เหตุทุกํ

[167] เหตุปจฺจยา นอารมฺมเณ ตีณิ, นอธิปติยา นว, นอนนฺตเร นว, นสมนนฺตเร นว, นอญฺญมญฺเญ นว, นอุปนิสฺสเย ตีณิ, นปุเรชาเต นว, นปจฺฉาชาเต นว, นอาเสวเน นว, นกมฺเม เอกํ, นวิปาเก ปญฺจ, นสมฺปยุตฺเต ตีณิ, นวิปฺปยุตฺเต เอกํ, โนนตฺถิยา ตีณิ, โนวิคเต ตีณิ (เอวํ คเณตพฺพํ)ฯ

อนุโลมปจฺจนียํฯ

4. ปจฺจยปจฺจนียานุโลมํ

นเหตุทุกํ

[168] นเหตุปจฺจยา อารมฺมเณ เอกํ…เป.… อาหาเร เอกํ…เป.… ฌาเน เอกํ, สมฺปยุตฺเต เอกํ, วิปฺปยุตฺเต เอกํ…เป.… วิคเต เอกํ, อวิคเต เอกํ (เอวํ คเณตพฺพํ)ฯ

ปจฺจนียานุโลมํฯ

2. สหชาตวาโร

(สหชาตวาเรปิ เอวํ คเณตพฺพํฯ)

3. ปจฺจยวาโร

1-4. ปจฺจยานุโลมาทิ

[169] นเหตุํ สเหตุกํ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา… ตีณิฯ

นเหตุํ อเหตุกํ ธมฺมํ ปจฺจยา นเหตุ อเหตุโก ธมฺโม อุปฺปชฺชติ เหตุปจฺจยา – เอกํ มหาภูตํ ปจฺจยา ตโย มหาภูตา, มหาภูเต ปจฺจยา จิตฺตสมุฏฺฐานํ รูปํ, กฏตฺตารูปํ, อุปาทารูปํฯ (1)

นเหตุํ อเหตุกํ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา – วตฺถุํ ปจฺจยา นเหตู สเหตุกา ขนฺธา; ปฏิสนฺธิกฺขเณ…เป.… (2)

นเหตุํ อเหตุกํ ธมฺมํ ปจฺจยา นเหตุ สเหตุโก จ นเหตุ อเหตุโก จ ธมฺมา อุปฺปชฺชนฺติ เหตุปจฺจยา – วตฺถุํ ปจฺจยา นเหตู สเหตุกา ขนฺธา, มหาภูเต ปจฺจยา จิตฺตสมุฏฺฐานํ รูปํ; ปฏิสนฺธิกฺขเณ…เป.…(3)

นเหตุํ สเหตุกญฺจ นเหตุํ อเหตุกญฺจ ธมฺมํ ปจฺจยา นเหตุ สเหตุโก ธมฺโม อุปฺปชฺชติ เหตุปจฺจยา (ฆฏนา ตีณิ, ปวตฺติปฏิสนฺธิ ปริปุณฺณํฯ สํขิตฺตํ)ฯ

[170] เหตุยา นว, อารมฺมเณ จตฺตาริ…เป.… อญฺญมญฺเญ ฉ…เป.… ปุเรชาเต อาเสวเน จตฺตาริ…เป.… อวิคเต นว (เอวํ คเณตพฺพํ)ฯ

อนุโลมํฯ

[171] นเหตุยา เอกํ, นอารมฺมเณ ตีณิ…เป.… โนวิคเต ตีณิฯ

ปจฺจนียํฯ

4. นิสฺสยวาโร

(นิสฺสยวาโร ปจฺจยวารสทิโสฯ)

5. สํสฏฺฐวาโร

1-4. ปจฺจยานุโลมาทิ

[172] นเหตุํ สเหตุกํ ธมฺมํ สํสฏฺโฐ นเหตุ สเหตุโก ธมฺโม อุปฺปชฺชติ เหตุปจฺจยา – นเหตุํ สเหตุกํ เอกํ ขนฺธํ…เป.… ปฏิสนฺธิกฺขเณ…เป.…ฯ

[173] เหตุยา เอกํ, อารมฺมเณ ทฺเว, อธิปติยา เอกํ, อนนฺตเร ทฺเว (สพฺพตฺถ ทฺเว), มคฺเค เอกํ…เป.… อวิคเต ทฺเวฯ

อนุโลมํฯ