อนนฺตรปจฺจยาทิ

[171] สุขสหคโต ธมฺโม สุขสหคตสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สุขสหคตา ขนฺธา ปจฺฉิมานํ ปจฺฉิมานํ สุขสหคตานํ ขนฺธานํ อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา สุขสหคตา ขนฺธา ปจฺฉิมสฺส ปจฺฉิมสฺส สุขสฺส อนนฺตรปจฺจเยน ปจฺจโยฯ สุขสหคตํ จุติจิตฺตํ นสุขสหคตสฺส อุปปตฺติจิตฺตสฺส… สุขสหคตํ ภวงฺคํ อาวชฺชนาย… สุขสหคตํ กายวิญฺญาณํ วิปากมโนธาตุยา… สุขสหคตา วิปากมโนวิญฺญาณธาตุ กิริยมโนวิญฺญาณธาตุยา… สุขสหคตํ ภวงฺคํ นสุขสหคตสฺส ภวงฺคสฺส… สุขสหคตํ กุสลากุสลํ นสุขสหคตสฺส วุฏฺฐานสฺส… กิริยํ วุฏฺฐานสฺส… ผลํ วุฏฺฐานสฺส อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา สุขสหคตา ขนฺธา ปจฺฉิมานํ ปจฺฉิมานํ สุขสหคตานํ ขนฺธานํ สุขสฺส จ อนนฺตรปจฺจเยน ปจฺจโยฯ (1)

นสุขสหคโต ธมฺโม นสุขสหคตสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา นสุขสหคตา…เป.…ฯ (มูลํฯ ตีณิปิ สปฺปีติกทุกสทิสาฯ)

[172] สุขสหคโต จ นสุขสหคโต จ ธมฺมา สุขสหคตสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา สุขสหคตา ขนฺธา จ สุขญฺจ ปจฺฉิมานํ ปจฺฉิมานํ สุขสหคตานํ ขนฺธานํ อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา สุขสหคตา ขนฺธา จ สุขญฺจ ปจฺฉิมสฺส ปจฺฉิมสฺส สุขสฺส อนนฺตรปจฺจเยน ปจฺจโย; สุขสหคตํ จุติจิตฺตญฺจ สุขญฺจ นสุขสหคตสฺส อุปปตฺติจิตฺตสฺส สุขสหคตํ ภวงฺคญฺจ สุขญฺจ อาวชฺชนาย … สุขสหคตํ กายวิญฺญาณญฺจ สุขญฺจ วิปากมโนธาตุยา… สุขสหคตา วิปากมโนวิญฺญาณธาตุ จ สุขญฺจ กิริยมโนวิญฺญาณธาตุยา… สุขสหคตํ ภวงฺคญฺจ สุขญฺจ นสุขสหคตสฺส ภวงฺคสฺส… สุขสหคตํ กุสลากุสลญฺจ สุขญฺจ นสุขสหคตสฺส วุฏฺฐานสฺส… กิริยํ วุฏฺฐานสฺส… ผลํ วุฏฺฐานสฺส อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา สุขสหคตา ขนฺธา จ สุขญฺจ ปจฺฉิมานํ ปจฺฉิมานํ สุขสหคตานํ ขนฺธานํ สุขสฺส จ อนนฺตรปจฺจเยน ปจฺจโยฯ (3)

สมนนฺตรปจฺจเยน ปจฺจโย… สหชาตปจฺจเยน ปจฺจโย… อญฺญมญฺญปจฺจเยน ปจฺจโย… นิสฺสยปจฺจเยน ปจฺจโยฯ

อุปนิสฺสยปจฺจโย

[173] สุขสหคโต ธมฺโม สุขสหคตสฺส ธมฺมสฺส อุปนิสฺสยปจฺจเยน ปจฺจโย… ตีณิฯ

นสุขสหคโต ธมฺโม นสุขสหคตสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – นสุขสหคตํ สทฺธํ อุปนิสฺสาย นสุขสหคเตน จิตฺเตน ทานํ เทติ, สีลํ…เป.… สมาปตฺติํ อุปฺปาเทติ, มานํ ชปฺเปติ, ทิฏฺฐิํ คณฺหาติ; นสุขสหคตํ สีลํ…เป.… ปญฺญํ… ราคํ…เป.… ปตฺถนํ… กายิกํ สุขํ… กายิกํ ทุกฺขํ… อุตุํ… โภชนํ… เสนาสนํ สุขํ อุปนิสฺสาย นสุขสหคเตน จิตฺเตน ทานํ เทติ…เป.… สมาปตฺติํ อุปฺปาเทติ, ปาณํ หนติ…เป.… สงฺฆํ ภินฺทติ; นสุขสหคตา สทฺธา…เป.… เสนาสนํ สุขญฺจ นสุขสหคตาย สทฺธาย…เป.… ปญฺญาย… ราคสฺส… โทสสฺส…เป.… ปตฺถนาย… กายิกสฺส สุขสฺส, กายิกสฺส ทุกฺขสฺส, มคฺคสฺส, ผลสมาปตฺติยา สุขสฺส จ อุปนิสฺสยปจฺจเยน ปจฺจโยฯ (1)

นสุขสหคโต ธมฺโม สุขสหคตสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – นสุขสหคตํ สทฺธํ อุปนิสฺสาย สุขสหคเตน จิตฺเตน ทานํ เทติ…เป.… สมาปตฺติํ อุปฺปาเทติ, มานํ ชปฺเปติ, ทิฏฺฐิํ คณฺหาติ; นสุขสหคตํ สีลํ…เป.… ปญฺญํ… ราคํ…เป.… ปตฺถนํ… กายิกํ สุขํ… กายิกํ ทุกฺขํ… อุตุํ… โภชนํ… เสนาสนํ สุขํ อุปนิสฺสาย สุขสหคเตน จิตฺเตน ทานํ เทติ…เป.… สมาปตฺติํ อุปฺปาเทติ; สุขสหคเตน จิตฺเตน อทินฺนํ อาทิยติ; มุสา…เป.… ปิสุณํ…เป.… สมฺผํ…เป.… สนฺธิํ…เป.… นิลฺโลปํ…เป.… เอกาคาริกํ…เป.… ปริปนฺเถ…เป.… ปรทารํ…เป.… คามฆาตํ…เป.… นิคมฆาตํ กโรติ; นสุขสหคตา สทฺธา…เป.… เสนาสนํ สุขญฺจ สุขสหคตาย สทฺธาย…เป.… ปญฺญาย… ราคสฺส… มานสฺส… ทิฏฺฐิยา… ปตฺถนาย… กายิกสฺส สุขสฺส… มคฺคสฺส ผลสมาปตฺติยา อุปนิสฺสยปจฺจเยน ปจฺจโยฯ (2)

นสุขสหคโต ธมฺโม สุขสหคตสฺส จ นสุขสหคตสฺส จ ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ

ปกตูปนิสฺสโย – นสุขสหคตํ สทฺธํ อุปนิสฺสาย สุขสหคเตน จิตฺเตน ทานํ เทติ…เป.… (ทุติยคมนสทิสํ) มานํ ชปฺเปติ, ทิฏฺฐิํ คณฺหาติ; นสุขสหคตํ สีลํ…เป.… เสนาสนํ สุขํ อุปนิสฺสาย ทานํ เทติ…เป.… สมาปตฺติํ อุปฺปาเทติ, สุขสหคเตน จิตฺเตน อทินฺนํ อาทิยติ…เป.… นสุขสหคตา สทฺธา…เป.… เสนาสนํ สุขญฺจ สุขสหคตาย … สทฺธาย…เป.… ปตฺถนาย … กายิกสฺส สุขสฺส, มคฺคสฺส, ผลสมาปตฺติยา สุขสฺส จ อุปนิสฺสยปจฺจเยน ปจฺจโยฯ (3)

สุขสหคโต จ นสุขสหคโต จ ธมฺมา สุขสหคตสฺส ธมฺมสฺส อุปนิสฺสยปจฺจเยน ปจฺจโย… ตีณิฯ

ปุเรชาตปจฺจยาทิ

[174] นสุขสหคโต ธมฺโม นสุขสหคตสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ อารมฺมณปุเรชาตํ – จกฺขุํ…เป.… วตฺถุํ นสุขสหคเตน จิตฺเตน อนิจฺจโต…เป.… วิปสฺสติ อสฺสาเทติ อภินนฺทติ, ตํ อารพฺภ นสุขสหคโต ราโค อุปฺปชฺชติ…เป.… โทมนสฺสํ อุปฺปชฺชติ, สุขํ อุปฺปชฺชติ, ทิพฺเพน จกฺขุนา รูปํ ปสฺสติ…เป.… โผฏฺฐพฺพายตนํ กายวิญฺญาณสฺส…เป.…ฯ วตฺถุปุเรชาตํ – จกฺขายตนํ จกฺขุวิญฺญาณสฺส…เป.… กายายตนํ กายวิญฺญาณสฺส…เป.… วตฺถุ นสุขสหคตานํ ขนฺธานํ สุขสฺส จ ปุเรชาตปจฺจเยน ปจฺจโยฯ (1)

นสุขสหคโต ธมฺโม สุขสหคตสฺส ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ อารมฺมณปุเรชาตํ – จกฺขุํ…เป.… วตฺถุํ สุขสหคเตน จิตฺเตน อนิจฺจโต…เป.… วิปสฺสติ, อสฺสาเทติ อภินนฺทติ, ตํ อารพฺภ สุขสหคโต ราโค อุปฺปชฺชติ , ทิฏฺฐิ อุปฺปชฺชติฯ วตฺถุปุเรชาตํ – วตฺถุ สุขสหคตานํ ขนฺธานํ ปุเรชาตปจฺจเยน ปจฺจโยฯ (2)

นสุขสหคโต ธมฺโม สุขสหคตสฺส จ นสุขสหคตสฺส จ ธมฺมสฺส ปุเรชาตปจฺจเยน ปจฺจโย – อารมฺมณปุเรชาตํ, วตฺถุปุเรชาตํฯ อารมฺมณปุเรชาตํ – จกฺขุํ…เป.… วตฺถุํ สุขสหคเตน จิตฺเตน อนิจฺจโต…เป.… วิปสฺสติ, อสฺสาเทติ อภินนฺทติ, ตํ อารพฺภ สุขญฺจ สมฺปยุตฺตกา ขนฺธา จ อุปฺปชฺชนฺติฯ วตฺถุปุเรชาตํ – วตฺถุ สุขสหคตานํ ขนฺธานํ สุขสฺส จ ปุเรชาตปจฺจเยน ปจฺจโยฯ (3)

ปจฺฉาชาตปจฺจเยน ปจฺจโย… ตีณิ… อาเสวนปจฺจเยน ปจฺจโย… นวฯ