[345] สอุตฺตรํ ธมฺมํ ปฏิจฺจ สอุตฺตโร ธมฺโม อุปฺปชฺชติ เหตุปจฺจยา – สอุตฺตรํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ…เป.…ฯ (ยาว อชฺฌตฺติกา มหาภูตาฯ ยถา จูฬนฺตรทุเก โลกิยทุกสทิสํ นินฺนานากรณํฯ)

สอุตฺตรทุกํ นิฏฺฐิตํฯ

100. สรณทุกํ

1. ปฏิจฺจวาโร

1-4. ปจฺจยานุโลมาทิ

เหตุปจฺจโย

[346] สรณํ ธมฺมํ ปฏิจฺจ สรโณ ธมฺโม อุปฺปชฺชติ เหตุปจฺจยา – สรณํ เอกํ ขนฺธํ ปฏิจฺจ ตโย ขนฺธา…เป.… ทฺเว ขนฺเธ…เป.…ฯ (ปญฺจ ปญฺหา อรูปาวจรทุกสทิสา, อนุโลมปฏิจฺจสทิสาฯ)

เหตุยา ปญฺจ, อารมฺมเณ ทฺเว, อธิปติยา ปญฺจ…เป.… อวิคเต ปญฺจฯ

อนุโลมํฯ

สรณํ ธมฺมํ ปฏิจฺจ สรโณ ธมฺโม อุปฺปชฺชติ นเหตุปจฺจยา – วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต อุทฺธจฺจสหคโต โมโหฯ (1)

อรณํ ธมฺมํ ปฏิจฺจ อรโณ ธมฺโม อุปฺปชฺชติ นเหตุปจฺจยา – อเหตุกํ อรณํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… อเหตุกปฏิสนฺธิกฺขเณ…เป.… (ยาว อสญฺญสตฺตา)ฯ (1)