เหตุยา ทฺเว, อารมฺมเณ ทฺเว, อธิปติยา ทฺเว (สพฺพตฺถ ทฺเว), วิปาเก เอกํ…เป.… อวิคเต ทฺเวฯ

อนุโลมํฯ

[50] สํกิลิฏฺฐํ ธมฺมํ สํสฏฺโฐ สํกิลิฏฺโฐ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ สํสฏฺโฐ วิจิกิจฺฉาสหคโต อุทฺธจฺจสหคโต โมโหฯ (1)

อสํกิลิฏฺฐํ ธมฺมํ สํสฏฺโฐ อสํกิลิฏฺโฐ ธมฺโม อุปฺปชฺชติ นเหตุปจฺจยา – อเหตุกํ อสํกิลิฏฺฐํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… อเหตุกปฏิสนฺธิกฺขเณ…เป.…ฯ (1)

นเหตุยา ทฺเว, นอธิปติยา ทฺเว, นปุเรชาเต ทฺเว, นปจฺฉาชาเต ทฺเว, นอาเสวเน ทฺเว, นกมฺเม ทฺเว, นวิปาเก ทฺเว, นฌาเน เอกํ, นมคฺเค เอกํ, นวิปฺปยุตฺเต ทฺเวฯ

ปจฺจนียํฯ

6. สมฺปยุตฺตวาโร

(เอวํ อิตเร ทฺเว คณนาปิ สมฺปยุตฺตวาโรปิ กาตพฺโพฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[51] สํกิลิฏฺโฐ ธมฺโม สํกิลิฏฺฐสฺส ธมฺมสฺส เหตุปจฺจเยน ปจฺจโย – สํกิลิฏฺฐา เหตู สมฺปยุตฺตกานํ ขนฺธานํ เหตุปจฺจเยน ปจฺจโยฯ (1)