อนนฺตรปจฺจยาทิ

[20] กิเลโส ธมฺโม กิเลสสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา กิเลสา ปจฺฉิมานํ ปจฺฉิมานํ กิเลสานํ อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา กิเลสา ปจฺฉิมานํ ปจฺฉิมานํ โนกิเลสานํ ขนฺธานํ อนนฺตรปจฺจเยน ปจฺจโย; กิเลสา วุฏฺฐานสฺส อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา กิเลสา ปจฺฉิมานํ ปจฺฉิมานํ กิเลสานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโยฯ (3)

[21] โนกิเลโส ธมฺโม โนกิเลสสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา โนกิเลสา ขนฺธา ปจฺฉิมานํ ปจฺฉิมานํ โนกิเลสานํ ขนฺธานํ อนนฺตรปจฺจเยน ปจฺจโย…เป.… ผลสมาปตฺติยา อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา โนกิเลสา ขนฺธา ปจฺฉิมานํ ปจฺฉิมานํ กิเลสานํ อนนฺตรปจฺจเยน ปจฺจโย; อาวชฺชนา กิเลสานํ อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา โนกิเลสา ขนฺธา ปจฺฉิมานํ ปจฺฉิมานํ กิเลสานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโย; อาวชฺชนา กิเลสานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโยฯ (3)

[22] กิเลโส จ โนกิเลโส จ ธมฺมา กิเลสสฺส ธมฺมสฺส อนนฺตรปจฺจเยน ปจฺจโย – ปุริมา ปุริมา กิเลสา จ สมฺปยุตฺตกา จ ขนฺธา ปจฺฉิมานํ ปจฺฉิมานํ กิเลสานํ อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา กิเลสา จ สมฺปยุตฺตกา จ ขนฺธา ปจฺฉิมานํ ปจฺฉิมานํ โนกิเลสานํ ขนฺธานํ อนนฺตรปจฺจเยน ปจฺจโย; กิเลสา จ สมฺปยุตฺตกา จ ขนฺธา วุฏฺฐานสฺส อนนฺตรปจฺจเยน ปจฺจโยฯ (มูลํ กาตพฺพํฯ) ปุริมา ปุริมา กิเลสา จ สมฺปยุตฺตกา จ ขนฺธา ปจฺฉิมานํ ปจฺฉิมานํ กิเลสานํ สมฺปยุตฺตกานญฺจ ขนฺธานํ อนนฺตรปจฺจเยน ปจฺจโยฯ (3)

สมนนฺตรปจฺจเยน ปจฺจโย, สหชาตปจฺจเยน ปจฺจโย, อญฺญมญฺญปจฺจเยน ปจฺจโย, นิสฺสยปจฺจเยน ปจฺจโยฯ

อุปนิสฺสยปจฺจโย

[23] กิเลโส ธมฺโม กิเลสสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – กิเลสา กิเลสานํ อุปนิสฺสยปจฺจเยน ปจฺจโย… ตีณิฯ

[24] โนกิเลโส ธมฺโม โนกิเลสสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – สทฺธํ อุปนิสฺสาย ทานํ เทติ…เป.… มานํ ชปฺเปติ, ทิฏฺฐิํ คณฺหาติ; สีลํ…เป.… ปญฺญํ… ราคํ… โทสํ… โมหํ… มานํ… ทิฏฺฐิํ… ปตฺถนํ… กายิกํ สุขํ…เป.… เสนาสนํ อุปนิสฺสาย ทานํ เทติ…เป.… สงฺฆํ ภินฺทติ; สทฺธา…เป.… เสนาสนํ สทฺธาย…เป.… ผลสมาปตฺติยา อุปนิสฺสยปจฺจเยน ปจฺจโยฯ (1)

โนกิเลโส ธมฺโม กิเลสสฺส ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – สทฺธํ อุปนิสฺสาย มานํ ชปฺเปติ… ทิฏฺฐิํ คณฺหาติ; สีลํ…เป.… เสนาสนํ อุปนิสฺสาย ปาณํ หนติ…เป.… สงฺฆํ ภินฺทติ; สทฺธา…เป.… เสนาสนํ กิเลสานํ อุปนิสฺสยปจฺจเยน ปจฺจโยฯ (2)

โนกิเลโส ธมฺโม กิเลสสฺส จ โนกิเลสสฺส จ ธมฺมสฺส อุปนิสฺสยปจฺจเยน ปจฺจโย – อารมฺมณูปนิสฺสโย, อนนฺตรูปนิสฺสโย, ปกตูปนิสฺสโย…เป.…ฯ ปกตูปนิสฺสโย – สทฺธํ อุปนิสฺสาย มานํ ชปฺเปติ… ทิฏฺฐิํ คณฺหาติ; สีลํ…เป.… เสนาสนํ อุปนิสฺสาย ปาณํ หนติ…เป.… สงฺฆํ ภินฺทติ; สทฺธา…เป.… เสนาสนํ กิเลสานํ สมฺปยุตฺตกานญฺจ ขนฺธานํ อุปนิสฺสยปจฺจเยน ปจฺจโยฯ (3)

กิเลโส จ โนกิเลโส จ ธมฺมา กิเลสสฺส ธมฺมสฺส อุปนิสฺสยปจฺจเยน ปจฺจโย… ตีณิฯ