นอธิปติปจฺจยาทิ

[204] กามาวจรํ ธมฺมํ ปจฺจยา กามาวจโร ธมฺโม อุปฺปชฺชติ นอธิปติปจฺจยา… เอกํ (ยาว อสญฺญสตฺตา)ฯ กามาวจรํ ธมฺมํ ปจฺจยา นกามาวจโร ธมฺโม อุปฺปชฺชติ นอธิปติปจฺจยา – วตฺถุํ ปจฺจยา นกามาวจราธิปติ, วตฺถุํ ปจฺจยา วิปากา นกามาวจรา ขนฺธา; ปฏิสนฺธิกฺขเณ…เป.…ฯ กามาวจรํ ธมฺมํ ปจฺจยา กามาวจโร จ นกามาวจโร จ ธมฺมา อุปฺปชฺชนฺติ นอธิปติปจฺจยา – วตฺถุํ ปจฺจยา วิปากา นกามาวจรา ขนฺธา, มหาภูเต ปจฺจยา จิตฺตสมุฏฺฐานํ รูปํ; ปฏิสนฺธิกฺขเณ…เป.…ฯ (3)

นกามาวจรํ ธมฺมํ ปจฺจยา นกามาวจโร ธมฺโม อุปฺปชฺชติ นอธิปติปจฺจยา… ตีณิ (ปฏิจฺจสทิสา)ฯ

กามาวจรญฺจ นกามาวจรญฺจ ธมฺมํ ปจฺจยา กามาวจโร ธมฺโม อุปฺปชฺชติ นอธิปติปจฺจยา (ปฏิจฺจสทิสาฯ มูลํ กาตพฺพํฯ) นกามาวจเร ขนฺเธ จ วตฺถุญฺจ ปจฺจยา นกามาวจราธิปติ, วิปากํ นกามาวจรํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป.… ทฺเว ขนฺเธ จ…เป.… ปฏิสนฺธิกฺขเณ…เป.…ฯ (มูลํ กาตพฺพํฯ) วิปากํ นกามาวจรํ เอกํ ขนฺธญฺจ วตฺถุญฺจ ปจฺจยา ตโย ขนฺธา…เป.… ทฺเว ขนฺเธ จ…เป.… วิปาเก นกามาวจเร ขนฺเธ จ มหาภูเต จ ปจฺจยา จิตฺตสมุฏฺฐานํ รูปํ; ปฏิสนฺธิกฺขเณ…เป.…ฯ (3)

นอุปนิสฺสยปจฺจยา… ตีณิ… นอาเสวนปจฺจยา (สุทฺธเก อรูปมิสฺสเก จ ‘‘วิปาก’’นฺติ นิยาเมตพฺพํ, รูปมิสฺสเก นตฺถิฯ สํขิตฺตํ)ฯ

สุทฺธํ

นเหตุยา เอกํ, นอารมฺมเณ ตีณิ, นอธิปติยา นว, นอนนฺตเร ตีณิ, นสมนนฺตเร ตีณิ, นอุปนิสฺสเย ตีณิ, นปุเรชาเต นว, นปจฺฉาชาเต นว, นอาเสวเน นว, นกมฺเม จตฺตาริ, นวิปาเก นว, นอาหาเร เอกํ, นอินฺทฺริเย เอกํ, นฌาเน เอกํ, นมคฺเค เอกํ, นสมฺปยุตฺเต ตีณิ, นวิปฺปยุตฺเต ทฺเว, โนนตฺถิยา ตีณิ, โนวิคเต ตีณิฯ

ปจฺจนียํฯ

4. นิสฺสยวาโร

(เอวํ อิตเร ทฺเว คณนาปิ นิสฺสยวาโรปิ กาตพฺโพฯ)

5. สํสฏฺฐวาโร

1-4. ปจฺจยานุโลมาทิ

เหตุปจฺจโย

[205] กามาวจรํ ธมฺมํ สํสฏฺโฐ กามาวจโร ธมฺโม อุปฺปชฺชติ เหตุปจฺจยา – กามาวจรํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… ปฏิสนฺธิกฺขเณ…เป.…ฯ (1)

นกามาวจรํ ธมฺมํ สํสฏฺโฐ นกามาวจโร ธมฺโม อุปฺปชฺชติ เหตุปจฺจยา – นกามาวจรํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… ปฏิสนฺธิกฺขเณ…เป.…ฯ (1)

เหตุยา ทฺเว, อารมฺมเณ ทฺเว, อธิปติยา ทฺเว (สพฺพตฺถ ทฺเว), อวิคเต ทฺเวฯ

อนุโลมํฯ

กามาวจรํ ธมฺมํ สํสฏฺโฐ กามาวจโร ธมฺโม อุปฺปชฺชติ นเหตุปจฺจยา – อเหตุกํ กามาวจรํ เอกํ ขนฺธํ สํสฏฺฐา ตโย ขนฺธา…เป.… ทฺเว ขนฺเธ…เป.… อเหตุกปฏิสนฺธิกฺขเณ…เป.… วิจิกิจฺฉาสหคเต อุทฺธจฺจสหคเต ขนฺเธ สํสฏฺโฐ วิจิกิจฺฉาสหคโต อุทฺธจฺจสหคโต โมโหฯ

นเหตุยา เอกํ, นอธิปติยา ทฺเว, นปุเรชาเต ทฺเว, นปจฺฉาชาเต ทฺเว, นอาเสวเน ทฺเว, นกมฺเม ทฺเว, นวิปาเก ทฺเว, นฌาเน เอกํ, นมคฺเค เอกํ, นวิปฺปยุตฺเต ทฺเวฯ

ปจฺจนียํฯ

6. สมฺปยุตฺตวาโร

(เอวํ อิตเร ทฺเว คณนาปิ สมฺปยุตฺตวาโรปิ กาตพฺโพฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[206] กามาวจโร ธมฺโม กามาวจรสฺส ธมฺมสฺส เหตุปจฺจเยน ปจฺจโย – กามาวจรา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโย; ปฏิสนฺธิกฺขเณ…เป.…ฯ (1)