นกามาวจโร ธมฺโม กามาวจรสฺส ธมฺมสฺส อนนฺตรปจฺจเยน ปจฺจโย – นกามาวจรํ จุติจิตฺตํ กามาวจรสฺส อุปปตฺติจิตฺตสฺส, นกามาวจรํ ภวงฺคํ อาวชฺชนาย, นกามาวจรา ขนฺธา กามาวจรสฺส วุฏฺฐานสฺส อนนฺตรปจฺจเยน ปจฺจโย…ฯ (2)

สมนนฺตรปจฺจเยน ปจฺจโย… สหชาตปจฺจเยน ปจฺจโย… สตฺต… อญฺญมญฺญปจฺจเยน ปจฺจโย… ฉ… นิสฺสยปจฺจเยน ปจฺจโย… สตฺตฯ

อุปนิสฺสยปจฺจโย

[213] กามาวจโร ธมฺโม กามาวจรสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – กามาวจรํ สทฺธํ อุปนิสฺสาย ทานํ เทติ…เป.… สีลํ…เป.… อุโปสถกมฺมํ…เป.… วิปสฺสนํ อุปฺปาเทติ, มานํ ชปฺเปติ, ทิฏฺฐิํ คณฺหาติ; กามาวจรํ สีลํ…เป.… ปญฺญํ… ราคํ…เป.… ปตฺถนํ… กายิกํ สุขํ… กายิกํ ทุกฺขํ… อุตุํ… โภชนํ… เสนาสนํ อุปนิสฺสาย ทานํ เทติ…เป.… วิปสฺสนํ อุปฺปาเทติ, ปาณํ หนติ…เป.… สงฺฆํ ภินฺทติ; กามาวจรา สทฺธา…เป.… เสนาสนํ กามาวจราย สทฺธาย…เป.… ปตฺถนาย… กายิกสฺส สุขสฺส… กายิกสฺส ทุกฺขสฺส อุปนิสฺสยปจฺจเยน ปจฺจโยฯ (1)

กามาวจโร ธมฺโม นกามาวจรสฺส ธมฺมสฺส อุปนิสฺสยปจฺจเยน ปจฺจโย – อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – กามาวจรํ สทฺธํ อุปนิสฺสาย นกามาวจรํ ฌานํ อุปฺปาเทติ, มคฺคํ…เป.… อภิญฺญํ…เป.… สมาปตฺติํ อุปฺปาเทติ; กามาวจรํ สีลํ…เป.… เสนาสนํ อุปนิสฺสาย นกามาวจรํ ฌานํ อุปฺปาเทติ, มคฺคํ…เป.… อภิญฺญํ…เป.… สมาปตฺติํ อุปฺปาเทติ; กามาวจรา สทฺธา…เป.… เสนาสนํ นกามาวจราย สทฺธาย…เป.… ปญฺญาย… มคฺคสฺส, ผลสมาปตฺติยา อุปนิสฺสยปจฺจเยน ปจฺจโย; ปฐมสฺส ฌานสฺส ปริกมฺมํ ปฐมสฺส ฌานสฺส…เป.… จตุตฺถสฺส ฌานสฺส…เป.… อากาสานญฺจายตนสฺส…เป.… ปฐมสฺส มคฺคสฺส…เป.… จตุตฺถสฺส มคฺคสฺส ปริกมฺมํ จตุตฺถสฺส มคฺคสฺส อุปนิสฺสยปจฺจเยน ปจฺจโยฯ (2)

[214] นกามาวจโร ธมฺโม นกามาวจรสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย , อนนฺตรูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – นกามาวจรํ สทฺธํ อุปนิสฺสาย ฌานํ อุปฺปาเทติ, มคฺคํ…เป.… อภิญฺญํ…เป.… สมาปตฺติํ อุปฺปาเทติ; นกามาวจรํ สีลํ …เป.… ปญฺญํ อุปนิสฺสาย นกามาวจรํ ฌานํ อุปฺปาเทติ…เป.… มคฺคํ…เป.… อภิญฺญํ…เป.… สมาปตฺติํ อุปฺปาเทติ; นกามาวจรา สทฺธา…เป.… ปญฺญา นกามาวจราย สทฺธาย…เป.… ปญฺญาย, มคฺคสฺส, ผลสมาปตฺติยา อุปนิสฺสยปจฺจเยน ปจฺจโย; ปฐมํ ฌานํ ทุติยสฺส ฌานสฺส อุปนิสฺสยปจฺจเยน ปจฺจโย…เป.… ตติยํ ฌานํ…เป.… จตุตฺถํ ฌานํ…เป.… อากาสานญฺจายตนํ วิญฺญาณญฺจายตนสฺส …เป.… อากิญฺจญฺญายตนํ เนวสญฺญานาสญฺญายตนสฺส อุปนิสฺสยปจฺจเยน ปจฺจโย; ปฐโม มคฺโค ทุติยสฺส มคฺคสฺส…เป.… ทุติโย มคฺโค ตติยสฺส มคฺคสฺส…เป.… ตติโย มคฺโค จตุตฺถสฺส มคฺคสฺส อุปนิสฺสยปจฺจเยน ปจฺจโย; มคฺโค ผลสมาปตฺติยา อุปนิสฺสยปจฺจเยน ปจฺจโยฯ (1)

นกามาวจโร ธมฺโม กามาวจรสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – นกามาวจรํ สทฺธํ อุปนิสฺสาย ทานํ เทติ, สีลํ…เป.… อุโปสถกมฺมํ…เป.… วิปสฺสนํ อุปฺปาเทติ, มานํ ชปฺเปติ, ทิฏฺฐิํ คณฺหาติ; นกามาวจรํ สีลํ…เป.… ปญฺญํ อุปนิสฺสาย ทานํ เทติ, สีลํ…เป.… อุโปสถกมฺมํ…เป.… วิปสฺสนํ อุปฺปาเทติ, มานํ ชปฺเปติ, ทิฏฺฐิํ คณฺหาติ; นกามาวจรา สทฺธา…เป.… ปญฺญา กามาวจราย สทฺธาย…เป.… ปญฺญาย, ราคสฺส…เป.… ปตฺถนาย กายิกสฺส สุขสฺส, กายิกสฺส ทุกฺขสฺส อุปนิสฺสยปจฺจเยน ปจฺจโย; อริยา มคฺคํ อุปนิสฺสาย สงฺขาเร อนิจฺจโต…เป.… วิปสฺสนฺติ, มคฺโค อริยานํ อตฺถปฏิสมฺภิทาย… ธมฺมปฏิสมฺภิทาย… นิรุตฺติปฏิสมฺภิทาย… ปฏิภานปฏิสมฺภิทาย… ฐานาฐานโกสลฺลสฺส อุปนิสฺสยปจฺจเยน ปจฺจโย; ผลสมาปตฺติ กายิกสฺส สุขสฺส อุปนิสฺสยปจฺจเยน ปจฺจโยฯ (2)

ปุเรชาตปจฺจยาทิ

[215] กามาวจโร ธมฺโม กามาวจรสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ อารมฺมณปุเรชาตํ – จกฺขุํ…เป.… วตฺถุํ อนิจฺจโต…เป.… โทมนสฺสํ อุปฺปชฺชติ; รูปายตนํ จกฺขุวิญฺญาณสฺส…เป.… โผฏฺฐพฺพายตนํ กายวิญฺญาณสฺส …เป.…ฯ วตฺถุปุเรชาตํ – จกฺขายตนํ จกฺขุวิญฺญาณสฺส…เป.… กายายตนํ กายวิญฺญาณสฺส…เป.… วตฺถุ กามาวจรานํ ขนฺธานํ ปุเรชาตปจฺจเยน ปจฺจโยฯ กามาวจโร ธมฺโม นกามาวจรสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ อารมฺมณปุเรชาตํ – ทิพฺเพน จกฺขุนา รูปํ ปสฺสติ, ทิพฺพาย โสตธาตุยา สทฺทํ สุณาติฯ วตฺถุปุเรชาตํ – วตฺถุ นกามาวจรานํ ขนฺธานํ ปุเรชาตปจฺจเยน ปจฺจโยฯ (2)

ปจฺฉาชาตปจฺจเยน ปจฺจโย… ทฺเว… อาเสวนปจฺจเยน ปจฺจโย… ตีณิฯ

กมฺมปจฺจยาทิ

[216] กามาวจโร ธมฺโม กามาวจรสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกา (สํขิตฺตํ)ฯ

นกามาวจโร ธมฺโม นกามาวจรสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกา (สํขิตฺตํ)ฯ นกามาวจโร ธมฺโม กามาวจรสฺส ธมฺมสฺส กมฺมปจฺจเยน ปจฺจโย – สหชาตา, นานากฺขณิกา (สํขิตฺตํ)ฯ นกามาวจโร ธมฺโม กามาวจรสฺส จ นกามาวจรสฺส จ ธมฺมสฺส กมฺมปจฺจเยน ปจฺจโย – สหชาตา, นานากฺขณิกา (สํขิตฺตํ)ฯ (3)

วิปากปจฺจเยน ปจฺจโย… จตฺตาริ… อาหารปจฺจเยน ปจฺจโย… จตฺตาริ… อินฺทฺริยปจฺจเยน ปจฺจโย… จตฺตาริ… ฌานปจฺจเยน ปจฺจโย… จตฺตาริ… มคฺคปจฺจเยน ปจฺจโย… จตฺตาริ… สมฺปยุตฺตปจฺจเยน ปจฺจโย… ทฺเวฯ

วิปฺปยุตฺตปจฺจโย

[217] กามาวจโร ธมฺโม กามาวจรสฺส ธมฺมสฺส วิปฺปยุตฺตปจฺจเยน ปจฺจโย – สหชาตํ, ปุเรชาตํ, ปจฺฉาชาตํ (สํขิตฺตํ)ฯ กามาวจโร ธมฺโม นกามาวจรสฺส ธมฺมสฺส วิปฺปยุตฺตปจฺจเยน ปจฺจโย – สหชาตํ, ปุเรชาตํฯ สหชาตํ (สํขิตฺตํ) ปฏิสนฺธิกฺขเณ วตฺถุ นกามาวจรานํ ขนฺธานํ วิปฺปยุตฺตปจฺจเยน ปจฺจโยฯ ปุเรชาตํ – วตฺถุ นกามาวจรานํ ขนฺธานํ วิปฺปยุตฺตปจฺจเยน ปจฺจโยฯ (2)

นกามาวจโร ธมฺโม กามาวจรสฺส ธมฺมสฺส วิปฺปยุตฺตปจฺจเยน ปจฺจโย – สหชาตํ, ปจฺฉาชาตํฯ สหชาตา – นกามาวจรา ขนฺธา จิตฺตสมุฏฺฐานานํ รูปานํ วิปฺปยุตฺตปจฺจเยน ปจฺจโย; ปฏิสนฺธิกฺขเณ…เป.…ฯ ปจฺฉาชาตา – นกามาวจรา ขนฺธา ปุเรชาตสฺส อิมสฺส กายสฺส วิปฺปยุตฺตปจฺจเยน ปจฺจโยฯ (1)